အစ္စရေး ရွေးကောက်ပွဲမှာ မဲခိုးမှုတွေ ရှိခဲ့တယ်လို့ နေတန်ညာဟုရဲ့ ပါတီစွပ်စွဲ

မဲမသမာမှု၊ မဲခိုးမှုတွေကြောင့်သာ ဝန်ကြီးချုပ် ဘင်ဂျမင် နေတန်ညာဟုဟာ အစ္စရေး ရွေးကောက်ပွဲမှာ ပြတ်ပြတ်သားသား အနိုင်မရခဲ့တာ ဖြစ်တယ်လို့ သူ့ရဲ့ ပါတီက စွပ်စွဲ ပြောကြားလိုက်ပါတယ်။

အောက်တိုဘာ ၂၇ ရက်နေ့က အစ္စရေးမှာ ကျင်းပခဲ့တဲ့ ရွေးကောက်ပွဲရဲ့ မဲစာရင်း ရလဒ်တွေကို မကြေညာသေးပေမယ့် ကနဦး ရေတွက်မှုတွေ အရတော့ ဘယ်ပါတီမှ ပြတ်ပြတ်သားသား အနိုင်ရမယ့် အခြေအနေ မရှိပါဘူး။ နေတန်ညာဟု ဦးဆောင်တဲ့ လီကွတ်ပါတီနဲ့ မဟာမိတ်တွေရော၊ ဂါဒီ အိုင်ဆင်ကော့ ဦးဆောင်တဲ့ အတိုက်အခံ မဟာမိတ် အင်အားစုတွေပါ လွှတ်တော်အမတ် နေရာ ၅၀ ကျော်လောက်စီ ရရှိကြမယ်လို့ ယုံကြည်ရပြီး ညွန့်ပေါင်း အစိုးရဖွဲ့ဖို့ လုံလောက်တဲ့ ပမာဏ မဟုတ်ပါဘူး။ အစ္စရေးမှာ ညွန့်ပေါင်း အစိုးရ ဖွဲ့ဖို့အတွက် အနည်းဆုံး လွှတ်တော်အမတ် နေရာ ၆၁ ခု လိုအပ်ပါတယ်။

တစ်ဖက်မှာတော့ အာရပ်ပါတီတွေက ထင်ထားတာထက် အခြေအနေ ပိုကောင်းခဲ့ပြီး အမတ်နေရာ ၁၉ ခုလောက်ထိကို ရယူနိုင်ခဲ့ပါတယ်။ ဒါကြောင့် အစိုးရ ဖွဲ့စည်းရေးမှာ အာရပ်ပါတီတွေနဲ့ ပူးပေါင်းနိုင်ဖို့က အရေးကြီးတဲ့ လိုအပ်ချက်တစ်ခု ဖြစ်လာနိုင်ပါတယ်။

အိုင်ဆင်ကော့နဲ့ အတိုက်အခံတွေကတော့ ရွေးကောက်ပွဲ ရလဒ်တွေကိုကြည့်ရင် နေတန်ညာဟုအပေါ် လူထု ယုံကြည်မှုက ပျောက်ကွယ်နေပြီဆိုတာ အထင်အရှား တွေ့မြင်ရကြောင်း၊ နေတန်ညာဟု အနေနဲ့ ဒီအချက်ကို အရှိအတိုင်း လက်ခံပြီး နိုင်ငံရေးကနေ အပြီးတိုင် အနားယူသင့်ကြောင်း ပြောကြားထားပါတယ်။

Public Service Announcement

အောက်တိုဘာ ၂၈ ရက်နေ့မှာတော့ လက်ယာယိမ်း လီကွတ်ပါတီက ကြေညာချက်တစ်စောင် ထုတ်ပြန်ခဲ့ရာမှာ အာရပ် မဲရုံတွေ အများအပြားမှာ မဲခိုးမှုတွေ ရှိခဲ့ကြောင်း အထောက်အထားတွေ တွေ့ထားတယ်လို့ ဖော်ပြထားပါတယ်။ ပြီးတော့ သက်ဆိုင်ရာ တရားဥပဒေ စိုးမိုးရေး အေဂျင်စီတွေ အနေနဲ့ ဒီကိစ္စအပေါ် မြန်မြန်ဆန်ဆန်နဲ့ ထိထိရောက်ရောက် အရေးယူပေးဖို့ ပါတီက တောင်းဆိုထားပါတယ်။ အဲဒီ ကြေညာချက်ကို နေတန်ညာဟုကလည်း သူ့ရဲ့ လူမှုကွန်ရက် အကောင့်မှာ မျှဝေထားခဲ့ပါတယ်။

မဲရေတွက်မှု အစောပိုင်း ကာလတွေမှာ ပါတီရဲ့ အခြေအနေက သိသိသာသာ ကောင်းနေရာကနေ ရုတ်တရက် မသင်္ကာစရာ အပြောင်းအလဲတွေ ဖြစ်ကုန်တယ်လို့ လီကွတ်ဖက်က စွပ်စွဲထားပေမယ့် တိကျတဲ့ အထောက်အထားတွေတော့ တင်မပြထားခဲပါဘူး။ အစ္စရေး ရဲတပ်ဖွဲ့ကလည်း ရွေးကောက်ပွဲမှာ မဲမသမာမှုတွေ ရှိခဲ့ကြောင်း ဘာအထောက်အထားမှ မတွေ့သေးဘူးလို့ မှတ်ချက်ပေးထားပါတယ်။

လေ့လာသူတွေကတော့ အစ္စရေးမှာ နေထိုင်တဲ့ အာရပ် မဲဆန္ဒရှင်တွေဟာ ရွေးကောက်ပွဲမှာ စံချိန်တင် အရေအတွက်မျိုးထိ လာရောက် မဲပေးခဲ့တာကို ကြည့်ရင် ပါလက်စတိုင်း လူထုအပေါ် ရက်ရက်စက်စက် ဖိနှိပ်တဲ့ နေတန်ညာဟုရဲ့ မူဝါဒတွေအပေါ် အာရပ်တွေရဲ့ ဒေါသထွက်နေမှုကို အထင်အရှား မြင်သာစေကြောင်း ပြောပါတယ်။

ရွေးကောက်ပွဲမှာ နေတန်ညာဟုရဲ့ အစိုးရက တော်တော်ကြီး အခြေအနေ ဆိုးမယ်လို့ ခန့်မှန်းထားတဲ့ အဆင့်ထိ မရောက်ခဲ့ပေမယ့် သူ့အတွက် ဝန်ကြီးချုပ် နေရာကို ဆက်ထိန်းထားနိုင်ဖို့ကတော့ ကြီးမားတဲ့ ထိုးနှက်ချက်မျိုး ဖြစ်လာခဲ့ပါတယ်။

အစ္စရေးရဲ့ ဖွဲ့စည်းပုံ ဥပဒေတွေအရ အစိုးရသစ် ဖွဲ့စည်းဖို့ ပါတီတွေကြား ညှိနှိုင်းမှု မအောင်မြင်ရင် အချိန်ကာလ အတိုင်းအတာ တစ်ခုအတွင်း နောက်ထပ် ရွေးကောက်ပွဲတစ်ခု ကျင်းပရနိုင်ပါတယ်။ အဲဒီ အတောအတွင်းမှာတော့ နေတန်ညာဟုကပဲ အိမ်စောင့် အစိုးရကို ဆက်လက် ဦးဆောင်နေမှာ ဖြစ်ပါတယ်။

ကိုးကား: Politico