စစ်ကိုင်းတိုင်း ကလေးမြို့ရေရှင်ရွာတိုက်ပွဲ၌ အကြမ်း ဖက်စစ်ကောင်စီတပ်မှ ငါးဦးသေဆုံးကြောင်း ကလေး PDFက ထုတ်ပြန်သည်။
ကလေးမြို့နယ်တောင်ပိုင်း ကျောက်ပြုတ်ရွာတွင် တပ်စွဲထားသော အကြမ်းဖက်စစ်ကောင်စီတပ်နှင့် ပျူစောထီး ပူးပေါင်းအင်အား ၆၀ခန့်ဖြင့် ယနေ့ (ဇန်နဝါရီ ၁၂ ရက်) က အင်းကျွန်းရွာသို့ ဝင်ရောက်မီးရှို့ ဖျက်ဆီးခဲ့ပြီးနောက် ရေရှင်ရွာသို့ ဆက်လက်ဝင်ရောက်ရာမှ တိုက်ပွဲဖြစ်ပွားခဲ့ခြင်းဟု ကလေးPDFက ဆိုသည်။
ယနေ့နံနက် ၇နာရီခွဲခန့်က စတင်ခဲ့သောတိုက်ပွဲမှာ နံနက် ၁၁နာရီခွဲခန့်အထိ ပြင်းထန်စွာဖြစ်ပွားခဲ့ကာ တိုက်ပွဲအတွက် အကြမ်းဖက်စစ်ကောင်စီတပ်က လက်နက်ကြီး ပစ်ကူရယူခဲ့သည်။
နေ့လယ်၁နာရီခန့်တွင် အကြမ်းဖက်စစ်ကောင်စီတပ်နှင့် ပျူစောထီးပူးပေါင်းအဖွဲ့က ကျောက်ပြုတ်ရွာဘက်သို့ ပြန်လည်ဆုတ်ခွာခဲ့ရသည်။
Public Service Announcement
ယနေ့တိုက်ပွဲအတွင်း အကြမ်းဖက်စစ်ကောင်စီတပ်မှ စစ်သားနှင့် ပျူစောထီးငါးဦးသေဆုံးကာ ကလေး PDF မှ တပ်ဖွဲ့ဝင်နှစ်ဦး လက်နက်ကြီးထိမှန်၍ ဒဏ်ရာရခဲ့ကြောင်း ထုတ်ပြန်ချက်တွင် ဖော်ပြသည်။
ဇန်နဝါရီ ၆ ရက်ကလည်း ကလေးမြို့နယ် ချောင်းခွရွာမှတဆင့် ဖလမ်းမြို့နယ် ဝေဘူလမြို့သို့ စစ်ကြောင်းထိုးလာသည့် အကြမ်းဖက်စစ်ကောင်စီတပ်နှင့် တိုက်ပွဲဖြစ်ရာ စစ်ကောင်စီတပ်သားလေးဦး သေဆုံးထားသည်။
