ရိုဟင်ဂျာတွေ ဒုက္ခသည်တွေ အလုံးအရင်း ဝင်ရောက်လာခြင်းက ဘင်္ဂလားဒေ့ရှ် နိုင်ငံရဲ့ လူမှုရေး၊ လုံခြုံရေးနဲ့ စီးပွားရေး ကဏ္ဍတွေကို ယိုယွင်း ထိခိုက်လာစေကြောင်း ဝန်ကြီးချုပ် ရှိတ်ခ် ဟာဆီနာက ကုလသမဂ္ဂ မိန့်ခွန်းမှာ ပြောကြားသွားပါတယ်။
ဟာဆီနာက ကုလသမဂ္ဂ အနေနဲ့ ရိုဟင်ဂျာ ပြဿနာကို ဖြေရှင်းပေးဖို့ ထိရောက် အားကောင်းတဲ့ အခန်းကဏ္ဍကနေ ပါဝင်စေလိုကြောင်းလည်း စက်တင်ဘာ ၂၃ ရက်က ပြောကြားတဲ့ မိန့်ခွန်းမှာ ထည့်သွင်း တိုက်တွန်းသွားခဲ့ပါတယ်။
“ရိုဟင်ဂျာတွေ ဘင်္ဂလားဒေ့ရှ်မှာ အကြာကြီး လာရောက် အခြေချ နေထိုင်နေခြင်းဟာ ကျွန်မတို့ နိုင်ငံရဲ့ စီးပွားရေး၊ သဘာဝ ပတ်ဝန်းကျင်၊ လုံခြုံရေးနဲ့ လူမှုနိုင်ငံရေးဆိုင်ရာ တည်ငြိမ်မှု ကဏ္ဍ အားလုံးကို ပျက်ပြားစေပါတယ်”လို့ ဟာဆီနာက ပြောပါတယ်။
ဒါ့အပြင် ရိုဟင်ဂျာတွေဟာ မြေလှန်ပြောင်းလဲလိုမှု ဝါဒတွေရဲ့ အကြီးအကျယ် ခြိမ်းခြောက်မှုတွေနဲ့လည်း ကြုံနေရကြောင်း၊ ရိုဟင်ဂျာ ပြဿနာက ရေရှည်ဆက်ရှိနေဦးမယ်ဆိုရင် ဒေသတစ်ခုလုံးရဲ့ လုံခြုံရေးနဲ့ တည်ငြိမ်မှုကိုပါ ထိခိုက် ပျက်စီးသွားစေနိုင်တယ်လို့လည်း ဟာဆီနာက သတိပေးသွားပါတယ်။
Public Service Announcement
၂၀၁၇ ကစလို့ ရခိုင်ပြည်နယ် မြောက်ပိုင်းက မြန်မာစစ်တပ်က နယ်မြေရှင်းလင်းရေး ဆောင်ရွက်မယ်ဆိုတဲ့ အကြောင်းပြချက်နဲ့ ရိုဟင်ဂျာ မျိုးနွယ်စုတွေအပေါ် လူမျိုးသုဉ်း သတ်ဖြတ်မှုတွေ ကျူးလွန်လာတာကြောင့် သိန်းနဲ့ချီ များပြားတဲ့ ရိုဟင်ဂျာတွေဟာ အိမ်နီးချင်း ဘင်္ဂလားဒေ့ရှ် နိုင်ငံဖက် ထွက်ပြေးခဲ့ကြရပါတယ်။
ဟာဆီနာက စေ့စပ်ဆွေးနွေးမှုတွေ လုပ်ဆောင်ခဲ့ဖူးပေမယ့် ကုလသမဂ္ဂဟာ ရိုဟင်ဂျာတွေ နေရပ်ပြန်ရေး ကိစ္စကို ထဲထဲဝင်ဝင် ဆောင်ရွက်နိုင်ခဲ့တာ မရှိကြောင်း ထောက်ပြပါတယ်။ သူဟာ ကုလသမဂ္ဂ မိန့်ခွန်းမှာ မြန်မာနိုင်ငံရဲ့ နာမည်ကို တိုက်ရိုက် သုံးနှုန်းတာမျိုး မရှိအောင် သတိထား ရှောင်ရှားခဲ့ပြီး ရိုဟင်ဂျာ အကျပ်အတည်းဟာ အရေးယူ ပိတ်ဆို့မှုတွေအပြင် သံတမန်ရေးဆိုင်ရာ ပိုမို ညှိနှိုင်းထိတွေ့မှုတွေနဲ့ပါ ကြိုးစားဖြေရှင်းရမယ့် ကိစ္စလို့ ပြောကြားသွားပါတယ်။
မြန်မာနိုင်ငံမှာ အရပ်သား ဒီမိုကရေစီ အစိုးရကို ဖြုတ်ချပြီး အာဏာသိမ်းယူထားတဲ့ စစ်ကောင်စီဟာ နိုင်ငံတကာ မျက်နှာစာမှာတော့ မစားကောင်းတဲ့ အသီးလို ရွံရွံရှာရှာ ဖယ်ကြဉ်မှုတွေကြောင့် အထီးကျန် ရပ်တည်နေရပါတယ်။ ဒီအခြေအနေမျိုးကြောင့် နိုင်ငံတကာရဲ့ အာရုံကို ဆွဲဆောင်ဖို့အတွက် စစ်ကောင်စီဟာ ရိုဟင်ဂျာ ကိစ္စမှာ စေတနာ အမှန်နဲ့ မဟုတ်ဘဲ သဘောထား ပျော့ပျောင်းတာမျိုး ပြသလာနိုင်တယ်လို့ လေ့လာသူ တချို့က ထောက်ပြထားကြပါတယ်။
ယူနီဆက်ဖ်ရဲ့ ဖော်ပြချက်အရ ဘင်္ဂလားဒေ့ရှ်မှာ ထွက်ပြေး ခိုလှုံနေတဲ့ ရိုဟင်ဂျာ အားလုံးရဲ့ ၆၀ ရာခိုင်နှုန်း နီးပါးဟာ အရွယ်မရောက်သေးတဲ့ ကလေးတွေလို့ သိရပါတယ်။ ဘင်္ဂလားဒေ့ရှ် အစိုးရက ပြည်တွင်းမှာ ရောက်ရှိနေတဲ့ ရိုဟင်ဂျာ ဒုက္ခသည် ဦးရေဟာ ၁.၁ သန်းကျော်လောက်ထိ များပြားနေကြောင်း ထုတ်ပြန်ထားပါတယ်။
