မုံရွာ – မန္တလေးလမ်းတွင် စစ်ကောင်စီတပ်နှင့် ယာဥ်တန်းအား ဒရုန်းဖြင့်တိုက်ခိုက်

စစ်ကိုင်းတိုင် / မုံရွာ – မန္တလေးလမ်းတွင် စစ်ကောင်စီတပ်နှင့် ယာဥ်တန်းအား ဒရုန်းဖြင့် ခြောက်ကြိမ်၊ မိုင်းဖြင့်တစ်ကြိမ် စုစုပေါင်း ခုနစ်ကြိမ်တိုက်ခိုက်ရာ စစ်ကောင်စီဘက်က ဆယ်ဂဏန်းခန့်သေဆုံးကြောင်း ZERO ပြောက်ကျားတပ်ဖွဲ့ခေါင်းဆောင် ကိုသက်ကြီးက ပြောသည်။

ယမန်နေ့(အောက်တိုဘာလ ၁၇ ရက်) နံနက်ခင်းပိုင်းတွင် မုံရွာ – မန္တလေးလမ်းမကြီးပေါ်၌ ကင်းပုန်းဝပ်နေသော စစ်ကောင်စီတ​ပ်များအား ဒရုန်းဖြင့် သုံးကြိမ်ချ တိုက်ခိုက်ခဲ့ပြီး မြင်းမူမြို့နယ် အောင်သမာဓိဆီဆိုင်အနီးတိုက်ခိုက်မှုတွင် စစ်ကောင်စီတပ်သား လေးဦးသေဆုံးကြောင်း ZERO ပြောက်ကျားတပ်ဖွဲ့ ခေါင်းဆောင် ကိုသက်ကြီးက ပြောသည်။

ထို့နောက် မွန်းလွဲပိုင်း ၁ နာရီ ၄၅ မိနစ်ခန့်တွင် စစ်ကိုင်းမှ မုံရွာမြို့သို့ လာသော စစ်ကောင်စီယာဥ် ၉စီးကို ထီးဆောင်းအနီး၌ ပဒေသာမိုင်းဆွဲတိုက်ခိုက်ခဲ့ကြောင်း၊ ခြောက်စီးမြောက်ကားထိမှန်ဖောက်ခွဲနိုင်ခဲ့ပြီး ၁၄ဦးသေဆုံးဟု သိရကြောင်း ZERO ပြောက်ကျားတပ်ဖွဲ့ ခေါင်းဆောင် ကိုသက်ကြီးက ပြောသည်။

ညနေပိုင်းတွင် ဒရုန်းမစ်ရှင် သုံးကြိမ်ထပ်လုပ်ခဲ့ပြီး နှစ်ကြိမ်ကို ထိထိရောက်ရောက်လုပ်ဆောင်နိုင်ခဲ့ကြောင်း၊ ထီးဆောင်းဆေးရုံ ဆိုင်ကယ်ထားရာအနီးရှိ စစ်ကောင်စီတပ်သားနှစ်ဦး လဲကျသွားပြီး ကားဖြင့် ဆေးရုံသို့ သယ်ဆောင်သွားကြောင်း ZERO ပြောက်ကျားတပ်ဖွဲ့ ခေါင်းဆောင်က ဆိုသည်။

Public Service Announcement

“ကျွန်တော်တို့ မိုင်းတစ်ကြိမ်ဆွဲလိုက်တယ်။ ဒရုန်းကတော့ တစ်နေကုန်ချတာ။ အကုန်လုံး အကောင်နှစ်ဆယ်ကျော်လောက်ရလိုက်တယ်။ ဒရုန်းမစ်ရှင်က သုံးခုလောက်အောင်တယ်။”ဟု ကိုသက်ကြီးက ပြောသည်။

ဒရုန်းစစ်ဆင်ရေးတွင် စစ်ကိုင်းခရိုင် (ပကဖ)အဖွဲ့က ထုတ်လုပ်သည့် ဗုံးသီး​​ဖြင့် တိုက်ခိုက်ခဲ့ခြင်း ဖြစ်သည်။

ယမန်နေ့က မုံရွာ – မန္တလေးလမ်းမကြီးပေါ်တွင် စစ်ကောင်စီယာဥ်များအား လမ်းတစ်လျှောက်ဒေသကာကွယ်ရေးအဖွဲ့များက ဆက်တိုက်တိုက်ခိုက်ခဲ့ကြသည်။