စစ်ကိုင်းတိုင်း၊ ကျောက်မြောင်းခြေမြန်တပ်ရင်းမှ ရွှေဘိုမြို့သို့ ထွက်ခွာလာသော စစ်ကောင်စီတပ် ၏ အိမ်စီးကားနှစ်စီးအား ဒေသတွင်း PDFများက ဝိုင်းဝန်းပစ်ခတ်တိုက်ခိုက်ခဲ့ကြောင်း Black Wolf PDF အဖွဲ့က သတင်းထုတ်ပြန်သည်။
ယမန်နေ့ (စက်တင်ဘာ၉ ရက်) နံနက် ၉ နာရီခန့်က ကျောက်မြောင်းမြို့ ခမရ (၁၂)မှ ရွှေဘို-ကျောက်မြောင်းလမ်းအတိုင်း ရွှေဘိုမြို့ဘက်သို့ထွက်လာသော စစ်ကောင်စီတပ်၏ ပရာဒိုခဲရောင်တစ်စီး၊ဘင်အနက်တစ်စီးအား ရွှေဘိုခရိုင်တပ်ရင်း (၅)တပ်ခွဲ -၁ နှင့် Black Wolf PDF တို့က လက်နက်ကြီး၊ လက်နက်ငယ်များဖြင့် ပစ်ခတ်တိုက်ခိုက်ခဲ့ခြင်းဖြစ်ကြောင်း ၎င်းအဖွဲ့က ပြော သည်။
စစ်ကောင်စီတပ်ဘက်ကလည်း ပြန်လည်ပစ်ခတ် ခဲ့ရာ ပြည်သူ့ကာကွယ်ရေးတပ်ဖွဲ့များနှင့် အပြန် အလှန်ပစ်ခတ်မှု ဖြစ်ပွားခဲ့ကြောင်း၊ ထိုပစ်ခတ်မှုတွင် စစ်ကောင်စီတပ်ဘက်က ထိခိုက်သေဆုံးမှုများရှိနိုင်ပြီး ၎င်းတို့လိုက်ပါလာသော အိမ်စီးကားတစ်စီး ကျည်ထိမှန်ပျက်စီးခဲ့ကြောင်း Black Wolf PDF အဖွဲ့က ပြောသည်။
ပြည်သူ့ကာကွယ်ရေးတပ်ဖွဲ့များ အထိအခိုက်အကျအဆုံးမရှိ ဆုတ်ခွါနိုင်ခဲ့သည်ဟု သိရသည်။
Public Service Announcement
ထို့အပြင် ရွှေဘိုနယ်အတွင်း ရွှေဘိုခရိုင်တပ်ရင်း(၅) တပ်ခွဲ(၁)နှင့် Black Wolf-PDF တို့သည် စစ်ကောင်စီတပ်များနှင့်မကြာခဏ တိုက်ပွဲဖြစ်ပွားလျက်ရှိပြီး စစ်ကောင်စီတပ်ဘက်က ထိခိုက်သေဆုံးမှုများရှိခဲ့သည်။
ယမန်နေ့ကပင် ကျောက်မြောင်းမှရွှေဘိုသို့ မောင်းနှင်လာသော စစ်ကားယာဉ်တန်းအား အုံးပေါက်ရွာအနောက်ဖက်တွင် Burma Rangers (ShweBo)နှင့် မဟာမိတ်တပ်များစုပေါင်း၍လက်နက်ငယ်များဖြင့် ဝိုင်းဝန်းပစ်ခတ်ကာ မိုင်း၁၃လုံးနှင့် မိုင်းဆွဲတိုက်ခိုက်ခဲ့ကြောင်း ထိုအဖွဲ့များက သတင်းထုတ်ပြန်ထားသည်။
(စစ်ကောင်စီအိမ်စီးကားများအား မိုင်းဆွဲတိုက်ခိုက်ပြီးနောက် တွေ့ရစဥ်)
