ချောင်းဦးမြို့တွင် လက်နက်အပြည့်အစုံဖြင့်သွားလာနေသည့်ပျုအဖွဲ့ကို ပြည်သူ့ကာကွယ်ရေးမဟာမိတ်အဖွဲ့ တိုက်ခိုက်

စစ်ကိုင်းတိုင်း ချောင်းဦးမြို့တွင် လက်နက်အပြည့်အစုံဖြင့် သွားလာနေသည့် ပျုစောထီးအဖွဲ့ကို ပြည်သူ့ကာကွယ်ရေးမဟာမိတ်အဖွဲ့က မိုင်းဆွဲတိုက်ခိုက်ရာ ပျူငါးဦးထက်မနည်း သေဆုံးသွားသည်။

ချောင်းဦးမြို့ တောပုကျေးရွာမှ စစ်ကောင်စီလက်အောက်ခံပျုစောထီးအဖွဲ့ကို ချောင်းဦး PDF – CHUPDF တပ်ခွဲ -၅ (IGF-Monywa)နှင့် Immortal Guerrilla Force-Monywa (IGF-Monywa) တို့က ယမန်နေ့(နိုဝင်ဘာ၁၇ရက်)နေ့လယ်က တိုက်ခိုက်ခဲ့ခြင်းဖြစ်သည်။

“၂၅​ယောက်လောက်ရှိမယ်ဗျ။ ပျူတွေက သေနတ် တွေနဲ့ ထွက်လာတာ။ မိုင်း နှစ်ဆင့်ခွဲခဲ့တယ်။ ပထမတစ်လုံးက ငါးယောက်အနည်းလေး သေတယ်။ နောက်တစ်လုံးကလည်း ချက်ကောင်းထိပြီး လူနာတင်ကားတွေ လာခေါ်သွားတယ်”ဟု ချောင်းဦး PDF မှ တာဝန်ရှိသူတစ်ဦးက ပြောသည်။

တိုက်ခိုက်ခံရသည့် ပျုစောထီးအဖွဲ့က ဘေးပတ်ဝန်း ကျင်သို့ သေနတ်ဖြင့် အချက်ပေါင်းများသွား ရမ်းသမ်းပစ်ခတ်ခဲ့သည်ဟု CHUPDF တပ်ခွဲ -၅ (IGF Monywa) က သတင်းထုတ်ပြန်ထားသည်။

Public Service Announcement

ပြည်သူများအနေဖြင့် အကြမ်းဖက်စစ်ကောင်စီနှင့် အနီးတဝိုက်တွင်သွားလာနေထိုင်ခြင်း လုံးဝ (လုံးဝ) မပြုလုပ်ကြပါရန်နှင့် ဒေသတွင်း လမ်းခရီးသွားလာရာတွင်လည်း စစ်ကောင်စီအုပ်စု၏ မည်သည့်ကားနှင့်မျှ အနီးကပ်မောင်းနှင် သွားလာခြင်း မပြုကြရန် CHUPDF တပ်ခွဲ -၅ (IGF Monywa)က သတိပေး ထားသည်။

စစ်ကောင်စီတပ်ဖွဲ့သည် ယခုရက်ပိုင်းအတွင်း ချောင်းဦးမြို့နယ်အပြင် ဒေသတွင်း နယ်မြေချင်းထိစပ်နေသော မြောင်၊ မြင်းမူ၊ မြင်းခြံနှင့် ရေစကြိုမြို့တို့တွင် အင်းအားတိုးချဲ့ပြီး စစ်ကြောင်းထိုးနေသည်။