မြန်မာ့အရေး ဖြေရှင်းနိုင်ရေး နိုင်ငံတကာအသိုက်အဝန်းအနေဖြင့် တိကျပြတ်သား ခိုင်မာသော လုပ်ဆောင်ချက်များကို အချိန်မီချမှတ်လုပ်ဆောင်ရန် သံအမတ်ကြီး ဦးကျော်မိုးထွန်းက ကုလသမဂ္ဂ၌ ထပ်မံတိုက်တွန်းသည်။
နယူးယောက်မြို့ အခြေစိုက် ကုလသမဂ္ဂဌာနချုပ်တွင် မသန်စွမ်းသူများ အခွင့်အရေးများဆိုင်ရာ သဘောတူစာချုပ်ဝင် နိုင်ငံများ၏ (၁၆) ကြိမ်မြောက် ညီလာခံကို ဇွန်လ ၁၃ မှ ၁၅ ရက်အထိ ကျင်းပခဲ့ရာ ညီလာခံအတွင်း မြန်မာသံအမတ်ကြီးက ၂၀၂၁ ဖေဖော်ဝါရီ မတရားစစ်အာဏာသိမ်းမှုနှင့် စစ်တပ်၏ ရက်စက်ကြမ်းကြုတ်မှုများက မသန်စွမ်းသူများအပါအဝင် ထိရှလွယ်သောအုပ်စုများအတွက် ကြီးမားသောစိန်ခေါ်မှုများကို ပိုမိုဆိုးရွားစေခဲ့ကြောင်းနှင့် စစ်တပ်အာဏာသိမ်းမှုကြောင့် မြန်မာနိုင်ငံတွင် မသန်စွမ်းသူဦးရေ ပို၍ မြင့်တက်လာခဲ့ကြောင်း အစီရင်ခံသည်။
ထို့အပြင် မြန်မာပြည်သူလူထု၏ ဆန္ဒနှင့်အညီ မြန်မာနိုင်ငံအား ဒီမိုကရေစီလမ်းကြောင်းပေါ်သို့ ပြန်လည်ရောက်ရှိစေနိုင်ရေးနှင့် ဖက်ဒရယ်ဒီမိုကရေစီနိုင်ငံတော် တည်ထောင်နိုင်ရေးတို့အတွက် နိုင်ငံတကာအနေဖြင့် ထိရောက်မှုရှိသော ပံ့ပိုးကူညီမှုများကို အရေးတကြီး ဆက်လက်ထောက်ပံ့ပေးရန် လိုအပ်ကြောင်း သံအမတ်ကြီးက ကုလသမဂ္ဂအဖွဲ့ဝင်နိုင်ငံများကို တောင်းဆိုသည်။
သို့မှသာ မြန်မာနိုင်ငံအနေဖြင့် မသန်စွမ်းသူများ၏ အခွင့်အရေးများကို သာမက စစ်အာဏာရှင်များအောက် ဆိုးရွားသောဒုက္ခများ ခံစားနေကြရသည့် ဒီမိုကရေစီ၊ ငြိမ်းချမ်းရေးနှင့် တရားမျှတမှုတို့အား လိုလားတောင့်တနေသည့် ပြည်သူများ၏ အခွင့်အရေးများကိုပါ မြှင့်တင်ကာကွယ် ပေးနိုင်မည်ဖြစ်ကြောင်း သံအမတ်ကြီးက ရှင်းပြသည်။
Public Service Announcement
မသန်စွမ်းသူများအတွက် မိမိတို့အားလုံး ယခုထက်ပို၍ အတူတကွကြိုးပမ်း အားထုတ်သွားကြရန် လိုအပ်ပြီး အဓိကအားဖြင့် စစ်တပ်မှ ရက်စက်ကြမ်းကြုတ်မှုများ ကျူးလွန်ရာ၌ မြန်မာနိုင်ငံအတွင်း နေထိုင်သူများအား သန်စွမ်းသူများဖြစ်စေ၊ မသန်စွမ်းသူများဖြစ်စေ၊ အမျိုးသား၊ အမျိုးသမီး၊ ကြီးသည်၊ ငယ်သည်မဟူ ခွဲခြားခြင်းမရှိဘဲ ကျူးလွန်နေကြောင်း သံအမတ်ကြီးက ပြောသည်။
