အောက်တိုဘာ – ၄၊ ၂၀၂၆။ ထားမြတ်/People’s Spring
ကချင်ပြည်နယ်၊ ချီဖွေမြို့နယ် ပန်ဝါဒေသ လဂွေကျေးရွာမှာ တရုတ်လုပ်ငန်းရှင်ရဲ့ ယမ်းဂိုဒေါင်ပေါက်ကွဲမှုနဲ့ပတ်သက်ပြီး ထိခိုက်သေဆုံး၊ ပျက်စီးဆုံးရှုံးမှု အခြေအနေ အသေးစိတ် စစ်ဆေးနေကြောင်း ကချင်လွတ်လပ်ရေးတပ်မတော်(KIO/KIA) သတင်းပြန်ကြားရေးဌာနက ဖော်ပြပါတယ်။
အောက်တိုဘာ ၂ရက် နေ့လည်ပိုင်း လဂွေရွာစာသင်ကျောင်းအနီးက ယမ်းဂိုဒေါင်ပေါက်ကွဲခဲ့တာဖြစ်ပြီး ကနဦး စိစစ်ချက်အရ ၇ဦးသေဆုံးကာ ၁၁ဦး ဒဏ်ရာရရှိခဲ့ကြောင်း အသိပေးကာ သေဆုံး၊ ထိခိုက်၊ ပျောက်ဆုံးနဲ့ ပျက်စီးအခြေအနေတွေကို KIO အရှေ့မြောက်ပိုင်းတိုင်းမှ စစ်ဆေးနေကြောင်း အသိပေးပါတယ်။
ပေါက်ကွဲမှု ဖြစ်ပွားတာဟာ လုပ်ငန်းသုံးဖို့ ဂိုဒေါင်အတွင်း သိုလှောင်ထားတဲ့ ဖောက်ခွဲရေးသုံးယမ်းအမျိုးအစားများ မတော်တဆ ပေါက်ကွဲသွားတာဖြစ်နိုင်ခြေရှိတယ်လို့ ယူဆထားတာကိုလည်း အသိပေးပါတယ်။
Public Service Announcement
ဒဏ်ရာရသူတွေကို ဆေးကုသမှုပေးနေပြီး ဒဏ်ရာပြင်းထန်သူများကို အိမ်နီးချင်း တရုတ်နိုင်ငံ ဆေးရုံသို့ ပို့ဆောင်ကာ ဆေးကုသမှု ပေးနေတယ်လို့ ဆိုပါတယ်။
ပေါက်ကွဲမှု ဖြစ်ပွားချိန် အောက်တိုဘာ ကျောင်းပိတ်ရက်ဖြစ်လို့ ပေါက်ကွဲမှုထဲမှာ ကျောင်းသူကျောင်းသားများ ထိခိုက် သေဆုံးမှုမရှိကြောင်းနဲ့ အဆောင်မှာ ရှိနေတဲ့ ဆရာ ၁ဦး၊ ဆရာမ ၁ဦး ဒဏ်ရာ ရရှိခဲ့ကြောင်း ဖော်ပြပါတယ်။
ချီဖွေ၊ ဆော့လော်၊ ပန်ဝါဒေသတွေကို KIO/KIAက ၂၀၂၄ နှစ်ကုန်ပိုင်းမှာ တိုက်ခိုက်သိမ်းပိုက်ပြီး KIO အုပ်ချုပ်ရေးဖော်ဆောင်နေတဲ့ ဒေသတွေဖြစ်ပါတယ်။
ကချင်သတင်းရင်းမြစ်တစ်ဦးကတော့ ယမ်း၊ လက်နက် သိုလှောင်ရုံတွေကို ကျေးရွာအနီးမှာ လုံး၀ မထားရှိရေး ဥပဒေ စည်းကမ်းများချမှတ်ပြီးစနစ်တကျ ကြပ်မတ်သင့်တယ်လို့ ပြောပါတယ်။
လက်နက်ကိုင်တပ်တွေအနေနဲ့ အခွန်ငွေရရှိခြင်းထက် ပြည်သူဘေးကင်းရေးကို တာဝန်ယူမှု တာဝန်ခံမှု ရှိစွာလုပ်ဆောင်ကြဖို့ လိုအပ်တယ်လို့လည်း တိုက်တွန်းပါတယ်။
အခု ၂၀၂၆အတွင်းမှာ KIA အပါအဝင် တိုင်းရင်းသားလက်နက်ကိုင်တပ်တွေဖြစ်တဲ့ ၀၊ တအာင်းနဲ့ ကိုးကန် တပ်ထိန်းချုပ်နယ်မြေတွေမှာ အဲဒီလိုယမ်းသိုလှောင်ရာနေရာတွေ ပေါက်ကွဲမှုတွေဖြစ်ပွားခဲ့တာကြောင့် ပြည်သူလူထုသေဆုံးထိခိုက်မှုတွေ အများအပြား ရှိခဲ့ပါတယ်။
