သရဖူ/People’s Spring
ချင်းပြည်နယ်၊ ဟားခါးမြို့မရဲစခန်းကို ချင်းပြည်ကောင်စီပူးပေါင်းတပ်ဖွဲ့များက ဇူလိုင် ၂၀ရက်တွင် စီးနင်းတိုက်ခိုက်ပြီး ကယ်ထုတ်ခဲ့သည့်အကျဉ်းသားများအနက် တစ်သက် တစ်ကျွန်းကျခံထားရသူ ခုနစ်ဦးအပါအဝင် နိုင်ငံရေးအကျဉ်းသား ၄၉ဦးပါဝင်ခဲ့ကြောင်း ချင်းလူ့အခွင့်အရေးအဖွဲ့(CHRO)က ဇူလိုင် ၃၀ရက်တွင် ထုတ်ပြန်သည်။
ဟားခါးမြို့မရဲစခန်း ဝင်ရောက်စီးနင်းတိုက်ခိုက်ခဲ့ပြီး အကျဥ်းသားများ ကယ်ထုတ်မှုမှပြန်လွတ်လာသူများတွင် အကြမ်းဖက်မှုတိုက်ဖျက်ရေး ဥပဒေများဖြင့် စစ်ကောင်စီက ဖမ်းဆီးတရားစွဲဆိုပြီး ထောင်ဒဏ်တစ်သက်တစ်ကျွန်းချခံရသူ ခုနှစ်ဦးအပါအဝင် ထောင်ဒဏ် သုံးနှစ်မှ ၁၅နှစ်အထိ ချမှတ်ခံရသူ ၄၉ဦး ပါဝင်ကြောင်း CHROက ထုတ်ပြန်သည်။
Public Service Announcement
တော်လှန်ရေးအင်အားစုများက မြို့သိမ်းတိုက်ပွဲများဆင်နွှဲနေသည့်မြို့နယ်အချို့တွင် ရဲစခန်းအချုပ်နှင့် အကျဉ်းထောင်များတွင် ထိန်းသိမ်းခံထားရသူများ ကယ်ထုတ်နိုင်သည်ဖြစ်စဉ်များရှိနေသည်။
မတူပီမြို့၌ ပြီးခဲ့သည့်ဇွန်လက ချင်းကာကွယ်ရေးရဲဘော်များက မြို့သိမ်းတိုက်ပွဲဆင်နွှဲစဉ် စခန်းစွန့်ခွာထွက်ပြေးသည့် စစ်ကောင်စီတပ်ဖွဲ့က ဖမ်းဆီးသွားသည့် နိုင်ငံရေးအကျဥ်းသား
၁၃ဦးကို ကယ်ထုတ်နိုင်ခဲ့သည်။ ပြီးခဲ့သည့် ဇူလိုင်အတွင်းက မိုးကုတ်မြို့နှင့် စဥ့်ကူးမြို့သိမ်းတိုက်ပွဲတွင်လည်း နိုင်ငံရေးအကျဉ်းသားများအပါအဝင် စစ်ကောင်စီဖမ်းဆီးထားသည့်အကျဉ်းသားများကို ကယ်ထုတ်နိုင်ခဲ့သည်။
ကိုးကန့်တပ်မတော်(MNDAA)နှင့် မဟာမိတ်များတိုက်ခိုက်ခဲ့သည့် လားရှိုးမြို့သိမ်းတိုက်ပွဲတွင်လည်း လားရှိုးအကျဉ်းထောင်မှ နိုင်ငံရေးအကျဉ်းသား ၂၀၀ကျော်ကို ကယ်ထုတ်နိုင်ခဲ့သည်။
