ကရင်နီလက်နက်ကိုင်ပူးပေါင်းတပ်ဖွဲ့နှင့် စစ်ကောင်စီတပ်တို့ ယမန်နေ့(အောက်တိုဘာ၄ရက်)က တိုက်ပွဲဆက်လက်ဖြစ်ပွားခဲ့ပြီး စစ်ကောင်စီတပ်မှ ကားတစ်စီး ပျက်စီးကာ လေးဦးသေဆုံးခဲ့သည်ဟု ကရင်နီအမျိုး သားကာကွယ်ရေးတပ်ဖွဲ့(KNDF)က ထုတ်ပြန်သည်။
အောက်တိုဘာ၄ ရက် ညနေပိုင်းတွင် လွိုင်ကော်မှ ဒီးမော့ဆိုမြို့နယ်ဘက်သို့ ဦးတည်သော ကာအစီးရေ ၃၅စီးပါ အကြမ်းဖက်စစ်ကောင်စီယာဉ်တန်းကို ကရင်နီတပ်မတော် (KA) နှင့် KNDF တို့မှ ဒီးမော့ဆိုမြို့နယ် စံပြ (၆)မိုင်နှင့် (၅)မိုင် ကျေးရွာအကြား၌ တိုက်ခိုက်ခဲ့သည်ဟု ဆိုသည်။
ထို့အပြင် လွိုင်ကော်-ဒီးမော့ဆိုလမ်းမကြီး တစ်လျှောက် လမ်းကင်းချထားသော အကြမ်းဖက် စစ် ကောင်စီတပ်များနှင့် ကရင်နီပူးပေါင်းတပ်များ နှစ်ဖက်ထိတွေ့ တိုက်ပွဲများ ဖြစ်ပွားခဲ့သည်ဟု ဖော်ပြထားသည်။
တိုက်ပွဲများအတွင်း အကြမ်းဖက်စစ်ကောင်စီဘက်မှ ကားတစ်စီးပျက်စီးခဲ့ပြီး၊ လေးဦးသေဆုံးခဲ့ကြောင်း၊ ကရင်နီလက်နက်ကိုင်တပ်ဖွဲ့များဘက်က ထိခိုက်မှုမရှိကြောင်း ထုတ်ပြန်ခဲ့သည်။
Public Service Announcement
အကြမ်းဖက်စစ်ကောင်စီတပ်များသည် ဒီးမော့ဆို၊လွိုင်ကော်မြို့နယ်တို့တွင် အပြင်းအထန် ထိုးစစ်ဆင်မှုအပြီး အကြမ်းဖက်စစ်ကောင်စီယာဉ်တန်းသည် လူ၊လက်နက်၊ရိက္ခာ အပြည့်ဖြင့် ဖရှုဆို၊ ဘောလခဲနှင့် ဖားဆောင်မြို့နယ်များဘက်သို့ ဦးတည်ကာ အင်အားဖြည့်တင်းမည့် အခြေအနေဖြစ်ကြောင်း KNDF ၏ ထုတ်ပြန်ချက်၌ ဖော်ပြထားသည်။
