လှိုင်မြို့နယ်မှာပေါက်ကွဲမှုဖြစ်ပွား

ရန်ကုန်မြို့ လှိုင်မြို့နယ် အုတ်ကျင်းနားက လျှပ်စစ်မီတာရုံးအနီးတွင် ယနေ့ သြဂုတ် ၂၈ ရက် နေ့လည် ၁၂ နာရီကျော်၌ ပေါက်ကွဲမှုများ ဖြစ်ပေါ်ခဲ့ကြောင်း ရပ်ကွက်နေပြည်သူများက ပြောသည်။

“အုတ်ကျင်းနားက မီတာရုံးနားမှာ ပေါက်ကွဲသံ ကြားရတာပါ။ ပေါက်ကွဲသံက နှစ်ချက်တောင် ကြားရတယ် အသံတော်တော်ကျယ်တယ်။ ဒုတိယတစ်ချက်က အုတ်ကျင်းနားက ဓာတ်ဆီဆိုင်နားလို့ ပြောတယ်။ နောက်ပြီး သေနတ်ပစ်သံတွေလည်း ကြားလိုက်ရသေးတယ်။ အနီးအနားက သူတွေ ပြောတာတော့ ပေါက်ကွဲမှု ဖြစ်ဖြစ်ချင်း ရဲတွေက ရမ်းသမ်းပစ်နေတယ်လို့လဲ ကြားတယ်။ ထိခိုက်မှု ရှိ မရှိတော့ မသိရသေးပါဘူး ” ဟု လှိုင်မြို့နယ် ဒေသခံတစ်ဦးက ပြောသည်။

လှိုင်ကသတင်း​တွေ အမြဲ​ဖော်ပြ​ပေး​နေတဲ့ Hlaing Information ​ဖေ့စ်ဘွတ်ခ်စာမျက်နှာက​လည်း “လှိုင်(၁၃) ရပ်ကွက် တပ်မတော်ဒန်သတ္တုစက်ရုံရှေ့မှာ 12:10 မိနစ်လောက်က ဗုံး ၂ လုံးပေါက်သွားတယ်လို့ သိရပြီး ထိခိုက်မှုအတိအကျကိုတော့မသိရသေးပါဘူး။ ဒန်သတ္တုစက်ရုံ ပေါက်ကွဲမှုတွင် လူငယ်လေးယောက်ကို ဖမ်းထားပါတယ်။ ဖမ်းထားတာသေချာတယ် အထဲမှာစစ်မေးနေပြီး ဒူးထောက်ခိုင်းထားတယ်လို့သိရပါတယ်” လို့​ဖော်ပြထားပါတယ်။

လက်ရှိတွင် အကြမ်းဖက်စစ်ကောင်စီ၏ တပ်ဖွဲ့ဝင်များသည် လှိုင်မြို့နယ် အင်းစိန်လမ်းမကြီးကို လမ်းများပိတ်ဆို့ကာ စစ်ဆေးမှုများ ပြုလုပ်နေကြောင်း ဒေသခံများက ဆိုသည်။

Public Service Announcement

ပြီးခဲ့သည့် သြဂုတ် ၂၀ ရက်ကလည်း လှိုင်မြို့နယ် တပ်မတော်ချည်မျှင်နှင့် အထည်စက်ရုံ (အုတ်ကျင်း) တွင်လည်း ပေါက်ကွဲမှု ဖြစ်ပွားခဲ့သေးသည်။