ဇူလိုင် ၁၂၊ ၂၀၂၆။ တာရာ/People’s Spring
ရန်ကုန်မြို့၊ သာကေတမြို့နယ်က ကျောက်တိုင်မှတ်တိုင်အနီးမှာ ဇူလိုင် ၁၁ရက်ညပိုင်းက လူငယ် ၁ဦးကို စစ်သားတွေက ရိုက်နှက်ဖမ်းဆီးခေါ်ဆောင်သွားတယ်လို့ မျက်မြင်တွေ့ရှိသူတွေက ပြောပါတယ်။
အဆိုပါလူငယ်ဟာ စက်ရုံအလုပ်သမားဖြစ်ပြီး နေအိမ်ကိုပြန်ဖို့ ကားမှတ်တိုင်အလာ အိမ်စီးကားနဲ့စောင့်ဆိုင်းနေတဲ့ စစ်သားတွေက ဖုန်းယူစစ်ပြီး ဖမ်းဆီးသွားတာဖြစ်တယ်လို့ သိရပါတယ်။
” အချိန်က ၇ နာရီလောက်ရှိမယ်။ စက်မှုဇုန်ထဲကနေ ထွက်လာတာ။ Capital ဘက်ကိုလမ်းလျှောက်လာတာ။ ဟိုကောင်တွေက အိမ်စီးကားနဲ့ကျောက်တိုင်နားမှာ အမြဲတမ်းရှိတယ်။ အဲဒီကောင်လေးက သားကောင်ဖြစ်သွားတာပေါ့။ ဖုန်းကိုယူစစ်ပြီး ဆွဲတင်တာကားပေါ်ကို။ အဲဒီကောင်လေးကရုန်းပြီးအကူအညီတောင်းတော့ ရိုက်နှက်ပြီးကားပေါ်ခေါ်တင်သွားတာ” လို့ ကျောက်တိုင်မှတ်တိုင်အနီးစျေးရောင်းချသူတစ်ဦးက ပြောပါတယ်။
Public Service Announcement
သာကေတကျောက်တိုင်မှတ်တိုင်အနီးမှာ စစ်သားတွေက ဟွန်ဒါဖစ်အဖြူရောင် အိမ်စီးကားနဲ့ အသင့်စောင့်ဆိုင်းနေပြီး လူငယ်တွေကို ဖမ်းဆီးခေါ်ဆောင်နေတာဖြစ်ပါတယ်။
ဖမ်းဆီးခံရတဲ့လူငယ်အများစုဟာ စက်ရုံအလုပ်သမားတေွဖြစ်ပြီး တချို့ကိုတော့ ပိုင်ရှင်က လိုက်လံရွေးထုတ်သလို တချို့ကတော့ စစ်မှုထမ်းအဖြစ်ရောင်းစားခံရတယ်လို့ စုံစမ်းသိရပါတယ်။
စစ်တပ်ဟာ စစ်မှုထမ်းအပတ်စဉ် ၁ခုကို လူဦးရေ ၅,၀၀၀ ခေါ်ယူမယ်လို့ ကြေညာထားပြီး လက်ရှိမှာ အပတ်စဉ် (၂၇)ကို စတင်ခေါ်ယူနေပါတယ်။
