ကရင်ပြည်နယ် ၊မြဝတီမြို့ နယ်ထဲက စစ်ရေးအရ အရေးပါတဲ့ လက်ခတ်တောင် စခန်းကို လက်လွှတ်ရပြီးနောက် စစ်ကောင်စီတပ်က ပြန်လည်သိမ်းယူလိုက်နိုင်ပြီဆိုတဲ့သတင်းမှားတွေလူမှုကွန်ရက်မှာဖြန့်ဝေတာရှိနေပါတယ်။
လက်ခတ်တောင်စခန်းကို အမှတ် ၄၄ ခြေမြန်တပ်မဌာနချုပ်မှူးကွပ်ကဲမှုနဲ့အတူ သြဂုတ်လ ၂၃ ရက် မနက် ၅ နာရီဝန်းကျင်မှာပြန်သိမ်းလိုက်တာလို့ စစ်တပ်အတွက် ဝါဒဖြန့်ပေးနေတဲ့ တယ်လီဂရမ် (Telegram)အချို့မှာ ဖြန့်နေကြတာပါ။
အဲဒီသတင်းမှားကို Ko Chit အမည်နဲ့ တယ်လီဂရမ် ချန်နယ်မှာ သြဂုတ်လ ၂၃ ရက် နေ့ခင်းပိုင်း ၁၂ နာရီ ၃၁ မိနစ်က စတင်ဖြန့်ဝေပါတယ်။ ဖြန့်ဝေမှုကို ကြည့်ရှုသူ ၉၅၃၁ ဦးထိရှိနေပါပြီ။
သတင်းမှားဖြန့်ထားတဲ့ တယ်လီဂရမ်လင့်ခ် (https://t.me/ckkmdy969/12742)
Public Service Announcement
တပ်မ ၄၄ ဟာ မွန်ပြည်နယ်၊ကျိုက်ထိုမြို့မှာအခြေစိုက်ပြီး လက်အောက်ခံတပ်ရင်း၊တပ်ဖွဲ့တွေကတော့ မွန်ပြည်နယ်နဲ့ ကရင်ပြည်နယ်အတွင်းမှာ စစ်ရေးလှုပ်ရှားမှုပြုလုပ်တာပါ။
ဒါပေမယ့်တပ်မ ၄၄ တပ်မမှူး ကွပ်ကဲတဲ့ စစ်ကောင်စီ စစ်ကြောင်းတွေဟာ လက်ခတ်တောင်ကို ပြန်သိမ်းယူလိုက်ပြီဆိုတဲ့သတင်းကတော့ မှားယွင်းနေတာကိုစစ်ဆေးတွေ့ရပါတယ်။
အဲဒီသတင်းမှားထွက်လာပြီး ၂ရက်အကြာ သြဂုတ်လ ၂၅ ရက်မှာ KNU တပ်မဟာ ၆ လက်အောက်ခံ Cobra စစ်ကြောင်းမှူးဗိုလ်ဒါဘောကိုယ်တိုင် လက်ခတ်တောင်စစ်ရေးအခြေအနေကို ရှင်းပြထားတဲ့ ၄ မိနစ်နီးပါးကြာတဲ့ရုပ်သံဖိုင်ကို Cobra စစ်ကြောင်းရဲ့ ဖေ့ဘွတ်ခ်ပေ့ချ်မှာ တင်လာပါတယ်။
ဗိုလ်ဒါဘောရဲ့ ရုပ်သံဖိုင်ကို အခုလင့်ခ်မှာ ကြည့်ရှုနိုင်ပါတယ်။
( https://www.facebook.com/TheCobraColumn/videos/552418766982570 )
စစ်ကောင်စီတပ်တွေဟာ လက်ခတ်တောင်စခန်းကိုလက်လွှတ်လိုက်ရပြီးနောက် ပြန်ရဖို့အတွက် အင်အားအလုံးအရင်းနဲ့ထိုးစစ်ဆင်နေတာ တစ်လပြည့်ပြီလို့ ဗိုလ်ဒါဘောက ရုပ်သံဖိုင်ကတဆင့် အသိပေးထားပါတယ်။
အဲဒီကာလအတွင်းတိုက်ပွဲ ၁၀ ကြိမ်ဖြစ်ပွားထားပေမယ့် စစ်ကောင်စီတပ်တွေဟာ တောင်ခြေထိတောင် မကပ်နိုင်ဘူးလို့ ဗိုလ်ဒါဘောက လက်ခတ်တောင်ရဲ့ စစ်ရေးအခြေအနေကို ရုပ်သံဖိုင်ထဲမှာရှင်းပြထားပါတယ်။
လက်ခတ်တောင်ကြောကို KNU ၊ PDF အင်အားစုတွေက စိုးမိုးထားဆဲဖြစ်တယ်လို့ ကျားသစ်နက် စစ်ကြောင်းရဲ့ ဒုစစ်ကြောင်းမှူး ရဲဘော်ညီစေက သြဂုတ်လ ၃၀ ရက် နေ့ခင်းပိုင်းမှာ အတည်ပြုပါတယ်။
ကျားသစ်နက်စစ်ကြောင်းဟာ လက်ခတ်တောင်ကို ဝင်ရောက်တိုက်ခိုက်ရာမှာ ပါဝင်ခဲ့တဲ့ အဖွဲ့တစ်ဖွဲ့ပါ။
လက်ခတ်တောင်စခန်းကို KNU နဲ့ PDF ပူးပေါင်းတပ်တွေက စစ်ကောင်စီတပ်ထံကနေ ဇူလိုင် ၂၁ ရက် မှာ တိုက်ခိုက်သိမ်းယူထားတာပါ။
