မြန်မာစစ်တပ်ကို တာဝန်ခံမှုရှိစေရေးဥပဒေ Burma Act ကို အမေရိကန်လွှတ်တော်နှစ်ရပ်စလုံးက အတည် ပြုပြဌာန်းရန် နီးစပ်နေပြီဟု အမေရိကန်ရောက်မြန်မာ့အရေးလှုပ်ရှားနေသူအချို့က ပြောသည်။
အမေရိကန်အစိုးရက တရားမဝင်အာဏာသိမ်းမြန်မာစစ်တပ်ကို တာဝန်ခံမှုရှိစေရေး လုပ်ဆောင် ရန်နှင့် မြန်မာ့ဒီမိုကရေစီအရေး ကူညီပံ့ပိုးရန် အဓိကရေးဆွဲထားသည့် Burma Unified through Rigorous Military Accountability Act (Burma Act)မှာ အောက်လွှတ် တော်၏ သဘောတူညီ ချက်ရရှိထားပြီး အထက် လွှတ်တော်၏ သဘောတူညီချက်ရရှိရန် နီးစပ်နေပြီဟု ယင်းဥပဒေဖြစ် ပေါ်လာရေးလှုံ့ဆောင်နေသူအချို့ကပြောသည်။
ယူကရိန်းအပေါ် ရုရှား၏ ကျူးကျော်စစ်ကြောင့် မြန်မာ့အရေးသည် အနည်းငယ် နောက်ရောက်သွားသော်လည်း ပြီးခဲ့သည့်သီတင်းပတ်တွင် အမေရိကန်နိုင်ငံခြားရေးဝန်ကြီးဌာနက မြန်မာစစ်တပ်က ရိုဟင်ဂျာလူမျိုးသုဉ်းသတ်ဖြတ်ခြင်း(Genocide)ကျူးလွန်သည်ဟု တရားဝင် သတ်မှတ်ကြေညာခဲ့၍ Burma Act အတည်ပြုပြဌာန်းရန် ပိုမိုအားကောင်းလာကြောင်း U.S Advocacy Coalition for Myanmar – USACM အဖွဲ့ဝင်တစ်ဦးက ပြောသည်။
“BURMA Act သာ ဥပဒေဖြစ်လာရင် အပြစ်မဲ့ နိုင်ငံသူ နိုင်ငံသား များကို အကူအညီများစွာပေးသည်မက စစ်ကောင်စီကို အားယုတ်စေမှာပါ” ဟု USACM က ဆိုသည်။
Public Service Announcement
အဆိုပါ Burma Act တွင် မြန်မာစစ်တပ်အပေါ် လူမျိုးသုဉ်းသတ်ဖြတ်ခြင်း(Genocide)ဆိုင်ရာ ပြဌာန်းချက် ချမှတ်ရန်ပါဝင်ပြီး ယင်းဥပဒေအတည်မပြုခင်တွင်ပင် အမေရိကန်အစိုးရက သတ်မှတ်ခဲ့ပြီးဖြစ်သည်။
၂၀၂၁ ဖေဖော်ဝါရီ ၁ ရက် အာဏာသိမ်းမှုကို ထောက်ခံသည့် လူပုဂ္ဂိုလ်၊ အဖွဲ့အစည်းများကို ပစ်မှတ်ထားဒဏ်ခတ်အရေးယူရေး၊ မတရားဖမ်းဆီးထိန်းသိမ်းခံ နိုင်ငံရေးအကျဉ်းသားအားလုံး လွတ်မြောက်ရေး၊ မြန်မာ့အရေးဖြေရှင်းရေး အထူးကိုယ်စားလှယ်ခန့်အပ်ရေး အချက်များလည်း Burma Act ၌ ဖော်ပြသည်။
ထို့အပြင် ယင်းဥပဒေတွင် မြန်မာပြည်ရှိ အရပ်ဘက်အဖွဲ့အစည်းများတိုင်းရင်းသား အဖွဲ့အစည်းများကို လူသားချင်းစာနာမှု အကူအညီငွေ ဒေါ်လာ သန်း ၂၂၀ ပေးရန်၊ ဒီမိုကရေစီရရှိရေး ကြိုးပမ်းနေသော အင်အားစုများ၊ သတင်းမီဒီယာ အဖွဲ့များကို ဒီမိုကရေစီထောက်ပံ့ငွေ ဒေါ်လာ သန်း ၅၀ ပေးရန်၊ မြန်မာ့ကျောက်မျက်ရတနာလုပ်ငန်း၊ မြန်မာ့ရေနံနှင့် သဘာဝဓါတ်ငွေ့လုပ်ငန်း (MOGE) ကို ပိတ်ဆို့ရန် စသည့်အချက်များ ပါဝင်သည်။
