ပုဂ္ဂလိကပြည်ပအ​ကြွေးများကို​ လတ်တ​​​​လောမဆပ်ကြရန် စစ်​ကောင်စီဗဟိုဘဏ်ညွှန်ကြား

●ပြည်ပအ​ကြွေးမဆပ်ကြ​သေးရန်ညွန်ကြားမှုမျိုးယခင်မကြုံဖူးဟု လုပ်ငန်းရှင်များ​ပြော၊ ၁၉၈၈​​နောက်ပိုင်းပထမဆုံးဖြစ်

ပြည်တွင်းနေပြည်သူများ၏ပြည်ပကြွေးမြီများကိုလတ်တလောပြန်လည်ပေးဆပ်ခြင်းမပြုဘဲ ဆိုင်းငံ့ထားရမည်ဟု စစ်ကောင်စီထိန်းချုပ်ထားသည့် ဗဟိုဘဏ်က ဇူလိုင် ၁၃ ရက် ရက်စွဲဖြင့် ယနေ့ထုတ်ပြန်လိုက်သည်။

ပြည်တွင်း၌ နေထိုင်သူများက ပြည်ပမှ ငွေသားဖြင့်ဖြစ်စေ၊ ပစ္စည်းဖြင့်ဖြစ်စေရယူထားသည့်ပြည်ပကြွေးမြီများ၏အတိုးနှင့်အရင်းများကို ပြန်လည်ပေးဆပ်ခြင်းကို လတ်တလော ဆောင်ရွက်ခြင်းမပြုရဟု စစ်ကောင်စီက ထိန်းချုပ်လိုက်ခြင်းဖြစ်သည်။

ထိုသို့ဆိုင်းငံ့ရန် ဘဏ်များအနေဖြင့် ပြန်လည်ပေးဆပ်ရမည့်အစီအစဉ်ကို အကြွေးရှင်များဖြစ်သည့် ပြည်ပကုမ္ပဏီနှင့်အဖွဲ့အစည်းများကို ညှိနှိုင်းဆောင်ရွက်ပေးရမည်ဟုလည်း စစ်ကောင်စီကဆိုသည်။

ထိုအပြင်လိုအပ်သည့် ပြင်ဆင်ဆောင်ရွက်မှုများကိုလည်း ထပ်ဆင့်အကြောင်းကြားပေးမည်ဟု စစ်ကောင်စီ ဗဟိုဘဏ်ကဆိုထားသည်။

Public Service Announcement

“ရှင်းရှင်းပြောရရင် ပြည်ပအကြွေးတွေကိုမဆပ်ခိုင်းတာပေါ့။ အစိုးရတော့မသိဘူး။ပုဂ္ဂလိကလုပ်ငန်းတွေကိုမဆပ်ခိုင်းတာ။ ဒါကကုမ္ပဏီတွေအတွက်ပြသာနာရှိတယ်”ဟု ရန်ကုန်အခြေစိုက်စီးပွားရေးလုပ်ငန်းရှင်တစ်ဦးကပြောသည်။

လက်ရှိတွင် ပြည်တွင်း၌ ဒေါ်လာရှားပါးလာခြင်းကြောင့် ယခုလို ပုဂ္ဂလိက လုပ်ငန်းများကိုအကြွေးမဆပ်ရန်တားမြစ်လိုက်ခြင်းဖြစ်သည်ဟု ၎င်းကဆက်​ပြောသည်။

ထိုလုပ်ရပ်သည် ပြည်တွင်းကုမ္ပဏီများကို ပြည်ပချေးငွေပေးသည့် ကုမ္ပဏီများက ကယုံကြည်မှုပျက်ယွင်းသွားနိုင်သည်ဟု ၎င်းကသုံးသပ်သည်။

ပုဂ္ဂလိကကို အ​ကြွေးမဆပ်ရန် အစိုးရဟုအမည်ခံထား​​​သောအဖွဲ့အစည်းကညွှန်ကြားသည်မျိုးယခင်က မကြုံဖူး​ကြောင်းလုပ်ငန်းရှင်အချို့က​ပြောသည်။

ပြည်ပမြီရှင်များကို ပုဂ္ဂလိကပြည်တွင်းလုပ်ငန်းရှင်များက ​ကြွေးမြီမ​ပေးဆပ်နိုင်ခြင်းသည် ၁၉၈၈​နောက်ပိုင်းတွင်ပထမဦးဆုံးဖြစ်သည်။

မြန်မာသမိုင်းတွင် ပြည်ပ​​ကြွေးမြီများပြန်လည်မ​ပေးဆပ်နိုင်​တော့​ကြောင့် ၁၉၈၇ခုနှစ်တွင် LDC(ဖွံဖြိုးမှုအနည်းဆုံးနိုင်ငံ) အဖြစ် အာဏာရှင်ဟောင်းဗိုလ်ချုပ်နေဝင်းလက်ထက်တွင်သတ်မှတ်ခံခဲ့ဖူးသည်။

လက်ရှိကာလတွင်ပြည်တွင်း ပြင်ပ​ဈေးကွက်တွင်ဒေါ်လာဈေးဆက်တိုက်တက်​နေပြီး တစ်ဒေါ်လာကို ၂၂၀၀ကျပ်အထိ ပေါက်ဈေးရှိလာသည်။