အင်ကြင်း/People’s Spring
မန္တလေးတိုင်းရှိ စဥ့်ကူး၊ သပိတ်ကျင်းနှင့် နွားထိုးကြီးမြို့နယ်တို့တွင် စစ်ကောင်စီတပ်က တိုက်ပွဲဖြစ်ပွားခြင်းမရှိဘဲ လေကြောင်းနှင့် လက်နက်ကြီးများဖြင့် ပစ်ခတ်တိုက်ခိုက်ရာ ဒေသခံပြည်သူ ၇ ဦး သေဆုံးပြီး ၄ဦးထက်မနည်း ထိခိုက်ဒဏ်ရာရရှိခဲ့ကြောင်း သတင်းရရှိသည်။
ယမန်နေ့(သြဂုတ် ၃၁ရက်) နေ့လယ် ၁နာရီခွဲခန့်က သပိတ်ကျင်းမြို့နယ်၊ ဇရပ်ကွင်းကျေးရွာကိုသို့ စစ်ကောင်စီက လေကြောင်းတိုက်ခိုက်ခဲ့ရာ ဒေသခံပြည်သူ ၃ဦး ပွဲချင်းပြီးသေဆုံးပြီး တစ်ဦးထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။
Public Service Announcement
“တိုက်ပွဲမရှိဘဲ ပစ်တာ။ တအုန်းအုန်းနဲ့ချသွားတာ။”ဟု သပိတ်ကျင်းဒေသခံတစ်ဦးက ပြောသည်။
ဇရပ်ကွင်းကျေးရွာရှိ စစ်ကောင်စီတပ်စခန်းအား သြဂုတ် ၁၁ရက်တွင် ပြည်သူ့ကာကွယ်ရေးတပ်မတော်(မန္တလေး)က သိမ်းပိုက်ထားသည်။
အလားတူ ယမန်နေ့ညကပင် စဥ့်ကူးမြို့နယ်၊ သီလှရွာနှင့် ကြို့ပင်ကျေးရွာအား ကျောက်မြောင်းမြို့ရှိ အမှတ်(၁၂) ခြေမြန်တပ်ရင်းမှ လက်နက်ကြီးဖြင့် ပစ်ခတ်ခဲ့ရာ သီလှရွာ ဒေသခံပြည်သူ၃ဦး သေဆုံးခဲ့ကြောင်း ကင်းထောက်မြေပြင် သတင်းမှန်ပြန်ကြားရေး(စဥ့်ကူး)၏ အဖွဲ့ဝင်တစ်ဦးက ပြောသည်။
“ညနေ၄နာရီက ပစ်တာ၂ချက်။ ပြည်စိုးအောင်ရပ်ကွက် သစ်လွင်ဆီဆိုင်က နေအိမ်အနောက်ဘက်နဲ့ လက်ဖက်ရည်ဆိုင်ရှေ့ကျတယ်။ အဖီအမိုးတွေ ပျက်စီးတယ်။”ဟု အထက်ပါအဖွဲ့ဝင်က ပြောသည်။
ထို့အပြင် ယမန်နေ့ ည ၈ နာရီကျော်ကလည်း မန္တလေးတိုင်း၊ နွားထိုးကြီးမြို့နယ်၊ မန်ကျီးကုန်းကျေးရွာကို စစ်ကောင်စီက လေကြောင်းဖြင့် ဗုံးကြဲတိုက်ခိုက်ရာ ဘုန်းကြီးကျောင်း ပျက်စီးသွားပြီး သံဃာတစ်ပါးနှင့် အမျိုးသား ၂ဦး ထိခိုက်ဒဏ်ရာရရှိခဲ့ကြောင်း နွားထိုးကြီးသတင်းစုံတာဝန်ခံက ပြောသည်။
“လူလက်ပိုင်း အမျိုးသား၂ဦးမှာ တစ်ဦးက ဗိုက်ထိလို့ ဆေးရုံမှာဆေးကုသနေရတယ်။ ဆရာတော်တစ်ပါးက ခြေထောက်ထိတယ်။ မစိုးရိမ်ရဘူး”ဟု ဒေသခံတစ်ဦးက ပြောသည်။
ယမန်နေ့(သြဂုတ် ၃၁ရက်) နံနက် ၁နာရီခွဲခန့်ကလည်း နွားထိုးကြီးမြို့နယ်၊ ထနောင်းပင်ကျေးရွာကို စစ်ကောင်စီတပ်က လေကြောင်းမှ ဗုံးသီးတစ်လုံးချတိုက်ခိုက်ခဲ့ရာ အမျိုးသမီးတစ်ဦးသေဆုံးကြောင်း ဒေသခံများက ပြောသည်။
မြင်းခြံခရိုင်အထူးစစ်ဆင်ရေးစတင်ပြီးနောက်ပိုင်း စစ်ကောင်စီတပ်က နွားထိုးကြီးမြို့နယ်အတွင်းရှိ ကျေးရွာများအား လေကြောင်းတိုက်ခိုက်ခဲ့ရာ ပြည်သူ ၃ဦးသေဆုံးပြီး ၆ ဦးထက်မနည်း ထိခိုက်ဒဏ်ရာရရှိခဲ့သည်။
