ရဲကွန်မန်ဒိုဆိုတဲ့စစ်ကြောင်း မြင်းခြံနယ်မှာ ပြည်သူတွေရဲ့လုံချည်၊ထဘီတွေပါမချန် ခိုးယူ​နေ

စက်တင်ဘာ-၂၅၊၂၀၂၆။ကတ်သရင်း/ People’s Spring

မန္တလေးတိုင်း၊မြင်းခြံမြို့နယ်ကို ရဲကွန်မန်ဒိုဆိုပြီး စစ်ကြောင်းထိုးလာတဲ့စစ်တပ်လက်​အောက်ခံလက်နက်ကိုင်အဖွဲ့​တွေဟာ ပြည်သူ​တွေရဲ့နေအိမ်တွေက အင်္ကျီ၊လုံချည်၊ထဘီ တွေကိုပါခိုးယူနေတာမို့ စစ်ဘေးရှောင်ပြည်သူတွေအခက်အခဲဖြစ် နေတယ်လို့ ​ဒေသခံပြည်သူ​တွေ နဲ့ မြင်းခြံမြို့နယ်၊ပြည်သူ့ကာကွယ် ရေးအဖွဲ့(ပကဖ)က ပြောပါတယ်။

စက်တင်ဘာလ၁၅ ရက်ကစပြီး နွားထိုးကြီးမြို့နယ်ဘက်ကနေ မြင်းခြံမြို့ကို အင်အား ၄၀၀ ခန့်နဲ့ ရဲကွန်မန်ဒိုဆိုတဲ့ရဲ​တွေ ၊စစ်သား​တွေစစ်ကြောင်းထိုးလာတာဖြစ်ပါတယ်။

အဲဒီစစ်ကြောင်းတွေလာလို့ ထွက်​ပြေးတိမ်း​ရှောင်​​နေတဲ့ ပြည်သူ​တွေရဲ့နေအိမ်တွေက အဝတ်အစား၊ထဘီ၊အင်္ကျီ တွေပါမချန်​တွေ့သမျှ အဖိုးတန်မယ်ထင်တဲ့ပစ္စည်းတွေကို ကား၊ဆိုင်ကယ်တွေနဲ့ ခိုးယူသယ်​ဆောင်​နေတာလို့ ​ဒေသခံ​တွေနဲ့​တော်လှန်​ရေးရဲ​ဘော်အချို့က​ပြောပါတယ်။အဲလိုခိုးယူလာတဲ့ ပစ္စည်း​တွေကို နောက်ချန်စစ်တပ်က နွားထိုး-မြင်းခြံလမ်းပိုင်းအထိ ကားအကြီး ‌တွေနဲ့လာသယ်တာတွေလုပ် နေတယ်လို့ ​ဒေသခံအချို့က​ပြောပါတယ်။

Public Service Announcement

“ပြည်သူ တွေက ရုတ်တရက်ထွက် ပြေးရတော့ အရေးကြီးတာတွေပဲယူကြရတာပေါ့။အဲဒီတော့ ဒီအဝတ် တွေ ဘာ တွေကျန်တာ ပေါ့။အဲတာကိုတောင်မချန်အကုန်သယ် နေတာ။ဒီအချိန်က မိုးရာသီ‌ဆို တော့ စစ်ရှောင် တွေက ဒုက္ခရောက်တာပေါ့။စားနပ်ရိက္ခာ၊ဆေးဝါး၊အဝတ်အထည်ကအစ။ဒီကြားထဲ တောထဲက စစ်ရှောင်တွေရှိတဲ့နေရာ တွေကိုပါ ကင်းထောက် ဒရုန်းနဲ့ဝဲပြီး စစ်တပ်က ဗုံးလိုက်ကြဲ သေးတယ်”လို့ မြို့နယ်ပကဖ သတင်းပြန်ကြား ရေးတာဝန်ခံက ပြောပါတယ်။

စစ်​ကြောင်းထိုးတဲ့ရွာ​တွေက ပြည်သူ​တွေစု​ပေါင်းဝယ်ယူထားတဲ့ မီးစက်​တွေကိုပါ စစ်တပ်စစ်​ကြောင်း​တွေက ဖြုတ်ပြီးခိုးယူတယ်လို့ ​ဒေသခံ​တွေကလည်း​ပြောပါတယ်။

လက်ရှိ အဲဒီစစ်ကြောင်းတွေဟာကံစွယ်၊သင်ပြွန်း၊ပျိုးကန် ရွာတို့ကိုရောက် နေတယ်လို့သိရပါတယ်။

“​ရွာ​တွေက တွေ့သမျှအကုန်ယူတာ။ပြီးရင်ကား​တွေနဲ့ တိုက်သယ်သွားတာ”လို့ မြင်းခြံမြို့နယ်ရှိ​ကျေးရွာတရွာက ပြည်သူတဦးက​ပြောပါတယ် ။ဒါအပြင် ​စစ်​ကြောင်းထိုးတဲ့ရွာ​တိုင်းနီးပါးကိုလည်း မီးရှို့ဖျက်ဆီးတယ်လို့​​ဒေသခံ​တွေက​ပြောပါတယ် ။

ဒါ့အပြင်​စစ်​ကြောင်းနဲ့တွေ့တဲ့ ဒေသခံတချို့ကို ဖမ်းဆီးရိုက်နှက်တာ ၊ဖုန်းတွေသိမ်းယူတာ တွေလည်းလုပ်တယ်လို့ သိရပါတယ်။

မြင်းခြံမြို့နယ်မှာ စစ်ကြောင်းတွေ ဆက်တိုက်ထိုး နေတာမို့ ကာလရှည်စစ် ရှောင်ပြည်သူ တွေလည်းရှိ​​တေပြီး အခက်အခဲ‌‌ဖြစ် နေတာကြောင့် ပြည်သူတွေအနေနဲ့ စစ်​ရှောင်ပြည်သူ​တွေကိုနိုင်တာ ဝိုင်းဝန်းကူညီထောက်ပံ့ ပေးကြဖို့လည်း မြို့နယ်ပကဖ သတင်းတာဝန်ခံက ​​မေတ္တာရပ်ခံပါတယ်။

စစ်တပ်က မြင်းခြံ မြို့နယ်ကို မြေပြင်ထိုးစစ်တင်မကဘဲ လေကြောင်း၊လက်နက်ကြီး တွေပါပစ်ခတ် နေပြီး စက်တင်ဘာလ၂၃ ရက်နေ့က ခလရ (၁၅)က နေ လက်နက်ကြီးနဲ့ ပစ်ခတ်ခဲ့တာမှာ ဘကကျောင်းက KGကလေးငယ်တဦး သေဆုံးပြီး ၂ဦး ဒဏ်ရာပြင်းထန်ရခဲ့ပါတယ်။