မှတ်ပုံတင်ကြည့်ပြီး အလုပ်ထုတ်၊ အလုပ်မခန့်တဲ့ အလုပ်ရှင်တွေကိုအရေးယူမယ်လို့ NUG သတိပေး

မှတ်ပုံတင်ကိုကြည့်ပြီး အလုပ်ထုတ်တာ၊ အလုပ်မခန့်တာတွေ လုပ်နေတဲ့ အလုပ်ရှင်တွေကို မှတ်တမ်းယူပြီး ထိရောက်တဲ့အရေးယူမှုတွေလုပ်သွားမယ်လို့ NUG အလုပ်သမားဝန်ကြီးဌာနက ဒီနေ့မှာ ထုတ်ပြန်လိုက်ပါတယ်။

စစ်ကိုင်း၊မကွေးနဲ့မန္တလေးတိုင်းအပါအဝင် ပြည်နယ်အချို့က အလုပ်သမားတွေကို ကိုင်ဆောင်ထားတဲ့ မှတ်ပုံတင် ကိုအခြေခံပြီး စစ်ကောင်စီနဲ့ အပေါင်းအပါ လုပ်ငန်းရှင်တွေဟာ လူ့အခွင့်အရေးချိုးဖောက်တာတွေလုပ်နေတယ်လို့ NUG ကဆိုထားပါတယ်။

အဲဒီလိုလုပ်ဆောင်ချက်တွေထဲမှာ အလုပ်ထုတ်တာ ၊အလုပ်မခန့်တာ ၊ စစ်ကောင်စီ ခန့်အုပ်ချုပ်ရေးမှူး တွေ နဲ့ပူးပေါင်းပြီး အဆောင်တွေမှာ ဆက်လက်နေထိုင်ခွင့်မရဖို့ ဖိအားပေးတာ စတဲ့ နည်းလမ်းမျိုးစုံနဲ့ဖိနှိပ်မှုတွေ လုပ်နေတယ်လို့ NUG ရဲ့ထုတ်ပြန်ချက်မှာဖော်ပြထားပါတယ်။

စစ်အာဏာရှင်တော်လှန်ရေးမှာ ရဲရဲဝင့်ဝင့် တိုက်ပွဲဝင်နေကြတဲ့ အလုပ်သမားတွေ အပေါ် ခွဲခြားဆက်ဆံပြီး စစ်အာဏာရှင်စနစ်တည်မြဲစေဖို့ ထောက်တိုင်သဖွယ် ကူညီဆောင်ရွက်ပေးနေတဲ့လုပ်ရပ်တွေကို NUG အလုပ်သမားဝန်ကြီးဌာနက ပြင်းပြင်းထန်ထန်ရှုတ်ချထားပါတယ်။

Public Service Announcement

ခွဲခြားဆက်ဆံခံရတဲ့အလုပ်သမားတွေအနေနဲ့ NUG အလုပ်သမားဝန်ကြီးဌာနကို တိုင်ကြားဖို့နဲ့ အလုပ်သမားအခွင့်အရေးချိုးဖောက်နေတဲ့အလုပ်ရှင်တွေကို မှတ်တမ်းယူပြီးထိထိရောက်ရောက်အရေးယူမယ်လို့ NUG အလုပ်သမားဝန်ကြီးဌာနက အသိပေးထားတာတွေ့ရပါတယ်။