ရိုဟင်ဂျာဒုက္ခသည်တွေ တိုးတက်ကောင်းမွန်တဲ့အခြေအနေနဲ့ နေရပ်ပြန်ရေးအရေးပေါ်လုပ်ဆောင်လို့ ကုလသမဂ္ဂအထွေထွေအတွင်းရေးမှူးချုပ်က တောင်းဆိုလိုက်ပါတယ်။
မြန်မာနိုင်ငံကနေ ဘင်္ဂလားဒေ့ရှ်ကို ရိုဟင်ဂျာဒုက္ခသည်တွေ အစုလိုက်အပြုံလိုက်ထွက်ပြေးတဲ့ ၄နှစ်မြောက် အဖြစ် ဩဂုတ်၂၅ရက်မှာ ကုလသမဂ္ဂအတွင်းရေးမှူးချုပ်က ထုတ်ပြန်တောင်းဆိုခဲ့တာပါ။
ရိုဟင်ဂျာဒုက္ခသည် တစ်သန်းနီးပါးဟာ ခက်ခဲကြမ်း တမ်းတဲ့အခြေအနေတွေနဲ့ အသက်ရှင်နေထိုင်နေရပြီး သူတို့ နေရပ်ကို လုံခြုံစွာ၊ ဂုဏ်သိက္ခာရှိစွာနဲ့ ဆန္ဒအလျောက် ပြန်လာနိုင်တဲ့အခြေအနေမျိုးကို ဖန်တီးကူညီပေးကြဖို့ အတွင်းရေးမှူးချုပ်အန်တိုနီယိုဂူတာရက်စ်က တိုက်တွန်းပါတယ်။
မြန်မာနိုင်ငံမှာ စနစ်တကျခွဲခြားဆက်ဆံခြင်း၊ နိုင်ငံသားဖြစ်ခွင့်ရုတ်သိမ်းခြင်းနဲ့ အုပ်စုလိုက်အကြမ်းဖက်ခြင်းစတဲ့ အခြေခံအကြောင်းရင်းတွေကို အရေးတကြီးဖြေရှင်းဖို့လိုအပ်တယ်လို့လည်း ကုလအတွင်းရေးမှူးချုပ်က ဆိုပါတယ်။
Public Service Announcement
ကုလသမဂ္ဂအနေနဲ့ ရိုဟင်ဂျာအရေးကို ဆက်လက်ကူညီသွားမှာဖြစ်ပြီး နိုင်ငံတကာအသိုင်းအ၀ိုင်းအနေနဲ့လည်း ရိုဟင်ဂျာဒုက္ခသည်တွေနဲ့ သူတို့ကိုရက်ရောစွာလက်ခံထားတဲ့ ဘင်္ဂလားဒေ့ရှ်နိုင်ငံကို ဆက်လက်ထောက်ပံ့ကူညီဖို့ ကုလအတွင်းရေးမှူးချုပ်က တိုက်တွန်းပြောဆိုပါတယ်။
