မန္တလေးမြို့နှင့် မနီးမဝေးရှိ မတ္တရာမြို့နယ်၊ သုံးဆယ်ပေးကျေးရွာတွင် တိုက်ပွဲပြင်းထန်စွာ ဖြစ်ပွားနေပြီး စစ်ကောင်စီက လေကြောင်းဖြင့်ပါ ပစ်ခတ်တိုက်ခိုက်နေကြောင်း သတင်းရရှိသည်။
ယနေ့(စက်တင်ဘာ ၂၁ရက်) နံနက် ၆နာရီခန့်ကတည်းက မတ္တရာမြို့နယ်၊ သုံးဆယ်ပေးကျေးရွာတွင် ပြည်သူ့ကာကွယ်ရေးပူးပေါင်းတပ်များနှင့် စစ်ကောင်စီတပ်တို့တိုက်ပွဲပြင်းထန်စွာဖြစ်ပွားခဲ့ပြီး စစ်ကောင်စီက မတ္တရာနှင့် စစ်ကိုင်းတိုင်း မင်းကွန်းဒေသဘက်ကပါ လက်နက်ကြီးများ ပစ်ကူခဲ့ကြောင်း ဒေသခံများက ပြောသည်။
စစ်ကောင်စီတပ်သည် ဧရာဝတီမြစ်ဘေးရှိ သုံးဆယ်ပေးရွာအား ယနေ့ နံနက် ၄နာရီခွဲခန့်ကတည်းက အင်အားအများအပြားဖြင့် စစ်ကြောင်းထိုးလာခြင်းဖြစ်ပြီး လက်နက်ကြီးပစ်ကူများပါ အသုံးပြုခဲ့ကြောင်း MDY REVOLUTION က ဖော်ပြသည်။
Public Service Announcement
နံနက် ၈နာရီခွဲခန့်တွင်မူ စစ်ကောင်စီတပ်က သုံးဆယ်ပေးကျေးရွာအား ဂျက်ဖိုက်တာတစ်စင်းဖြင့် လေကြောင်းတိုက်ခိုက်မှုပြုလုပ်သွားကြောင်း မင်းကွန်းဒေသခံအချို့က ပြောသည်။
“သမင်ခြံ၊ ပေါက်ဝဲ(ရွာ)ဘက်က သုံးဆယ်ပေးနဲ့ကပ်နေတာ။ အဲဘက်တကြောအကုန်ပြေးနေရတယ်။ လေယာဥ်သံတွေကော၊ လက်နက်ကြီးသံတွေကော ဆူညံနေတာပဲ။”ဟု မင်းကွန်းဒေသခံတစ်ဦးက ပြောသည်။
တိုက်ပွဲအခြေအနေအသေးစိတ်အား လက်တလောမသိရသေးဘဲ နံနက် ၁၀ နာရီခွဲခန့်တွင် စစ်ကောင်စီတပ်က သုံးဆယ်ပေးကျေးရွာအား မီးရှို့ဖျက်ဆီးသွားကြောင်း မင်းကွန်းဒေသခံအချို့က ပြောသည်။
သုံးဆယ်ပေးကျေးရွာတိုက်ပွဲအား လက်နက်ကြီးပစ်ကူသံများအား မန္တလေးမြို့အနီးတဝိုက်ကပါ ကြားလိုက်ရပြီး မြို့တွင်းတိုက်ပွဲဖြစ်သည့်အထင်ဖြင့် နေရာအချို့တွင် ရုတ်ရုတ်သဲသဲဖြစ်သွားကြောင်း မြို့ခံများက ပြောသည်။
“မနက်လင်းကတည်းက ပစ်နေတာ။ သုံးဆယ်ပေးဘက်ဖြစ်နေတယ်ပြောတယ်။ တချို့က ကျောက်ဝိုင်းနားဖြစ်တယ်ပြော။ တချို့က မန္တလေးနန်းတွင်းထဲပစ်တယ်တွေရော။”ဟု မန္တလေးမြို့ခံတစ်ဦးက ပြောသည်။
မန္တလေးနန်းတွင်းကိုမူ စက်တင်ဘာ ၁၇ ရက်ညပိုင်းက အလယ်ပိုင်းတိုင်းစစ်ဌာနချုပ်-လပခအား Operation Flame အဖွဲ့မှ ၁၀၇မမ ရှော့တိုက်ဒုံး ငါးလုံးဖြင့် ပစ်ခတ် တိုက်ခိုက်ခဲ့သေးသည်။
