နိုင်ငံရေးအကျဥ်းသားတွေကိုထောင်ပြောင်းလို့ ဘားအံထောင်ထဲမှာ ဆန္ဒထပ်ပြ

ဘားအံအကျဉ်းထောင်ထဲက နိုင်ငံရေးအကျဉ်းသား ၆၀ ကျော်ကို စစ်ကောင်စီက ကျိုက်မရောအကျဉ်းထောင်ဘက်ကို ရွှေ့ပြောင်းလိုက်တာကြောင့် နိုင်ငံရေးအကျဉ်းသားတွေက ထပ်မံဆန္ဒဖော်ထုတ်ခဲ့တယ်လို့ဒေသတွင်းရင်းမြစ်ထံကနေ သိရပါတယ်။

ဒီကနေ့မနက် ၆ နာရီဝန်းကျင်က ဘားအံထောင်မှာအကျဉ်းကျနေတဲ့ နိုင်ငံရေးအကျဉ်းသား (၆၆) ဦးကို စစ်ကောင်စီက ခရီးသည်တင်မှန်လုံကားနဲ့ မွန်ပြည်နယ်မှာရှိတဲ့ ကျိုက်မရောအကျဉ်းထောင်ကို ခေါ်ဆောင်သွားခဲ့တာပါ။

ဒီလို စစ်ကောင်စီက နိုင်ငံရေးအကျဉ်းသားတွေကို ရုတ်တရက်ထောင်ပြောင်းရွှေ့မှု လုပ်ဆောင်နေတဲ့ဖြစ်စဉ်မှာ အကျဉ်းသားမိသားစုဝင်တွေကို ကြိုတင်အသိမပေးဘူးလို့လည်း အကျဉ်းသားမိသားစုဝင်တစ်ဦးထံကနေ သိရပါတယ်။

နိုင်ငံရေးအကျဉ်းသားတွေကို ရွှေ့ပြောင်းဖို့လုပ်ဆောင်စဉ်မှာ အကျဉ်းသားတွေက သွေးသစ္စာသီချင်းသီဆိုခဲ့ပြီး မလိုက်ချင်ကြောင်း ဆန္ဒထုတ်ဖော်ပြောဆိုကာ ထောင်မှူးက နိုင်ငံရေးအကျဉ်းသားတွေကို သေနတ်နဲ့ချိန်ပြီ ပြန်လည်ဆဲဆိုခဲ့တယ်လို့ ဒေသတွင်းသတင်းရင်းမြစ်ထံကနေ သိရပါတယ်။

Public Service Announcement

“ဘယ်လက်နက်ကိုင် ဘယ်PDF ကိုမှမကြောက်လို့ ကရင်ပြည်နယ်မှာ ထောင်မှူးလာလုပ်တာကွဆိုပြီး အော်ပြောခဲ့တယ်” လို့ Hpa-an News မှာ ဖော်ပြထားပါတယ်။

အခုလို နိုင်ငံရေးအကျဉ်းသားတွေကို ထောင်ပြောင်းရွှေ့တာဟာ ပြီးခဲ့တဲ့လတွေအတွင်းက အကျဉ်းထောင်တွင်းမှာ နိုင်ငံရေးအကျဉ်းသားတွေဟာ ဆန္ဒဖော်ထုတ်မှုတွေရှိခဲ့လို့ ထောင်ပြောင်းရွှေ့ရခြင်းဖြစ်တယ်လို့ အကျဉ်းထောင်နဲ့နီးစပ်သူတွေရဲ့ပြောကြားချက်အရ သိရပါတယ်။

ဘားအံအကျဉ်းထောင်မှာ ပြီးခဲ့တဲ့ ဧပြီလအတွင်းမှာ နှစ်ကြိမ်တိုင်တိုင် နိုင်ငံရေးအကျဉ်းသားတွေ ဆန္ဒဖော်ထုတ်တာတွေရှိခဲ့ပြီး ဆန္ဒဖော်ထုတ်ခဲ့တဲ့ နိုင်ငံရေးအကျဉ်းသားတချို့ကို တိုက်ပိတ်မှုတွေလုပ်ဆောင်ခဲ့ကာ အခုအခါမှာတော့ ထောင်ပြောင်းရွှေ့တာမျိုးတွေ လုပ်ဆောင်ခဲ့တာဖြစ်ပါတယ်။