ကလေး-ဂန့်ဂေါလမ်းပိုင်းတွင် စစ်ကောင်စီတပ်ကို သုံး နေရာခွဲ၍ မိုင်းခွဲတိုက်ခိုက်၊ စစ်ကောင်စီတပ်မှ ၁၄ ဦးသေ

ကလေး-ဂန့်ဂေါလမ်းပိုင်းတွင် စစ်ကောင်စီတပ်ယာဥ်တန်းအား သုံးနေရာခွဲ၍ မိုင်းခွဲတိုက်ခိုက်ခဲ့ကြောင်း ပြည်သူ့ကာကွယ်ရေးတပ်ဖွဲ့(ဂန့်ဂေါ)မှ ယနေ့(ဒီဇင်ဘာ ၂၉) ထုတ်ပြန်သည်။

အဆိုပါတိုက်ခိုက်မှုများအနက် ယနေ့တွင် ဂန့်ဂေါဘက်မှ ကလေးဘက်သို့ စစ်ကြောင်းထိုးလာသော စစ်ကောင်စီယာဥ်တန်းအား မိုင်တိုင် ၃၂၊ ၃၄ နှင့် ၃၅ အနီးတို့တွင် မိုင်းခွဲတိုက်ခိုက်ခဲ့ခြင်းဖြစ်ကြောင်း ထုတ်ပြန်ချက်တွင် ဖော်ပြ သည်။

မိုင်တိုင်(၃၂)အနီးတိုက်ခိုက်မှုကို PDF-GanGaw တပ်ခွဲ (၂၁)ဗိုလ်ရွှေကျားအဖွဲ့က တာဝန်ယူတိုက်ခိုက်ပြီး မိုင်းခွဲတိုက်ခိုက်ခံရမှုကြောင့် စစ်ကောင်စီတပ်သား ရှစ်ဦးသေဆုံးကြောင်း ထုတ်ပြန်ချက်က ဆိုသည်။

အလားတူ မိုင်တိုင်(၃၄)အနီးတွင်လည်း PDF-GanGaw တပ်ခွဲ(၇)နွေဦးအဖွဲ့က မိုင်းဆွဲတိုက်ခိုက်ခဲ့ရာ တပ်ကြပ်ကြီးတစ်ဦးအပါအဝင် စစ်ကောင်စီတပ်သား ခြောက်ဦး​သေဆုံးသွားသည်ဟု ထုတ်ပြန်ချက်တွင် ဖော်ပြသည်။

Public Service Announcement

ထို့အပြင် မိုင်တိုင်(၃၅)အနီးနားအရောက်တွင် PDF- GanGaw တပ်ခွဲ(၃) ဗိုလ်မြတ်ထွန်းအဖွဲ့က မိုင်းဆွဲ၍ ထပ်မံတိုက်ခိုက်ခဲ့ရာ ကားတစ်စီးထိမှန်ပျက်စီးသွားပြီး PDF-GanGaw တော်လှန်ရေးရဲဘော်များမှာ အထိ အခိုက် မရှိခဲ့ကြောင်း အသိပေးထုတ်ပြန်ထားသည်။

ကလေး-ဂန့်ဂေါလမ်းပိုင်းတွင် စစ်ကောင်စီတပ်နှင့် ဒေသကာကွယ်ရေးတပ်ဖွဲ့များ တိုက်ပွဲများဆက်တိုက်ဖြစ်ပွားလျက်ရှိရာ ဒီဇင်ဘာ ၂၆ ရက်မှ ၂၈ နေ့အထိ စစ်ကောင်စီတပ်သား ၂၀ သေဆုံးခဲ့သည်။