ပုလောမြို့နယ်တိုက်ပွဲတွင် PDFတပ်ခွဲမှူးတစ်ဦးနှင့်KNDO တပ်စိတ်မှူးတစ်ဦးကျဆုံး

ပုလောမြို့နယ်အတွင်းယနေ့တိုက်ပွဲတွင် ပြည်သူ့ကာကွယ်ရေးတပ်ဖွဲ့မှတပ်ခွဲမှုးတစ်ဦးနှင့် KNDO တပ်စိတ်မှုးတစ်ဦးကျဆုံးခဲ့​ကြောင်းသိရသည်။

ပုလောမြို့နယ် ပြည်သူ့ကာကွယ်ရေးတပ်ဖွဲ့၊ KNDOပူးပေါင်းမဟာမိတ်တပ်ဖွဲ့နှင့် စစ်ကောင်စီတပ်သည်ပုလောမြို့နယ်ပဝတ်ကုန်းရွာတွင်ယနေ့(ဇူလိုင် ၁၃ရက်)နံနက်နာရီခန့်ကစ၍တိုက်ပွဲဖြစ်ပွားခဲ့သည်။

စစ်ကောင်စီတပ်ကလက်နက်အင်အားအသာဖြင့်တိုက်ခိုက်ခြင်းကို ခံခဲ့ရသည်ဟု မြိတ်ခရိုင်၊ပြည်သူ့ကာကွယ်ရေးတပ်မတော်မှ တာဝန်ရှိသူတစ်ဦးက People’s Spring သို့ပြောသည်။

“ကိုယ့်လူဘက်က သုံး ယောက်ထိခဲ့တယ်။သုံးယောက်မှာ နှစ် ယောက်ကျဆုံးတယ်။ တစ်ဦးအခြေနေမသိရသေးဘူး။ရန်သူ့စနိုက်ပါနဲ့ပစ်ခံထိတာ” ဟု ၎င်းကဆက်ပြောသည်။

Public Service Announcement

ကျဆုံးသူနှစ်ဦးမှာ ပုလောမြို့နယ် ပြည်သူ့ကာကွယ်ရေးတပ်ဖွဲ့၊တပ်ခွဲ (၃ )မှတပ်ခွဲမှူးကောင်းဆက်ဇော် (ခ) စော်ဘွားနှင့် KNDO တက်မဟာ (၄) တပ်ရင်း (၇) တပ်ခွဲ (၂) မှ တပ်စိတ်မှူး ဗိုလ်ဖအေး(ခ) ကော့လ်ဖတ် တို့ဖြစ်သည်။

တိုက်ပွဲတွင် စစ်​ကောင်စီတပ်မှ​သေဆုံး၊ဒဏ်ရာရမှုအ​ခြေအ​နေကိုမသိ့ရ​သေး​ကြောင်းလည်းသိရသည်။

စစ်အာဏာရှင်တော်လှန်ရေးရေးတွင် ပြည်သူ့ကာကွယ်ရေးရဲဘော်များနှင့် လူထုနှင့်တသားတည်းရပ်တည်သည့်တိုင်းရင်းသားလက်နက်ကိုင်အဖွဲ့- EAOများက ဆက်လက်တိုက်ပွဲဝင်နေမည်ဖြစ်ပြီး ပြည်သူလူထုက နည်းမျိုးစုံ ကူညီထောက်ပံ့ပေးရန် တနင်္သာရီစစ်ဒေသခွဲ၊ကွပ်ကဲရေးအဖွဲ့ဝင်တစ်ဦးက တိုက်တွန်းသည်။

“တော်လှန်ရေးမှာတော့ဒီလိုပေးဆပ်ရမှုတွေကမလွှဲမရှောင်သာ ရှိနေမှာပါ။အသက်ပေးတိုက်ပွဲဝင်နေတဲ့ ရဲဘော်တွေအတွက် ပြည်သူတွေကလဲ တတ်နိုင်တဲ့ဖက်ကနေ ဝိုင်းပြီး ကူညီလုပ်ဆောင်ပေးဖို့ တိုက်တွန်းပါတယ်”ဟု ၎င်းကပြောသည်။

ပုလောမြို့နယ်တွင် ယမန်နေ့(ဇူလိုင် ၁၂ ရက်)ကဖြစ်ပွားခဲ့သည့် တိုက်ပွဲအတွင်း စစ်ကောင်စီဘက်မှ ၇ ဦးသေဆုံးခဲ့သည်ဟု မြိတ်ခရိုင်၊ပြည်သူ့ကာကွယ်ရေးတပ်မတော်က သတင်းထုတ်ပြန်ထားသည်။ ဇူလိုင်၉ ရက်က တိုက်ပွဲတွင် ပြည်သူ့ရဲဘော်တစ်ဦး ကျဆုံးခဲ့သည်။