စစ်ကောင်စီထောက်တိုင်များကို ဆက်လက်ဖမ်းဆီးသွားမည်ဖြစ်၍ ကျန်နေသူများ ပြည်သူ့ဘက်အမြန်ဆုံးရပ်တည်ကြရန် သတိပေး
ကရင်နီပြည်နယ်အတွင်း လက်ရှိဖမ်းဆီးထိန်းသိမ်းထားသည့် အကျဉ်းသား ၁၂၆ ဦးအနက် နိုင်ငံတကာအဖွဲ့များ၏ တောင်းဆိုမှု၊ လူသားချင်း စာနာထောက်ထားမှုနှင့် အကျဉ်းသားများ၏ ခံဝန်ကတိများကြောင့် အကျဉ်းသား ၂၄ ဦးကို ခံဝန်ကတိဖြင့် လွတ်ငြိမ်းချမ်းသာခွင့်ပေးလိုက်ကြောင်း ကရင်နီပြည်နယ်အတိုင်ပင်ခံကောင်စီ (KSCC)က ထုတ်ပြန်သည်။
“ထိန်းသိမ်းထားတဲ့သူတွေက တော်တော်များတယ်။ ၁၂၅ ယောက်လောက်ရှိတယ်လေ။ အဲဒီထဲမှာမှ စစ်ကောင်စီရဲ့ လက်ပါးစေတွေ၊ ထောက်တိုင် ဒလန်တွေ၊ နောက်ပြီး မူးယစ်ဆေးဝါးမှုတွေ မုဒိမ်းမှုတွေ နောက်လူသတ်မှု အများကြီးရှိတယ် ။အဲဒီ ကြားထဲမှာမှ အမှုအပေါ့ဆုံးသူတွေပေါ့။ သံသယမှုနဲ့ ဖမ်းဆီးထိန်းချုပ်ထားတဲ့သူတွေ ပြန်လွှတ်မယ် အဲဒီလိုပေါ့”ဟု KSCC ပြောရေးဆို ခွင့်ရှိသူက ပြောကြားသည်။
ယခင်ကာလများတင် ဖမ်းဆီးထိန်းသိမ်းခြင်းခံရသူများထဲမှ တရုတ်နိုင်ငံသား ၄ဦး အပါအဝင် အကျဉ်းသားအချို့ကိုလည်းပြန်လည် လွှတ်ပေးပြီးဖြစ်သည်ဟုလည်း အသိပေးထားသည်။
Public Service Announcement
ပြည်သူလူထု၏ အသက်အိုးအိမ် ကာကွယ်စောင့်ရှောက်ရေး နယ်မြေထိန်းချုပ်ရေးနှင့် တရားဥပဒေ စိုးမိုးရေးအတွက်အကြမ်းဖက် စစ်ကောင်စီများ၏ ထောက်တိုင်များဖြစ်သည့် စစ်ကောင်စီ ထောက်လှမ်း ရေးတပ်များ၊ စစ်ကောင်စီဒလန်များ၊ စစ်ကောင်စီတပ်ဖွဲ့ဝင်များ၊ စစ်ကောင်စီရဲများ ၊ စစ်တပ်၏ အကြမ်း ဖက်မှုကို ထောက်တိုင်အဖြစ် ပါဝင်နေသူမှန်သမျှ နှင့် အခြားရာဇဝတ်မှု ကျူးလွန်သူများကို ကရင်နီပြည် နယ်ရှိ ကရင်နီပြည်နယ်ရဲဌာန ၊ ပြည်သူ့ကာကွယ်ရေးတပ်များနှင့် တိုင်းရင်းသားလက်နက်ကိုင် အဖွဲ့အစည်း တို့သည် ဆက်လက် ဖမ်းဆီးထိန်းသိမ်းသွားမည် ဖြစ်ကြောင်း ထုတ်ပြန်သည်။
သို့ဖြစ်၍ ကရင်နီပြည်နယ်အတွင်းရှိ အကြမ်းဖက်စစ်ကောင်စီထောက်တိုင်အဖြစ် ပါဝင်ပတ်သက်နေသူများအနေဖြင့် အမြန်ဆုံးသိရှိပြင်ဆင်ပြီး ပြည်သူ့အစိုးရ၊ ပြည်သူ့ တပ်ဖွဲ့များနှင့် ဘက်ပြောင်းပူးပေါင်း ကြပါရန် တိုက်တွန်းကြောင်း ဖော်ပြထားသည်။
“စစ်ကောင်စီဘက်ကို ရပ်တည်နေသေးတဲ့သူတွေအနေနဲ့ ပြည်သူနဲ့ တသားတည်း ရပ်ဖို့လိုတာပေါ့။ အဲဒါကြောင့် အမြန်ဆုံးအဲဒါကို သိရှိနားလည်ပြီးတော့မှ ဘက်ပြောင်းလာဖို့ အရေးကြီးတာပေါ့”ဟု KSCC တာဝန်ရှိသူက ပြောသည်။
ကရင်နီပြည်နယ်တွင် ဒေသခံတိုင်းရင်းသားလက်နက်ကိုင်တပ်များ၊ ပြည်သူ့ကာကွယ်ရေးတပ်များ ပူးပေါင်းပြီး စစ်ကောင်စီတပ်ကို ခုခံတိုက်ခိုက်မှုများ ပြုလုပ်ခဲ့ရာ တိုက်ပွဲများပြင်းထန်ခဲ့သည်။ တိုက်ပွဲများ၌ နှစ်ဖက်ကျဆုံးထိခိုက်မှုရှိခဲ့သော်လည်း စစ်ကောင်စီတပ်က သေဆုံးထိခိုက်မှု အလွန်များပြားခဲ့သည်။
