အကြမ်းဖက်စစ်ကောင်စီ၏ လေကြောင်းတိုက်ခိုက်မှုကြောင့် ကန့်ဘလူမြို့နယ်၊ ပဇီကြီးကျေးရွာတွင် ကျဆုံးခဲ့သော အရပ်သားပြည်သူ ၁၆၈ဦး၏ ရက်လည်ဖြစ်သည့် မနက်ဖြန် နှစ်ဆန်းတစ်ရက်တွင် တစ်နိုင်ငံလုံး မီးပိတ်သပိတ် ဆင်နွှဲကြရန် တော်လှန်ရေးအင်အားစုများက တောင်းဆိုလိုက်သည်။
အဆိုပါ မီးပိတ်တိတ်ဆိတ်မှုနှင့် အကျယ်လောင်ဆုံးတုန့်ပြန်မှု (Blackout Strike) ကို ဧပြီ ၁၇ ရက် နှစ်ဆန်းတစ်ရက်နေ့ ည ၈ နာရီမှစတင်ပြီး ၅ မိနစ်အကြာ ပြုလုပ်မည်ဖြစ်ကြောင်း တော်လှန်ရေးအင်အားစုများက ဆိုသည်။
စစ်ကောင်စီ၏ လေကြောင်းတိုက်ခိုက်မှုတွင် ပဇီကြီးကျေးရွာမှ အသက်ဆုံးရှုံးခဲ့သူများအတွက် ဝမ်းနည်းစာနာခြင်းကို ဖော်ပြခြင်းအနေဖြင့် နေအိမ်တွင် ဖြစ်စေ၊ မိမိရောက်နေသော နေရာ၊အရပ်တွင်ဖြစ်စေ ည ၈ နာရီ၌ ၅မိနစ်ကြာ မီးပိတ်တိတ်ဆိတ်ငြိမ်သက်ကြရန် အထွေထွေသပိတ် ပေါင်းစပ်ညှိနှိုင်းရေးအင်အားစု GSCB က တိုက်တွန်းနှိုးဆော်သည်။
“ဒီနှစ်မကူးခင်မှာ အာဏာရူးတွေလက်ချက်နဲ့ ပဇီကြီးရွာ လေကြောင်းတိုက်ခိုက်မှုမှာ သေဆုံးသွားရတဲ့အပြစ်မဲ့ပြည်သူ ၁၇၀ကျော်အတွက် ငိုကြွေးခဲ့ရပါတယ်။ ပြည်သူတွေရဲ့ တိတ်တဆိတ် ငိုကြွေးသံတွေဟာ ရင်နဲ့အပြည့် မြည်ဟိန်းလို့ နေပါပြီ။ ငိုညဉ်းသံတွေကို ငြိမ်သက်စွာ အာရုံစိုက်နားထောင်ဖို့ အမှောင်ထုထဲမှာ ခဏလောက်အတူတူ ငြိမ်သက်ဆုတောင်းကြရအောင် Blackout Strike ကို လုပ်ဆောင်တာပါ”ဟု တော်လှန်ရေးအင်အားစုမှ လူငယ်တစ်ဦးက ဆိုသည်။
Public Service Announcement
ထို့ကြောင့် “မီးလာသည်ဖြစ်စေ၊ မီးမလာသည်ဖြစ်စေ ရပ်ကွက်တိုင်း၊ မြို့နယ်တိုင်းနေရာတိုင်းမှာ ၅မိနစ်တိတိမီးပိတ်ပြီး အတူတကွ ငြိမ်သက်စွာဆုတောင်းကြပါမယ်။ စစ်အာဏာရှင်ကို တော်လှန်နေကြတဲ့ ပြည်သူအားလုံး နှစ်ဆန်းတစ်ရက်နေ့ရဲ့ ဒီ Blackout Strike မှာ ပါဝင်ပေးကြပါ”ဟု ၎င်းက တိုက်တွန်းခဲ့သည်။
ထို့အပြင် မြန်မာနှစ်သစ်ကူးနေ့ (နှစ်ဆန်းတစ်ရက်နေ့)တွင် ဘာသာပေါင်းစုံ၊ လူမျိုးပေါင်းစုံတို့မှ ပြုလုပ်သည့်ကောင်းမှု ကုသိုလ်များနှင့် ဆုတောင်းမှုများသည်လည်း ပဇီကြီးအတွက် ရပ်တည်မှု၊ ပြည်သူ့အတွက် ပြည်သူမှရပ်တည်ကြောင်း ပြသကြရန် GSCBက နှိုးဆော်ခဲ့သည်။
