ဇေအောင်/People’s Spring
ရေကြီးရေလျှံဒေသများသို့ ကူညီကယ်ဆယ်ရေးနှင့် အရေးပေါ်စားနပ်ရိက္ခာပံ့ပိုးခြင်း လုပ်ငန်းများအား မြို့နယ်တာဝန်ခံများမှတဆင့် ချိတ်ဆက် ဆောင်ရွက်နေကြောင်း အမျိုးသားညီညွတ်ရေးအစိုးရ၊ လူသားချင်းစာနာ ထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေးဝန်ကြီးဌာနက အသိပေးသည်။
ရာဂီတိုင်ဖွန်းမုန်တိုင်းအရှိန်ကြောင့် မြန်မာနိုင်ငံတစ်ဝှမ်း လတ်တလော ရင်ဆိုင်ကြုံတွေ့နေရသည့် ရေကြီးရေလျှံဒေသများသို့ ကူညီကယ်ဆယ်ရေးနှင့် ဒေသခံပြည်သူများကို ရေဘေးလွတ်ရာသို့ ရွေ့ပြောင်းရေးနှင့် အရေးပေါ်စားနပ်ရိက္ခာပံ့ပိုးခြင်း လုပ်ငန်းများကို မြို့နယ်တာဝန်ခံများမှတဆင့် ချိတ်ဆက်ဆောင်ရွက်နေကြောင်း NUG၏ လူသားချင်းစာနာ ထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာနက ယနေ့(စက်တင်ဘာ ၁၆ ရက်)တွင် အသိပေးသည်။
Public Service Announcement
လတ်တလော ရေကြီးရေလျှံမှုကြောင့် ပဲခူးတိုင်း၊ စစ်တောင်းမြစ်ဝှမ်းဒေသရှိ စိုးမိုးနယ်မြေများတွင် ရေဘေးသင့်ပြည်သူများကို အကူအညီများ အချိန်မီရရှိနိုင်ရန် ပြည်သူ့ကာကွယ်ရေးအဖွဲ့၊ မြို့နယ်ပကဖ၊ ပအဖအဖွဲ့များနှင့် လူသားစာနာတာဝန်ခံများက ရေဘေးသင့် အိမ်ထောင်စုများမှ သက်ကြီးရွယ်အိုများ၊ ကလေးငယ်များနှင့် စစ်ဘေးရှောင်များကို ဘေးလွတ်ရာနေရာများသို့ ရွှေ့ပြောင်းထောက် ပံ့ကူညီမှုများ ဆက်လက် ဆောင်ရွက်ပေးနေသည်ဟု သိရသည်။
ထို့အပြင် အခြားတိုင်းနှင့် ပြည်နယ်များအလိုက် ရေဘေးသင့်ပြည်သူများစာရင်းကောက်ယူခြင်း၊ လိုအပ်ချက်များကို ဆန်းစစ်ခြင်းနှင့် ထောက်ပံ့မှုပေးခြင်းများကိုလည်း ဆောင်ရွက်ပေးနေပြီး ထိုသို့ထောက်ပံ့နိုင်ရေးအတွက် ပြည်တွင်း၊ ပြည်ပမှ လှူဒါန်းပေးကြသည့် စေတနာရှင်၊ အလှူရှင်များကိုလည်း ကျေးဇူးတင်ရှိကြောင်း NUG၏ လူသားချင်းစာနာ ထောက်ထားရေးနှင့် ဘေးအန္တရာယ်ဆိုင်ရာ စီမံခန့်ခွဲရေး ဝန်ကြီးဌာနက ထပ်မံအသိပေးသည်။
စက်တင်ဘာ ၁၃ ရက်ကမူ ပဲခူးတိုင်း၊ ရေတာရှည်မြို့နယ်တွင် ရေဘေးသင့် ပြည်သူများကို ကူညီကယ်ဆယ်ရင်း ကာကွယ်ရေးဝန်ကြီးဌာန၊ အလယ်ပိုင်းတိုင်းစစ်ဌာနချုပ်၊ နေပြည်တော် တိုင်းစစ်ဌာန၊ ဗျုဟာအမှတ် (၁၇) ကွပ်ကဲမှုအောက်ရှိ တပ်ရင်းအမှတ် (၉၀၁)မှ ရဲဘော် Eagle အသက်ဆုံးပါးခဲ့ကြောင်း NUG၏ ကာကွယ်ရေးဝန်ကြီးဌာနက အသိပေးသည်။
“ရွာတွေထဲရေတွေအများကြီးစဝင်လာကတည်းက ပြည်သူတွေကို ရွှေ့ပြောင်းပေးနေကြတာ ပိတ်မိသူတွေကယ်ရင်းဖြစ်သွားတာပါ။
နေရာက စစ်တောင်းမြစ်ဝှမ်းဒေသကမြစ်ကမ်းနဲ့နီးတော့ ဆယ်ရွာကျော်လောက်ရေနစ်နေကြတာ။ (အလယ်ပိုင်းတိုင်း) နေပြည်တော် PDFတပ်ရင်းတွေကော၊ တောင်ပိုင်းတိုင်းPDFတွေကော၊ ရေဘေးကယ်ဆယ်ရေးလုပ်ပေးနေရင်း ရေစီးနဲ့မျောပါသွားတာပါ။”ဟု နေပြည်တော်တပ်ရင်း(၉၀၁)က တာဝန်ရှိသူက ပြောသည်။
လက်ရှိတွင် မကွေးတိုင်းနှင့် ပဲခူးတိုင်းရှိ ရေဘေးသင့်နှင့် စစ်ဘေးရှောင် ပြည်သူများအတွက် အရေးပေါ် အကူအညီများ ထောက်ပံ့ပေးနေသည်ဟု ၎င်းက ဆိုသည်။
ပဲခူးတိုင်း အရှေ့ခြမ်းရှိ တော်ဝင်ဒေါင်းတပ်ရင်းကလည်း ၎င်းတို့၏ စိုးမိုးနယ်မြေဒေသများတွင် ရေကြီးရေလျှံမှုများကို ကြိုတင်ကာကွယ်ရန် ပြည်သူလူထုနှင့် တပ်ရင်း၏ ရဲဘော်များ ပူးပေါင်းကာ သဲအိတ်များကို ထပ်၍ တာဘောင်များကို ခိုင်မာစေရန် ပြုလုပ်ခဲ့ကြောင်း အဆိုပါတပ်ရင်းက အသိပေးထားသည်။
စက်တင်ဘာဒုတိယပတ်အတွင်း ရှမ်းပြည်နယ်တောင်ပိုင်း၊ ကယားပြည်နယ်၊ မန္တလေးတိုင်း၊ ပဲခူးတိုင်းတို့တွင် ရေကြီးရေလျှံမှုများကြောင့် ရေဘေးဒုက္ခသည်သိန်းချီရှိနေကာ ပြည်သူရာချီသေဆုံးခဲ့သည်။ ယနေ့အထိလည်း ကူညီကယ်ဆယ်ရေးနှင့် စားနပ်ရိက္ခာများလိုအပ်နေဆဲဖြစ်ကြောင်း ရေဘေးသင့်ပြည်သူများက ပြောသည်။
