ကေအဲန်ယူ-ဒူးသထူခရိုင် တပ်မဟာ ၁ နယ်မြေ ဘီးလင်းမြို့နယ်အတွင်းမှာ စစ်ကောင်စီတပ်ရဲ့ နယ်မြေကျူးကျော်စစ်ရေးလှုပ်ရှားမှု (၁၅)ရက်ကာလအတွင်း ဒေသခံ(၂၀)ကျော်ကို ပေါ်တာနဲ့ လူသားဒိုင်းအဖြစ် ဖမ်းဆီးခေါ်ဆောင်ခဲ့တယ်လို့ ကေအဲန်ယူက သတင်းထုတ်ပြန်ပါတယ်။
စစ်ကောင်စီရဲ့ တပ်မ(၄၄)လက်အောက်ခံတပ်တွေဟာ ပြီးခဲ့တဲ့ ဇွန်လ(၁၇)ရက်ကနေ ဇူလိုင်(၁)ရက်နေ့အထိ ကေအဲန်ယူ-ဘီးလင်းမြို့နယ်ထဲကို နယ်မြေကျူးကျော်စစ်ရေးလှုပ်ရှားမှုပြုလုပ်ခဲ့ပြီး ဒေသခံရွာသား(၂၂)ဦးကို စစ်ကြောင်းတစ်လျှောက် ပေါ်တာထမ်းဖို့နဲ့ လူသားဒိုင်းအဖြစ် အသုံးပြုဖို့ ဖမ်းဆီးခေါ်ဆောင်ခဲ့ကာ လူထုရဲ့ ငွေကြေးနဲ့ပစ္စည်းတွေကို ခိုးယူ၊ စားသုံး၊ ဖျက်ဆီးမှုတွေ ကျူးလွန်ခဲ့ကြတယ်လို့ ထုတ်ပြန်ချက်မှာဖော်ပြထားပါတယ်။
အဆိုပါစစ်ကောင်စီတပ်မ(၄၄)တပ်ဟာ စစ်ကြောင်းတစ်လျှောက် တွေ့သမျှလူတွေကို ဖမ်းဆီးခေါ်ဆောင်မှုတွေကြောင့် ကော်ဟဲကျေးရွာက အသက်(၁၃)နှစ်အရွယ် ကျောင်းသားကလေးတစ်ဦးအပါအဝင် ဒေါဇံကြီး၊ တောင်လွဲ၊ ကြိုးဝိုင်း၊ ဘောနော်နီ၊ မြစ်ကြိုး၊ မူးဒေး၊ လေးကေ့၊ မော်တိုခီး၊ မင်းစော၊ ကော်ဟဲစတဲ့ ကျေးရွာတွေက ရွာသား (၂၂)ဦးဟာ ဖမ်းဆီးခံခဲ့ရတာပါ။
စစ်ကောင်စီတပ်က ဒေသခံပြည်သူလူထုပိုင်ဆိုင်တဲ့ ငွေကြေးနဲ့ ပစ္စည်းတန်ဖိုး ငွေကျပ် သိန်း(၈၀)ကျော်အပါအဝင် အိမ်မွေးတိရိစ္ဆာန်တွေ၊ ဆန်ဆီအိုးခွက်ပန်းကန်တွေ၊ အဝတ်အထည်တွေ၊ ဖုန်းနဲ့ အခြားဆက်စပ်ပစ္စည်းမျိုးစုံကို သယ်ဆောင်သွားခဲ့တယ်လို့ ထုတ်ပြန်ချက်မှာပါရှိပါတယ်။
Public Service Announcement
ကေအဲန်ယူ-ဘီးလင်းမြို့နယ်အတွင်း ကျူးကျော်ဝင်ရောက်လာတဲ့ စစ်ကောင်စီတပ်ဟာ တပ်ရင်း(၃)ရင်းပါဝင်တဲ့ တပ်မ(၄၄)လက်အောက်ခံတပ်လို့သိရပြီး နယ်မြေခံ KNLA KNDO ပူးပေါင်းတပ်တွေနဲ့ ထိတွေ့ပစ်ခတ်မှု ၈ ကြိမ်တိတိရှိခဲ့ကာ စစ်ကောင်စီရဲ့လက်နက်ကြီးပစ်ခတ်မှုတွေကြောင့် လူနေအိမ်(၈)လုံး ထိမှန်ပျက်စီးသွားခဲ့တယ်လို့ ကေအဲန်ယူရဲ့ထုတ်ပြန်ချက်အရ သိရပါတယ်။
