မန္တလေးတိုင်း မြင်းခြံမြို့ပေါ်ရှိ အကြမ်းဖက်စစ်ကောင်စီ၏ စီးပွားရေး ထောက်တိုင်ဖြစ်သော မြန်မာဘီယာများကို သိုလှောင်ဖြန့်ဖြူးရောင်းချနေသည့် ဂိုဒေါင်တစ်လုံးအား ဗုံးဖြင့်ဖောက်ခွဲ သတိပေးခဲ့ကြောင်း တလုပ် PDFက ထုတ်ပြန်သည်။
စစ်ကောင်စီ၏ စီးပွားရေးထောက်တိုင်ဖြစ်သော မြန်မာဘီယာအား ဖြန့်ဖြူး ရောင်းချ ခြင်းမပြုရန် သတိပေးတားမြစ်ထားကြောင်း၊ အဆိုပါတားမြစ်ချက် အား လေးစားလိုက်နာမှု မရှိဘဲ မြန်မာဘီယာအမြောက်အများသိုလှောင်ထား ရှိရာ မြင်းခြံမြို့ အမှတ်(၈)ရပ်ကွက်ရှိ မွှေးမွှေးဂိုဒေါင်အား ဗုံးတစ်လုံးဖြင့် ဖောက်ခွဲ၍ နောက်ဆုံးအကြိမ်သတိပေးခဲ့ကြောင်း၊ ၎င်းဆိုင်နှင့်တကွ မြန်မာဘီယာအား ဆက်လက်ဖြန့်ဖြူးရောင်းချနေသောဆိုင်များအား ထိရောက်စွာ အရေးယူဆောင်ရွက်သွားမည်ဖြစ်ကြောင်း တလုပ်PDFက သတိပေးသည်။
“မနေ့က မတ်လ ၂၃ ရက် ည၈ နာရီလောက်ကပါ။ မွှေးမွှေးက ဂိုဒေါင်တွေ အများကြီးရှိပါတယ်။သို့ပေမဲ့ လူထိခိုက်မှု့မရှိစေဖို့ ရည်ရွယ်ပြီး ဂိုဒေါင်အား ဖောက်ခွဲခြင်းဖြစ်ပါတယ်”ဟု တလုပ် PDF တာဝန်ရှိသူက ပြောသည်။
ပြည်သူများအနေဖြင့်လည်း စကစနှင့်ပတ်သက်သော ကုန်ပစ္စည်းများအား ဝယ်ယူသုံးစွဲခြင်း မပြုရန် မေတ္တာရပ်ခံကြောင်း ပြည်သူ့ကာကွယ်ရေးတပ်ဖွဲ့- တလုပ် (PDF-Taloke)က အသိပေးထားသည်။
Public Service Announcement
