ရန်ကုန်မြို့ သင်္ဃန်းကျွန်းမြို့နယ် ဦးဘဟန်လမ်းပေါ်ရှိ မြို့နယ်တရားရုံးအား “ဒေါင်းအလံလွှင့်” စစ်ဆင်ရေးအဖြစ် ယမန်နေ့ (စက်တင်ဘာ ၁၆) ညပိုင်းက အဝေးထိန်းမိုင်းဖြင့် ဖောက်ခွဲတိုက်ခိုက်ခဲ့ကြောင်း Gurdians UG က ထုတ်ပြန် သည်။
ယမန်နေ့ ည ၇နာရီ မိနစ်၅၀ တွင် သင်္ဃန်းကျွန်းမြို့နယ် တရားရုံးအား Guardians UG ၏ တပ်ခွဲ ဖြစ်သည့် TGK Gurdians က ဖောက်ခွဲတိုက်ခိုက်ရာ လုံခြုံရေးဂိတ်အနီးပေါက်ကွဲခဲ့ပြီး စစ်ကောင်စီဝင်အချို့ ထိခိုက်မှုရှိနိုင်ကြောင်း ထုတ်ပြန်ချက်၌ ဖော်ပြထားသည်။
” ညက ၈ နာရီလောက်မှာ ပေါက်ကွဲသံ တချက်ကြားလိုက်ရတယ်။ နောက်တော့ ရဲကား၊ စစ်ကားတွေ တရားရုံးဘက်သွားနေတာ တွေ့မှ တရားရုံးနားမှာ ပေါက်မှန်းသိတာပါ။ လမ်းတွေ ပိတ်လိုက်တော့ လူထိခိုက်မှု ရှိ မရှိကို မသိရပါဘူး။ ဆေးရုံကားတစ်စီး အဲ့ဘက်ကို သွားတာတော့ တွေ့လိုက်ပါတယ် “ဟု သင်္ဃန်းကျွန်းမြို့နယ်နေ ပြည်သူတစ်ဦးက ပြောသည်။
အဆိုပါဖောက်ခွဲတိုက်ခိုက်မှုအပြီး၌ ရဲဘော်များ အန္တရာယ်မရှိ အောင်မြင်စွာပြန်လည်ဆုတ်ခွာနိုင်ခဲ့ကြောင်းကိုလည်း Gurdians UG က အသိပေးခဲ့သည်။
Public Service Announcement
ပြည်သူများအနေဖြင့် အကြမ်းဖက်စစ်ကောင်စီနှင့် ပတ်သက်သည့် နေရာများအား ရှောင်ရှားသွားလာကြစေရန်လည်း မြို့ပြပြောက်ကြားတပ်ဖွဲ့များက မေတ္တာရပ်ခံခဲ့သည်။
