စစ်တပ်အာဏာသိမ်းပြီး တစ်နှစ်ကျော်ကာလအတွင်း မြန်မာနိုင်ငံမြောက်ပိုင်းမှာ မြေရှားသတ္တု တူးဖော်ရေးလုပ်ငန်းတွေ အလျင်အမြန်ကြီးထွားလာနေပြီး စင်ကာပူနိုင်ငံအကျယ်အဝန်းလောက်ရှိတဲ့ နယ်မြေမှာ တူးဖော်ရေးတွေကို လုပ်ကိုင်နေကြတယ်လို့ Global Witness က သြဂုတ်လ ၉ ရက်မှာအစီရင်ခံစာထုတ်ပြန်လိုက်ပါတယ်။
ဒီအစီရင်ခံစာကို သဘာဝပတ်ဝန်းကျင်အရေးလေ့လာစောင့်ကြည့်နေတဲ့ ဗြိတိန်နိုင်ငံအခြေစိုက် Global Witness အဖွဲ့ဟာ တရုတ်နယ်စပ်တလျောက်က မြန်မာဘက်ခြမ်းကို ၆ လကြာ လေ့လာစောင့်ကြည့်စုံစမ်းဖော်ထုတ်ပြီး နောက် ထုတ်ပြန်လာတာပါ။
လွန်ခဲ့တဲ့ နှစ်အနည်းငယ်က ဝေလံခေါင်သီတဲ့ မြန်မာနိုင်ငံ အရှေ့မြောက်ပိုင်း တရုတ်နယ်စပ်တလျောက် မှာ မြေရှားသတ္တုလုပ်ကွက်အနည်းငယ်သာရှိပေမယ့် ဒီနှစ် မတ်လအတွင်း ဂြိုလ်တုကနေ ရိုက်ကူးရရှိတဲ့ပုံတွေအရ စင်ကာပူနိုင်ငံ တစ်ခုစာလောက် အကျယ်အဝန်းရှိတဲ့နေရာမှာ တူးဖော်ရေးလုပ်ကွက်ပေါင်း ၂၇၀၀ ကျော် ထိ တွေ့ရှိရတယ်လို့ Global Witness က ဆိုထားပါတယ်။
အခုလို သယံဇာတကို အကြီးအကျယ်တူးဖော်နေတာဟာ သဘာဝပတ်ဝန်းကျင်ကိုထိခိုက်ပျက်စီးစေပြီး တူးဖော်ရေးလုပ်ငန်းတွေရဲ့စွန့်ပစ်ပစ္စည်းတွေကြောင့် ဒေသခံတွေရဲ့ကျန်းမာရေးဆိုင်ရာပြဿနာတွေလည်းရှိနေပါတယ်။
Public Service Announcement
Global Witness ရဲ့ ဖော်ပြချက်အရ မြေရှားသတ္တုတူးဖော်ရေးဟာ စစ်ကောင်စီအပါအဝင် စစ်အုပ်စုနဲ့ ဆက်နွယ်နေတဲ့ ပြည်သူ့စစ် ခေါင်းဆောင်တွေ အတွက် အကျိုးစီးပွားဖြစ်ထွန်းနေတယ်လို့သိရပါတယ်။
အဓိက ဝယ်လက်ကတော့ တရုတ်နိုင်ငံဖြစ်ပြီး မြန်မာနိုင်ငံဟာကမ္ဘာပေါ်မှာ မြေရှားသတ္တု အများဆုံးတင်ပို့တဲ့နိုင်ငံဖြစ်လာပါတယ်။
မြေရှားသတ္တုကို လျှပ်စစ်ကားတွေ ၊ စမတ်ဖုန်းတွေ ၊ လျှပ်စစ်လေရဟတ်တွေအပါအဝင် လျှပ်စစ်ပစ္စည်းတွေမှာ အသုံးပြုတာဖြစ်ပါတယ်။
