မန္တလေးမှာ ရထားလမ်းပေါက်ကွဲမှုဖြစ်ပြီးနောက် အနီးပတ်ဝန်းကျင်က ကျုးကျော်တွေကိုဘူဒိုဇာနဲ့စစ်ကောင်စီ ရှင်းလင်း

မန္တလေး − လားရှိုးရထားလမ်းပိုင်း ပေါက်ကွဲမှု ဖြစ်ပြီးတဲ့နောက် အနီးပတ်ဝန်းကျင် သံလမ်းဘေးက ကျုးကျော်တဲတွေကို စစ်ကောင်စီဟာ နေ့တွင်းချင်း ဘူဒိုဇာနဲ့ထိုးပြီး ဖယ်ရှားလိုက်တယ်လို့သိရပါတယ်။

မနေ့က ဇန်နဝါရီလ ၉ ရက်မနက်ပိုင်းက ကျုးကျော်ရှင်းလင်းရေးအဖွဲ့တွေလိုက်ပါလာတဲ့ ရထားတွဲဟာ မန္တလေး − လားရှိုး ရထားလမ်းပိုင်းမှာ ပေါက်ကွဲမှု ၂ ကြိမ်ကြုံခဲ့တာပါ။

ပေါက်ကွဲမှုဖြစ်တာကတော့ မန္တလေး ၊ပြည်ကြီးတံခွန်မြို့နယ်ထဲမှာဖြစ်ပါတယ်။

အဲဒီနောက် ညနေပိုင်းမှာတင် စစ်ကောင်စီဟာ အနားပတ်ဝန်းကျင်က ကျုးကျော်တဲတွေကို ရှင်းပစ်ခဲ့တယ်လို့ ဒေသခံတစ်ဦးကပြောပါတယ်။

Public Service Announcement

အင်အားအလုံးအရင်းနဲ့ လာရောက်ရှင်းလင်းတာဖြစ်လို့ နေအိမ်ထဲက ပစ္စည်းတွေတောင်ယူချိန်မရလိုက်ဘူးလို့သိရပါတယ်။

“မနက်ခင်းမှာ ဗုံးပေါက်သွားတာကြောင့်နေမယ်၊ ညနေလောက်ကျရောက်ချလာပြီး ဘူဒိုဇာတွေနဲ့အကုန်ထိုးချသွားတာ၊ သေနတ်တွေနဲ့ဆိုတော့ ဘာမှမပြောရဲဘူး ဒီတိုင်းကြည့်နေလိုက်ရတယ်၊အချိန်က မကြာလိုက်ဘူး၊ ရောက်ရောက်ရှင်းရှင်း လုပ်ချသွားတာ”လို့ မျက်မြင်တွေ့ရှိသူတစ်ဦးကပြောပါတယ်။

စစ်ကောင်စီဟာ မန္တလေးမှာ ရထားသံလမ်းဘေးက ကျုး ၊ လမ်းဘေးကျုးတွေကို ဆက်တိုက်ရှင်းလင်းတာတွေလုပ်နေတာလည်းဖြစ်ပါတယ်။