▪︎ကလေး (၁၅)ဦးခန့်ပျောက်ဆုံးနေပြီး အန္တရာယ်ကင်းစွာ အမြန်ဆုံးလွှတ်ပေးရန် ယူနီဆက် တောင်းဆို
▪︎ယူနီဆက်မြန်မာထုတ်ပြန်ချက်တွင် စစ်ကောင်စီတပ်ကကျူးလွန်ခြင်းဟု တိုက်ရိုက်သုံးစွဲဖော်ပြခြင်းမရှိ
ဒီပဲယင်းမြို့နယ်ရှိ စာသင်ကျောင်းတစ်ကျောင်းကို စစ်လေယာဥ်များဖြင့် ရမ်းသမ်းပစ်ခတ်မှုကြောင့် အနည်း ဆုံး ကလေးငယ် (၁၁)ဦးသေဆုံးခဲ့ကြောင်း ယူနီဆက်မြန်မာက ယနေ့(စက်တင်ဘာ ၁၉) ထုတ်ပြန်သည်။
စက်တင်ဘာလ ၁၆ ရက်နေ့တွင် စစ်ကိုင်းတိုင်း ဒီပဲယင်းမြို့နယ်ရှိ စာသင်ကျောင်းတစ်ကျောင်းအပါအဝင် အရပ် သားပြည်သူများနေထိုင်ရာနေရာများကို စစ်လေယာဥ်များဖြင့် လေကြောင်းတိုက်ခိုက်မှုနှင့် မဆင်မခြင်ပစ်ခတ်မှုများကြောင့် အနည်းဆုံး ကလေးငယ် ၁၁ ဦးခန့်သေဆုံးခဲ့ပါသည်ဟု ထုတ်ပြန်ချက်တွင် ဖော်ပြသည်။
“ယူနီဆက်မှ မိမိတို့သားသမီးများအားဆုံးရှုံးခဲ့ကြရသော မိဘများနှင့် မိသားစုဝင်များနှင့်ထပ်တူ ဝမ်းနည်းကြေကွဲရပါသည်။ အသေးစိတ်အချက်အလက်များကိုလည်း ဆက်လက်အတည်ပြုနေပါသည်”ဟု ဆိုသည်။
အဆိုပါ တိုက်ခိုက်ခံရသော စာသင်ကျောင်းမှ ကျောင်းသား၊ ကျောင်းသူ အနည်းဆုံး (၁၅)ဦးခန့်မှာလည်း ပျောက်ဆုံးနေပြီး ယူနီဆက်အနေဖြင့် ကလေးများအား ဘေးအန္တရာယ်ကင်းစွာဖြင့် ချက်ချင်း ပြန်လွှတ်ပေးရန် တောင်းဆိုထားသည်။
Public Service Announcement
စာသင်ကျောင်းများသည် ဘေးကင်းလုံခြုံသော နေရာများဖြစ်ရမည်ဖြစ်ပြီး ကလေးသူငယ်များကို မည်သည့်အခါမှမတိုက်ခိုက်ရကြောင်း အသိပေးထားသည်။
သို့သော်ထုတ်ပြန်ထုတ်ပြန်ချက်တွင် ကလေးငယ်များကိုပစ်ခတ်သတ်ဖြတ်မှုကို စစ်ကောင်စီတပ်ကကျူးလွန်သည်ဟုတိုက်ရိုက်သုံးစွဲခြင်းမရှိဘဲ၊ အဂ်လိပ်ဘာသာတွင် “air Strike and indiscriminate fire “ဟုသုံးနှုန်းပြီး ၊မြန်မာဘာသာထုတ်ပြန်ချက်တွင် စစ်လေယာဥ်များဖြင့်တိုက်ခိုက်မှု ၊မဆင်မခြင်ပစ်ခတ်မှုများကြောင့်ဟု Unicef မြန်မာထုတ်ပြန်ချက်တွင် ဖော်ပြထားသည်။
