ဆောမြို့နယ်ကြားကာလ ပြည်သူ့ရဲတပ်ဖွဲ့ ဖွဲ့စည်းကြောင်း ဆောမြို့နယ် ပြည်သူ့အုပ်ချုပ်ရေး အဖွဲ့က ယနေ့ ထုတ်ပြန်သည်။
ဆောမြို့နယ်အတွင်း တရားဥပဒေမဲ့လုပ်ရပ်များ မဖြစ်ပွားစေရေး၊ တရားဥပဒေမဲ့ လုပ်ရပ်များ ဖြစ်ပွားခဲ့ပါကလည်း တရားဥပဒေနှင့်အညီ အပြစ်ပေးအရေးယူနိုင်ရေး နှင့် ပြည်သူလုံခြုံရေး လုပ်ငန်းများအား ထိရောက်စွာ ဆောင်ရွက်နိုင်ရန် ဖွဲ့စည်းလိုက်ခြင်းဖြစ်သည်ဟု ဆိုသည်။
အဆိုပါဖွဲ့စည်းမှုကို ပြည်သူ့ဝန်ထမ်းများအဖြစ် ရပ်တည်ခဲ့ကြသည့် CDM ရဲဝန်ထမ်းများဖြင့် ဖွဲ့စည်းလိုက်ခြင်းဖြစ်ကြောင်း ကြေညာချက်၌ ဖော်ပြထားသည်။
ဆောမြို့နယ် ပြည်သူ့အုပ်ချုပ်ရေးအဖွဲ့အနေဖြင့် စစ်ကောင်စီလက်အောက်တွင် တာဝန်ထမ်း ဆောင်နေသည့် ဝန်ထမ်းများ ဖေဖော်ဝါရီ ၅ရက်နောက်ဆုံးထား၍ ပြည်သူနှင့်အတူ ရပ်တည်ရန်သတိပေးထားပြီး ဖေဖော်ဝါရီ ၄ရက်တွင် ဆောမြို့ရှိ ဌာနဆိုင်ရာ ရုံးများအပါအဝင် စစ်ကောင်စီထောက်တိုင်နေရာ ၁၀နေရာကို မီးရှို့ဖျက်ဆီးခဲ့သည်။
Public Service Announcement
