အိန္ဒိယ လေတပ်ရဲ့ တိုက်လေယာဉ်နှစ်စီး လေထဲတိုက်မိရာက လေယာဉ်မှူးတစ်ဦး သေဆုံးသွားကြောင်း သိရပါတယ်။
ဇန်နဝါရီ ၂၈ ရက်က ဒေလီမြို့တော် တောင်ပိုင်းက လေ့ကျင့်ပျံသန်းမှု အစီအစဉ် တစ်ခုမှာ အိန္ဒိယ လေတပ်ရဲ့ အမျိုးအစား မတူညီတဲ့ တိုက်လေယာဉ် နှစ်စီး တိုက်မိခဲ့တာလို့ ဆိုပါတယ်။ တိုက်မိခဲ့တဲ့ လေယာဉ်တွေက လေယာဉ်မှူး နှစ်ဦးပါတဲ့ ရုရှားလုပ် SU-30 တစ်စီးနဲ့ လေယာဉ်မှူး တစ်ဦးတည်း မောင်းနှင်တဲ့ ပြင်သစ်လုပ် Mirage 2000 တစ်စီးတို့ ဖြစ်ပါတယ်။
နှစ်စီးလုံးဟာ ဂွာလီယာ လေတပ်စခန်းကနေ မနက်ပိုင်းမှာ ပျံတက်လာကြပြီး အခြေစိုက် စခန်းရဲ့ အရှေ့ဖက် ကီလိုမီတာ ၅၀ လောက် အကွာမှ ပျက်ကျခဲ့ကြတာ ဖြစ်ပါတယ်။ လေတပ် တာဝန်ရှိသူ တစ်ဦးကတော့ လေယာဉ်တွေဟာ ပုံမှန် လေ့ကျင့် ပျံသန်းမှု အစီအစဉ် တစ်ခုအတွင်း မတော်တဆ အခြေအနေနဲ့ ကြုံခဲ့တာလို့ ပြောပါတယ်။ လေယာဉ်မှူး ၃ ဦးထဲက ၁ ယောက်ကတော့ ဒဏ်ရာ ပြင်းထန်လွန်းရာက သေဆုံးသွားတယ်လို့လည်း သိရပါတယ်။
ဖြစ်စဉ်နဲ့ ပတ်သက်လို့ စုံစမ်းစစ်ဆေးမှုတွေ စတင်နေပြီလို့လည်း လေတပ်နဲ့ ရဲတပ်ဖွဲ့က အသီးသီး ထုတ်ပြန်ထားပါတယ်။ ပြီးခဲ့တဲ့နှစ်၊ အောက်တိုဘာလတုန်းကလည်း အာနူချယ်လ် ပရာဒက်ရှ် ပြည်နယ်မှာ ရဟတ်ယာဉ်တစ်စီး ပျက်ကျရာက အိန္ဒိယ ကြည်းတပ်ရဲ့ စစ်သည် ၅ ဦး သေဆုံးခဲ့ဖူးပါတယ်။
Public Service Announcement
အိန္ဒိယ အတွက်တော့ စစ်တပ်သုံး လေယာဉ်နဲ့ ရဟတ်ယာဉ်တွေ ပျက်ကျတာမျိုး ပြီးခဲ့တဲ့ နှစ်ပိုင်းတွေမှာ ခပ်စိပ်စိပ် ကြုံခဲ့ရပါတယ်။ ၂၀၂၁ ခုနှစ်၊ ဒီဇင်ဘာလမှာလည်း ရုရှားလုပ် Mi-17 ရဟတ်ယာဉ်တစ်စီး ပျက်ကျရာက အိန္ဒိယ ကာကွယ်ရေး အကြီးအကဲ ဗိုလ်ချုပ်ကြီး ဘီပင် ရာဝတ် အပါအဝင် ၁၃ ဦးထိ အသက်ဆုံးရှုံးခဲ့ရပါတယ်။
