တပ်ကုန်းက နာရီပေါင်းများစွာ ပိတ်မိနေတဲ့ သံဃာတော်နဲ့ ကိုရင်တွေကို ကယ်ထုတ်

ဇေအောင်/People’s Spring

နေပြည်တော်၊ တပ်ကုန်းမြို့နယ် မန်ကျီးပင်ကျေးရွာစစ်ဆေးရေးဂိတ်အနီးက အုတ်ဖိုကျောင်းမှာ နာရီပေါင်းများစွာ ပိတ်မိနေတဲ့ သံဃာတော်တွေနဲ့ ကိုရင်တွေကို ကယ်ထုတ်နိုင်ခဲ့ပြီလို့ သိရပါတယ်။

စက်တင်ဘာ ၁၁ ရက် မနေ့က နံနက် ၂ နာရီခွဲကတည်းက ပိတ်မိ​နေတဲ့ သံဃာတော် ၃ပါး၊ ကိုရင်၂ပါးနဲ့ ဒကာတစ်ဦးကို ဒီကနေ့ စက်တင်ဘာ ၁၂ ရက် နံနက်ပိုင်းမှာ ရန်ကုန် သန်းမင်းကြွယ် ပရဟိတအဖွဲ့ကနေ ကယ်ထုတ်နိုင်ခဲ့ပါတယ်။

ဆရာတော်နှစ်ပါးနဲ့ကိုရင်နှစ်ပါးဟာ ရေတွေတက်လာလို့ ကျောင်းခေါင်မိုးပေါ်အထိ တက်နေခဲ့ရပါတယ်။ ရေအနည်းငယ်ကျသွားခဲ့ပေမယ့် ရေစီးတအားသန်နေတာ​ကြောင့် ခက်ခက်ခဲခဲသွားရောက်ကယ်ဆယ်ခဲ့ရတယ်လို့ သွားကယ်တဲ့ပရဟိတသမားတစ်ဦးက ပြောပါတယ်။

Public Service Announcement

“ဘုန်းဘုန်းကျောင်းကို လိုင်းပေါ်မှာ ကယ်ပေးဖို့ ပြောနေကြတာ။ ရေစီးက တအားသန်တယ်။ ကယ်ဆယ်ရေးတွေက ရေတိမ်လည်း ရေစီးသန်တော့မမောင်းရဲဘူးဖြစ်နေတာ။”လို့ ပရဟိတသမားတစ်ဦးက ပြောပါတယ်။

https://www.facebook.com/LuduNwayOo/videos/867611778294457

“ဒီပေါ်မှာဦးဇင်းတို့နေတာ နှစ်ညပေါ့။ ကိုရင်လေးတွေကိုလည်း ရင်ခွင်ထဲထည့်ထားလို့ အမိုးကမရှိဘူး။”လို့ ဆရာတော်တစ်ပါးက မိန့်ကြားပါတယ်။

ကားများလည်း ရေမြုပ်နေပြီး ကျွဲနွားတိရိစ္ဆာန်တွေပါ ရေထဲမျောပါသေဆုံးတာတွေ ရှိနေတယ်လို့ သိရပါတယ်။ ရေစီးသန်နေတာကြောင့် ဆရာတော်တွေဟာ ဘုရားတ၍ လိုက်ပါခဲ့ရပါတယ်။

အခုလက်ရှိမှာ နေပြည်တော်၊တပ်ကုန်း၊ ဇေယျာသီရိ၊ ပျဥ်းမနားမြို့နယ်မှာ ရေကြီးရေလျှံနေဆဲဖြစ်ပြီး ပိတ်မိတဲ့ ပြည်သူတွေလည်း အများအပြား ရှိနေတယ်လို့ သိရပါတယ်။ ​ရေ​ဘေးသင့်ပြည်သူ​တွေအများအပြားရှိ​နေပြီးသန်းမင်းကြွယ် ပရဟိတအဖွဲ့က​နေ စက်တင်ဘာ ၁၁ ရက်နဲ့ စက်တင်ဘာ ၁၂ ရက် နံနက် ၁၁ နာရီ​​ကျော်အထိ

စက်​လှေ နဲ့ အ​ခေါက် ၂၀ ရဟန်းနဲ့ပြည်သူ ၁၀၀ ​လောက်ကို ကယ်တင်ထားနိုင်ပြီလို့ အဖွဲ့က တာဝန်ရှိသူက People’s Spring ကို​ပြောပါတယ် ။

​ရေ​ဘေး​ကြောင့်တံတားတွေ၊ လမ်းတွေလည်း ကျိုးကျပျက်စီးတာတွေရှိနေလို့ ရန်ကုန်-မန္တလေးလမ်းဟောင်းဘက်မှာလည်း သွားလာလို့မရဘူးလို့ ဒေသခံတွေက ပြောပါတယ်။

နေပြည်တော်တဝိုက်အပြင် ပျော်ဘွယ်၊ ရမည်းသင်း၊ မိတ္ထီလာ၊ ဝမ်းတွင်း၊ မြစ်သား၊ ကျောက်ဆည်မြို့နယ်တွေအထိ ရေကြီးရေလျှံမှုတွေ ဖြစ်ပွားနေပြီး လူပေါင်းသောင်းချီ ရေဘေးဒုက္ခကြုံနေရပါတယ်။