မင်းတပ်မြို့ကို စစ်တပ်က ဖျက်အားပြင်းဗုံးတွေသုံး ထပ်မံလေကြောင်းတိုက်ခိုက်လို့ နေအိမ်တွေ ပျက်စီး

အောက်တိုဘာ ၂၉၊ ၂၀၂၆။ထားမြတ်/People’s Spring

ချင်းပြည်နယ်၊ မင်းတပ်မြို့ကို အာဏာသိမ်းစစ်တပ်က ဒီကနေ့ အောက်တိုဘာ ၂၉ရက်ညနေပိုင်းနဲ့ ညပိုင်းမှာ လေကြောင်းဗုံးကြဲတိုက်ခိုက်မှုတွေ ဆက်လက်ပြုလုပ်ခဲ့လို့ အဆောက်အအုံများစွာ ပျက်စီးခဲ့ရကြောင်း မင်းတပ်ဒေသခံက ပြောပါတယ်။

အောက်တိုဘာ ၂၉ရက် ညနေ မှာ မင်းတပ်မြို့ပေါ်ကို တိုက်လေယာဉ် ၁စီးနဲ့ ဗုံး ၂လုံး ကြဲချခဲ့သလို ည ၇နာရီလောက်မှာလည်း တိုက်လေယာဉ်နဲ့ ဖျက်အားပြင်းဗုံး ၂လုံး ကြဲချခဲ့တာလို့ ဆိုပါတယ်။

မင်းတပ်မြို့နယ်မှာ လတ်တလော တိုက်ပွဲအချို့ရှိပေမဲ့ အခု စစ်တပ် လေကြောင်းဗုံးကြဲနေတဲ့နေရာတွေကတော့ တိုက်ပွဲမရှိ လူနေထိုင်ခြင်းမရှိတဲ့နေရာတွေလို့ သတင်းရင်းမြစ်က ပြောပါတယ်။

Public Service Announcement

“အဆောက်အအုံတွေထိတာ တအားများတယ်။ မြို့ထဲမှာ ဘာမှ မရှိတဲ့ အဆောက်အအုံတွေ လိုက်ပစ်နေတဲ့ပုံစံဖြစ်နေတယ်။ သတင်းမှားတွေရတာလား ဘာလဲတော့ မသိဘူး” လို့ မင်းတပ်ဒေသခံက ပြောပါတယ်။

အောက်တိုဘာ ၂၄ရက်နဲ့ ၂၅ရက်တွေမှာလည်း စစ်တပ်ဟာ မင်းတပ်မြို့ပေါ်ကိုတိုက်လေယာဉ်တွေနဲ့ ဗုံးကြဲခဲ့လို့ နေအိမ်များစွာ ပျက်စီးခဲ့ရပါတယ်။

စစ်တပ်ဟာ ချင်းပြည်သူ့အစည်းအရုံး(CPU/CPA) ထိန်းချုပ်ထားတဲ့ မင်းတပ်၊ကန်ပက်လက်၊ ကျင်ဒွေး စတဲ့ ဒေသတွေပြန်ထိန်းချုပ်နိုင်ဖို့ ထိုးစစ်ဆင်နေတာ ဖြစ်ပါတယ်။ မေလကတည်းက စတင်ထိုးစစ်ဆင်ခဲ့ရာ CPU/CPA မဟာမိတ်ပူးပေါင်းတပ်ရဲ့ တိုက်ခိုက်မှုကြောင့် မြို့တွေ သိမ်းပိုက်နိုင်တာမရှိဘဲ တိုက်ပွဲတွေမှာ စစ်တပ်အထိနာလျက်ရှိပါတယ်။

စစ်တပ်ဟာ ချင်းပြည်နယ် ပလက်၀မြို့နယ် ဒိုင်ရ်ဒေသနဲ့ ချင်းမြောက် ဟားခါးမြို့နယ်တို့ကိုလည်း အောက်တိုဘာလအတွင်းမှာ လေကြောင်းဗုံးကြဲတိုက်ခိုက်တာတွေ ပြုလုပ်ခဲ့လို့ အရပ်သား ပြည်သူသေဆုံးမှုတွေရှိခဲ့သလို ဟားခါး ဗုံးကြဲမှုမှာဆို CDF ဟားခါး ထိန်းသိမ်းထားတဲ့ စစ်သုံ့ပန်း ၁၀ဦးအထိ သေဆုံးခဲ့ရပါတယ်။