မကွေးတိုင်း၊ ဆိပ်ဖြူမြို့နယ်တွင် စစ်ကောင်စီတပ်က နှစ်ပတ်အတွင်း ဒေသခံပြည်သူ ငါးဦးကို သတ်ဖြတ်ပြီး ကျေးရွာ လေးရွာမှ နေအိမ်များကို မီးရှို့ဖျက်ဆီးသွားကြောင်း ဒေသတွင်း သတင်းရင်းမြစ်များက ပြောသည်။
စစ်ကောင်စီတပ်သည် ဇူလိုင် ၁၀ ရက်မှစတင်ကာ ဆိပ်ဖြူမြို့နယ်အတွင်းရှိ ကျေးရွာများအား စစ်ကောင်းထိုးဝင်ရောက်ခဲ့သည်။
ဇူလိုင် ၁၂ရက်တွင် ဂွေးတိုတဲတိုက်ရှိ ဒေသခံ ပြည်သူ သုံးဦးကို မီးရှို့သတ်ဖြတ်ခဲ့ကြောင်း We Love Seikphyu အဖွဲ့က ပြောသည်။
ဇူလိုင် ၁၅ရက်တွင် ပခုက္ကူမြို့နယ်အတွင်း ဝင်ရောက်ပြီး ဇူလိုင် ၁၈ ရက်အထိ စိုင်ဖြူကျေးရွာအနီးတွင် စခန်းချတပ်စွဲခဲ့သည်။
Public Service Announcement
ထို့နောက် စစ်ကောင်စီတပ် ထွက်ခွာသွားပြီးနောက် စိုင်ဖြူရွာ၌ လေဖြတ်နေသော အဘွားအိုတစ်ဦး၏ ပုပ်ပွနေသော ရုပ်အလောင်းတစ်လောင်းအား ထပ်မံတွေ့ရှိခဲ့ရကြောင်း ဒေသခံများက ပြောသည်။
အလားတူ ဇူလိုင် ၂၆ ရက်ကလည်း အရှေ့ကမ်းဖြူရွာမှ စစ်ကြောင်းပြန်ထွက်ချိန် အသက် (၅၇) နှစ်အရွယ် ဒေသခံတစ်ဦး သေနတ်ဒဏ်ရာဖြင့် သေဆုံးခဲ့ကြောင်း ဒေသခံများက ဆိုသည်။
“အရပ်ဝတ်နဲ့ကံတွင်းရွာကို လာပြီး “စစ်ခွေးတွေဘယ်သွားကြလဲ” ဆိုပြီး PDF ပုံစံနဲ့ဝင်လာကြတယ်။ပြည်သူတွေက သိနေတော့ မဖြေတဲ့အခါ ဒူးထောက်ထိုင်ခိုင်းတယ်။လူမရှိတဲ့ အိမ်တွေ ဝင်မွှေပြီး လိုချင်တာယူသွားကြတယ်”ဟု ဒေသခံတစ်ဦးက ပြောသည်။
စစ်တပ်၏ မီးရှို့ဖျက်ဆီးမှုကြောင့် မိဘုရားချိုင့်ရွာ နေအိမ်များ၊စိုင်ဖြူရွာမှ နေအိမ် ၁၇လုံး၊ တောင်ရွာမကျေးရွာရှိ နေအိမ် လေးလုံး၊ ကံတွင်းရွာရှိ နေအိမ်လေးလုံး ပြာကျခဲ့ကြောင်း ဒေသခံများက ပြောသည်။
စစ်ကောင်စီစစ်ကြောင်းကြောင့် ဆိပ်ဖြူ – ပခုက္ကူနယ်စပ်ရှိ ဆိပ်ဖြူမြို့နယ်ဘက်မှ တောင်ရွာမ၊မြောက်ရွာမ၊ရေယဉ်ချောင်၊ဇီးပင်ကြီး၊သံပုရာပင်နှင့်ဆားလောက် ကျေးရွာများ၊ ပခုက္ကူမြို့နယ်ရှိ စိုင်ဖြူ၊ရှားဒူး၊တောင်ပလူ၊အရှေ့ကမ်းဖြူနှင့် ဥယျာဉ်စုအစရှိသည့် ကျေးရွာပေါင်း ၁၁ ရွာထက်မနည်းမှ ဒေသခံပြည်သူထောင်ချီ ထွက်ပြေးတိမ်းရှောင်ခဲ့ရသည်။
