ထားဝယ်-ထီးခီးလမ်းပိုင်းမှာ မဟာမိတ်ပူးပေါင်းအဖွဲ့နဲ့ စစ်ကောင်စီတပ်တို့အကြား မနေ့က ထိတွေ့တိုက်ပွဲဖြစ်ပွားခဲ့ရာ စစ်ကောင်စီဘက်က ဒုရင်းမှူးတစ်ဦးအပါအဝင် (၁၂)ဦးသေဆုံးခဲ့ပြီး အများအပြားဒဏ်ရာရရှိခဲ့တယ်လို့ နွေဦးပြောက်ကျားတပ်ဖွဲ့က သတင်းထုတ်ပြန်ထားပါတယ်။
စက်တင်ဘာ(၆)ရက်နေ့ နေ့လည်(၁၂)နာရီခန့်က ထားဝယ်-ထီးခီးလမ်းပိုင်း ဆာကဆောတပ်မဟာ တပ်ရင်း(၁)နယ်မြေ အမိုးခီးနော်သူးကလိုရွာအနီးမှာ ဗိုလ်ကော်လာဦးဆောင်တဲ့ ကော်သူးလေတပ်မတော်(KTLA)/ Nway Oo Guerrilla Force(နွေဦးပြောက်ကျားတပ်) မဟာမိတ်ပူးပေါင်းအဖွဲ့နဲ့ စစ်ကောင်စီရဲ့ ခလရ(၂၆၅) စစ်ကြောင်းတို့ကြား နှစ်နာရီခန့် ထိတွေ့တိုက်ပွဲဖြစ်ပွားခဲ့တာပါ။
အဆိုပါတိုက်ပွဲမှာ စစ်ကောင်စီဘက်က ဒုရင်းမှူးအဆင့်ရှိသူတစ်ဦး အပါအဝင် (၁၂)ဦး သေဆုံးသွားခဲ့ပြီး အများအပြား ထိခိုက်ဒဏ်ရာရရှိခဲ့ကာ ၄၀ မမ ဗုံးပစ်လောင်ချာအပါအဝင် MA-3 သေနတ်လေးလက်၊ ၄၀ မမ ဗုံးသီး(၁၁)လုံး၊ ကျည်ဘောက်(၈)ခု၊ ပစ္စတိုတစ်လက်၊ ၆၀မမ ဗုံးသီးတစ်လုံး၊ ရှေ့ထွက်မိုင်းတစ်လုံး၊ ဆက်သွယ်ရေးစက်တစ်လုံးနဲ့ စစ်အသုံးအဆောင်ပစ္စည်းတချို့ကို သိမ်းဆည်းရခဲ့တယ်လို့ စစ်မြေပြင်အတည်ပြုချက်အရ သိရပါတယ်။
နွေဦးပြောက်ကျားတပ်ဖွဲ့နဲ့ KTLA ပူးပေါင်းအဖွဲ့က ရဲဘော်တွေကတော့ တစ်စုံတစ်ရာ အထိအခိုက်မရှိပဲ ပြန်လည်ဆုတ်ခွာနိုင်ခဲ့တယ်လို့ ထုတ်ပြန်ချက်အရ သိရပါတယ်။
Public Service Announcement
