ဖောင်းပြင်မြို့တွင် မူးယစ်ဆေးဝါးရောင်းချနေသည်ဟု ပြည်သူကသတင်းပေးသည့်နေအိမ်အား ပြည်သူ့ကာကွယ်ရေးတပ်ဖွဲ့က ဝင်ရောက်ရှာဖွေခဲ့ရာ မူးယစ်ဆေးရောင်းသူအပါအဝင် သုံးစွဲနေသူ စုစုပေါင်းလေးဦးကို ဖမ်းမိခဲ့သည်။
ဖောင်းပြင်မြို့၊ အုန်းသာရွာရှိ နေအိမ်တစ်အိမ်ကို ဖောင်းပြင်မြို့နယ်ပြည်သူ့ကာကွယ်ရေးတပ်ဖွဲ့မှ လှုပ်ရှားတပ်စုတစ်စုက ဝင်ရောက်ရှာဖွေခဲ့ပြီး မူးယစ်ဆေးဝါးအချိို့၊ဆိုင်ကယ်သုံးစီး၊ ကျပ်ငါးသိန်းကျော်နှင့် လူလေးဦးကို စစ်ဆေးတွေ့ရှိခဲ့ခြင်း ဖြစ်သည်။
” ဖမ်းဆီးထိန်းသိမ်းထားပြီး(၇)ရက်ခန့်ပြစ်ဒဏ်ပေးပြီးလျှင် ၎င်းတို့လှူဒါန်းသော ငွေကျပ်(၃) သိန်းမှအပကျန်ငွေများနှင့်ဆိုင်ကယ်သုံးစီး ကိုပြန်ပေးပြီး(၄)ဦးစလုံးကိုလွှတ်ပေးမည်ဖြစ်သည်” ဟု ဖောင်းပြင်မြို့နယ်ပြည်သူ့ကာကွယ်ရေးတပ်ဖွဲ့က ယနေ့(မေ ၄ရက်)သတင်းထုတ်ပြန်သည်။
ဖမ်းဆီးရရှိသည့် မူးယစ်ဆေးများကို ၎င်းတို့ မျက်စိရှေ့မှောက်၌ ဖျက်ဆီးမည်ဟုလည်း ဆိုသည်။
Public Service Announcement
ပြည်သူ့အုပ်ချုပ်ရေးယန္တရားအကောင်းအထည်ဖော်နေသည့်ဖောင်းပြင်တွင် ပြည်သူ့ကာကွယ်ရေးတပ်ဖွဲ့သည် လူထု၏ထောက်ခံမှုကို ရရှိထားသည်။ ဒေသတွင်း၌ မူးယစ်ဆေးဝါးရောင်းဝယ်နေသူ များကို ဖမ်းဆီးထိန်းသိမ်းပေးရန်၊ လူထုအပေါ်ဆတ်ကြေးကောက်နေသည့် ရှမ်းနီအဖွဲ့ကို တားဆီးပေးရန်ပြည်သူ့ကာကွယ်ရေးတပ်ဖွဲ့ထံ ဒေသခံများက တောင်းဆိုခဲ့ကြသည်။
ဟုမ္မလင်းမြို့နယ်တွင်အခြေစိုက်သည့် ရှမ်းနီအမျိုးသားများတပ်မတော် (Shanni Nationalities Army-SNA)ဟု ဒေသခံများကသိရှိထားသည့် ရှမ်းနီလက်နက်ကိုင်အဖွဲ့အား အမျိုးသားညီညွတ်ရေးအစိုးရအုပ်ချုပ်မှုနယ်မြေတွင် အခွန်ငွေအကြောင်းပြ၍ ဆက်ကြေးလာမကောက်ရန် ဖောင်းပြင်မြို့နယ် ပြည်သူ့ကာကွယ်ရေးတပ်ဖွဲ့က ဧပြီ ၂၆ရက်တွင် သတိပေးခဲ့သည်။
ထို့နောက်ပိုင်း အကြမ်းဖက်စစ်ကောင်စီ၊ရှမ်းနီ ပူးပေါင်းအဖွဲ့နှင့် ပြည်သူ့ကာကွယ်ရေးတပ်ဖွဲ့ ဧပြီ ၂၈ရက်တွင် တိုက်ပွဲအပြင်းအထန်ဖြစ်ခဲ့သည်။
အဆိုပါတိုက်ပွဲအတွင်း စစ်ကောင်စီနှင့် ရှမ်းနီဘက်က ၁၅ဦးသေဆုံးခဲ့ပြီး ပြည်သူ့ကာကွယ်ရေးရဲဘော်နှစ်ဦး ကျဆုံးခဲ့သည်။
