အဆိုပါပိုက်လိုင်းသည် စစ်ကောင်စီတပ်စီးပွားရေးလုပ်ငန်းများသို့ ပို့လွှတ်နေ ခြင်းဖြစ်
ထားဝယ်ခရိုင်၊ ရေဖြူမြို့နယ်၊ ကံပေါက်ဒေသရှိ မြန်မာ့ရေနံနှင့် သဘာဝ ဓာတ်ငွေ့လုပ်ငန်း MOGE ပိုင် ကံပေါက် – သာကေတသွယ်တန်းထားသော ဓာတ်ငွေ့ပိုက်လိုင်းကို နှစ်ကြိမ်မိုင်းခွဲ တိုက်ခိုက်ခဲ့ကြောင်း ကံပေါက်ပြည်သူ့ ကာကွယ်ရေးတပ်ဖွဲ့(KBDF)က ယနေ့(သြဂုတ် ၁၀) ထုတ်ပြန်သည်။
ယနေ့နံနက် ၅ နာရီ ၄၀မိနစ်ခန့်တွင် MOGE ပိုင်ပိုက်လိုင်းအား အိန္ဒရာဇာရွာနှင့် ဆင်ကူးရွာ အကြားတွင် တစ်ကြိမ် ၊ နံနက် ၈ နာရီ ၄၀ ခန့်တွင် နတ်ကြီးစင်နှင့် စိန်ဘုံရွာအကြားတွင် တစ်ကြိမ် စုစုပေါင်းနှစ်ကြိမ် ဖောက်ခွဲတိုက်ခိုက်ခဲ့ပြီး ယင်းတိုက်ခိုက်မှုကို KBDFနှင့် ထား၀ယ်ပြည်သူ့ လွတ်မြောက်ရေးတပ်ဖွဲ့ -TPLF တို့ ပူးပေါင်းလုပ်ဆောင်ခဲ့ကြောင်း ဖော်ပြသည်။
“ကံပေါက်မှ သာကေတသို့ သွယ်တန်းထားသော MOGE ပိုက်လိုင်းသည် မြိုင်ကလေး ဘိလပ်မြေ စက်ရုံ အစရှိသည့် စစ်တပ်ပိုင် စီးပွားရေးလုပ်ငန်းများ လည်ပတ်ရေးအတွက် စွမ်းအင်ထောက်ပံ့ပေး နေသည့် အရင်းအမြစ်ဖြစ်သည့် အတွက် မိမိတို့အနေဖြင့် ပစ်မှတ်ထား တိုက်ခိုက်ခြင်း ဖြစ်သည်”ဟု KBDF က ဆိုသည်။
ထို့အပြင် မြန်မာ့ရေနံနှင့် သဘာ၀ဓါတ်ငွေ့လုပ်ငန်း MOGE ကံပေါက်ရုံးခွဲအား ဩဂုတ် ၃ ရက် နံနက် ၃ နာရီ ၄၀ ခန့်တွင် မိုင်းခွဲတိုက်ခိုက်ခဲ့သေးသည်။
Public Service Announcement
MOGEသည် အကျင့်ပျက်ချစားမှုနှင့် ညံ့ဖျင်းသော စီမံအုပ်ချုပ်မှုတို့ကြောင့် တိုင်းပြည်ဘဏ္ဍာအား လေလွင့်ဆုံးရှုံးစေပြီး နာမည်ဆိုးဖြင့် ကျော်ဇောသည့် နိုင်ငံပိုင်စီးပွားရေးလုပ်ငန်းတစ်ခုဖြစ်ပြီး ခေတ်အဆက်ဆက် စစ်အာဏာရှင် များ၏ အဓိက နိုင်ငံခြားဝင်ငွေရလမ်းလည်း ဖြစ်သည်။
၂၀၂၁အာဏာသိမ်းမှုအပြီး အကြမ်းဖက် စစ်ကောင်စီမှ ကျူးလွန်ခဲ့သော စစ်ရာဇဝတ်မှုများအတွက် ဘဏ္ဍာငွေရှာဖွေပေးနေသည့် အဓိကကြသော ဌာနတစ်ခုဖြစ်သည်။
