ရှမ်း-ကယားနယ်စပ်မြို့နယ်များဖြစ်သည့် လွိုင်ကော်နှင့်ဖယ်ခုံမြို့နယ်တို့တွင် ယနေ့တိုက်ပွဲများဖြစ်ပွားခဲ့ရာ စစ်ကောင်စီတပ်မှ ၁၂ဦးသေဆုံးပြီး စစ်ကား သုံးစီးပျက်စီးခဲ့ကြောင်း ကရင်နီအမျိုးသားကာကွယ်ရေးတပ်ဖွဲ့(KNDF)က ထုတ်ပြန်သည်။
ဖယ်ခုံမြို့နယ်၊ ရွှေပြည်အေးနှင့် ကုန်းဆုံတိုက်ပွဲအနီးတွင် ဗန်းမောက်ကျေးရွာဖက်မှ စစ်ကြောင်း ထိုးလာသော အကြမ်းဖက်စစ်ကောင်စီတပ်များကို KNDF နှင့် ဖယ်ခုံပြည်သူ့ကာကွယ်ရေးတပ်(PDF) တို့မှခုခံတိုက်ခိုက်ခဲ့ကြောင်း၊ ၄နာရီကြာတိုက်ပွဲဖြစ်ခဲ့ပြီး စစ်ကောင်စီတပ်မှ ၁၀ဦးသေဆုံးကြောင်း ဖော်ပြသည်။
တိုက်ပွဲ၌ အထိနာသည့် စစ်ကောင်စီတပ်က တိုက်လေယာဉ်ဖြင့် ဗုံးကြဲတိုက်ခိုက်ခဲ့သည်ဟုဆိုသည်။
ဖယ်ခုံတိုက်ပွဲအတွင်း အကြမ်းဖက်စစ်ကောင်စီတပ်မှ (၁၂၀)မမ လက်နက်ကြီးဖြင့် ရမ်းသမ်းပစ်ခတ်ခဲ့သဖြင့် ဖယ်ခုံမြို့အတွင်း နေအိမ်များပျက်စီးခဲ့ကြောင်း KNDFက ထုတ်ပြန်သည်။
Public Service Announcement
ထို့ပြင် ဆီဆိုင်ဘက်မှ လွိုင်ကော်မြို့ဘက်သို့ အင်အားဖြည့်တင်းလာသည့် စစ်ကောင်စီတပ်ကို လွိုင်လင်လေး ဒေသအနီး၌ တိုက်ခိုက်ခဲ့သည်ဟု ဆိုသည်။ သံချပ်ကာကားများနှင့် တင့်ကားများ ပါဝင်သော စစ်ယာဉ် တန်းကို KNDF မှ တိုက်ခိုက်ခဲ့ရာ အကြမ်းဖက်စစ်ကောင်စီတပ်ဘက်မှ စစ်ကားသုံး စီးပျက်စီးခဲ့ပြီး နှစ်ဦးသေဆုံးခဲ့ကြောင်း ထုတ်ပြန်သည်။
ယမန်နေ့ကလည်း လွိုင်ကော်မြို့နယ် ကယန်းသာယာ ကျေးရွာအနီးတွင် စစ်ကြောင်းထိုးလာသော အကြမ်းဖက်စစ်ကောင်စီတပ်များကို KNDF နှင့် PDF (လွိုင်ကော်) တိုက်ခိုက်ခဲ့ရာ နှစ်ဖက်ထိတွေ့တိုက်ပွဲများဖြင့်ပွားခဲ့ပြီး အကြမ်းဖက်စစ်ကောင်စီတပ် ဘက်မှ အထိနာသဖြင့် လေကြောင်းပစ်ကူဖြင့် လာရောက်တိုက်ခဲ့သည်ဟု ဖော်ပြထားသည်။
