စစ်ကောင်စီတပ်က ရုန်းထွက်ပြီး ပြည်သူ့ရင်ခွင်ခိုလှုံလာသူများကို မိသားစုနှင့် ဆုံဆည်းရေး KNU ကူညီပေး

စစ်ကောင်စီတပ်မှ ရုန်းထွက်ပြီး ကရင်အမျိုးသားအစည်းအရုံး(KNU)ထံခိုလှုံ လာသည့် စစ်ကောင်စီ တပ်ဖွဲ့ဝင်များကို ကျန်မိသားစုဝင်များနှင့်ပြန်လည် ဆုံဆည်းနိုင်ရေး KNUက ဆောင်ရွက်ပေးနေ ကြောင်း Salween Press က ဓာတ်ပုံများနှင့်တကွ ဖော်ပြသည်။

ယခုနှစ် ဇူလိုင်လကုန်ပိုင်းက KNU ထံခိုလှုံလာသည့် စစ်ကောင်စီ၏ တပ်မ(၄၄)လက်အောက်ခံခမရ (၂၀၇) မှ ဒုတပ်ကြပ် ကျော်နိုင်စိုး၏ ကျန်ရှိသည့် မိသားစုဝင်များကို KNUက ခေါ်ယူပေး၍ဩဂုတ် ၁၂ရက်မှစ၍ မိသားစုနှင့်အတူ ဆုံဆည်းနိုင်ခဲ့ပြီဖြစ်သည်ဟု ဆိုသည်။

ဒုတပ်ကြပ်ကျော်နိုင်စိုးသည် မြ၀တီ – ဝေါ်လေ လမ်းအနီး ကော်ဘရာ စစ်ကြောင်းနှင့် တိုက်ပွဲဖြစ် နေသည့် စစ်ကောင်စီတပ်စစ်ကြောင်းမှ တပ်ဖွဲ့ဝင် ဖြစ်ပြီး ဇူလိုင် ၁၆ရက်တွင် စစ်ကောင်စီတပ်က ထွက်ပြေးလာခဲ့ခြင်းဖြစ်သည်။

၎င်းအနေဖြင့် စစ်မတိုက်လိုတော့ကြောင်း ၊ စစ်ကောင်စီခေါင်းဆောင်များသည် ၎င်းတို့ အာဏာတည်မြဲရေးအတွက် အောက်ခြေကို မငဲ့ဘဲလုပ်ဆောင်နေခြင်း ကြောင့် ရှေ့တန်းရောက် စစ်သားများက စစ်ကောင်စီခေါင်းဆောင် မင်းအောင်လှိုင်ကို မကျေနပ်ကြကြောင်း ဒုတပ်ကြပ် ကျော်နိုင်စိုး CDM ပြုလုပ်လာချိန်တွင် ပြောဆိုထားသည်။

Public Service Announcement

ဒုတပ်ကြပ်ကျော်နိုင်စိုး အပါအဝင် ရှေ့တန်းရောက်စစ်သည်များ စစ်ကောင်စီ တပ်မှ ရုန်းထွက်ပြီး KNU ထံ ခိုလှုံလာမှုများစွာရှိခဲ့ပြီး KNU အနေဖြင့်လည်း လာရောက်သူများကို ကောင်းမွန်စွာ ကြိုဆိုလျက်ရှိသည်။