စစ်ကိုင်းတိုင်း၊ ကနီမြို့နယ်၊ ချောင်းမကျေးရွာကို စစ်ကောင်စီတပ် ဝင်ရောက် လာပြီးနောက် အမျိုးသား ငါးဦးအား သတ်ဖြတ်သွားကြောင်း ဒေသခံများက ပြောသည်။
ယမန်နေ့ (သြဂုတ် ၂၆ ရက်)က စစ်ကောင်စီတပ်သည် ကနီမြို့နယ်၊ မုံရွာ-ယာကြီး-ကလေးဝ ကားလမ်းဘေးရှိ ချောင်းမရွာကိုဝင်ရောက်ကာ ဒေသခံအမျိုးသား ငါးဦးကို သတ်ဖြတ်သွားခဲ့ပြီး အခြားသတ်ဖြတ်ခံရသူများလည်း ရှိနိုင်သေးကြောင်း ဒေသခံများက ပြောသည်။
အဆိုပါ အမျိုးသားငါးဦး၏ ရုပ်အလောင်းများကို ချောင်းမ-ကနီ လမ်းခွဲ အနောက်ဘက်တွင် တွေ့ရှိခဲ့ပြီး မည်သူမည်ဝါကိုမူ အတည်မပြုနိုင်သေးဟု နယ်ခံတစ်ဦးက ဆိုသည်။
ထို့အပြင် စစ်ကောင်စီတပ်သည် မုံရွာ-ယာကြီး-ကလေးဝလမ်းတွင် ခရီးသွား ကား (၄)စီး ၊ဆိုင်ကယ် (၂)စီး ကို မီးရှိုဖျက်ဆီးထားခဲ့ကြောင်း ဒေသခံတို့က ပြောသည်။
Public Service Announcement
ယနေ့ နံနက်တွင် ချောင်းမရွာမှ စစ်ကောင်စီတပ်သည် ချောင်းမ-ကနီ လမ်းဘေးရှိ သင့်ဝင်၊ မင်းမ၊ သမင်ခြံရွာများအနီး နှစ်စုခွဲကာ ထိုးစစ်ဆင်နေပြီး ပစ်ခတ်နေသည်။
စစ်ကောင်စီတပ် စစ်ကြောင်းထိုးရာ ကျေးရွာများ၌ မိုးရွာသွန်းလျက်ရှိပြီး ကျေးရွာအုပ်စု(၆)စုမှ ဒေသခံပြည်သူ နှစ်သောင်းကျော် ဘေးလွတ်ရာ ထွက်ပြေးတိမ်းရှောင်နေရကြောင်း ဒေသခံများက ပြောသည်။
