စစ်ကိုင်းတိုင်းသို့ အကြမ်းဖက်စစ်ကောင်စီ၏ ကာကွယ်ရေးဝန်ကြီးဗိုလ်ချုပ်ကြီးမြထွန်းဦး မတ်လ ၇ ရက်ကလာရောက်ခဲ့သည်။ ၎င်း မရောက်ရှိမီသုံးရက် အလိုမှာပင် စစ်ကိုင်း တိုင်းရှိ မြို့နယ်လေးခု(စစ်ကိုင်း၊မုံရွာ၊ ရွှေဘို၊ကလေး)မှလွဲ၍ ကျန်မြို့နယ်အားလုံး၌ MPT၊ အော်ရီဒူး နှင့် တယ်လီနော၊ Mytel စသောဆက်သွယ်ရေးအော်ပရေတာအားလုံး၏ မိုဘိုင်းအင်တာနက်လိုင်းများကို စစ်ကောင်စီကရက်အကန့်အသတ်မရှိ ဖြတ်တောက်ခဲ့သည်။
ထို့အခြေအနေများကြောင့် မကြာမီအချိန်တွင် စစ်ကိုင်းတိုင်း၌ အကြမ်းဖက်စစ်တပ်၏ ပြင်းထန်ပြီး ရက်စက်ယုတ်မာသောထိုးစစ်ဆင်မှုများကို ကြုံတွေ့လာရတော့မည်ဟု ဒေသခံ ပြည်သူ့ကာကွယ်
ရေးတပ်ဖွဲ့များကကြိုတင်ခန့်မှန်းတွက်ချက်ခဲ့ကြသည်။
စစ်ကောင်စီက ခုခံတွန်းလှန်မှုအားကောင်းသောစစ်ကိုင်းတိုင်းကို အညှိုးတကြီး စစ်ဆင်ရေများလုပ်ခဲ့သော အကြိမ်ရေမှာမနည်းတော့ပေ။ ၂၀၂၁ အောက်တိုဘာလမှ စ၍ “အနော်ရထာ စစ်ဆင်ရေး”အမည်ဖြင့် နှစ်မကုန်ခင်စစ်ကိုင်တိုင်းကို ထိန်းချုပ်မည်ဟုကြွေးကြော်ကာ ထိုးစစ်အကြီးအကျယ်ဆင်ခဲ့သေးသည်။ သို့သော် တစ်တိုင်းလုံးနီးပါးမှ ပြည်သူ့ကာကွယ်ရေးတပ်ဖွဲ့များက လက်လုပ်မိုင်းများ ၊လက်လုပ်သေနတ်များဖြင့်ပင် ပြောက်ကျားစစ်ဗျူဟာဖြင့် ရဲရဲဝံ့ဝံ့တိုက်ခိုက်ကြသဖြင့် “အနော်ရထားစစ်ဆင်ရေး”မှာ “စစ်ခွေးသချ်ိုင်းစစ်ကိုင်းတိုင်း” ဆိုသော ကြွေးကြော်သံအောက်အရေးနိမ့်ခဲ့သည်။ စစ်ကိုင်းတိုင်းက စွာသလို ချင်းပြည်နယ်မှ တူးမီးကိုင် တော်လှန်ရေးတပ်ဖွဲ့ဝင်များ၏ လက်သံပြောင်မှုကြောင့် အနောက်မြောက်တိုင်းစစ်ဌာနချုပ်(နမခ) စစ်တိုင်းမှူးကိုပင် ရာထူးချပြောင်းရွေ့ခံလိုက်ရသည်။
စစ်ကိုင်းတိုင်းအခြေစိုက်နမခတိုင်းမှူး ဗိုလ်ချုပ်ဖြိုးသန့်ကို ၂၀၂၁ ဇန်နဝါရီ ၆ ရက်တွင် နယ်စပ်ရေးရာဝန်ကြီးဌာန ဒုတိယဝန်ကြီးအဖြစ် ပြောင်းရွှေ့ခန့်အပ်ခဲ့သည်။ တိုင်းမှူးသစ်အဖြစ် ကလေးမြို့အခြေစိုက် အမှတ် (၁၀) စစ်ဆင်ရေးကွပ်ကဲမှုဌာနချုပ် (စကခ ၁၀) တပ်မမှူးဖြစ်သူ ဗိုလ်ချုပ်သန်းထိုက်ကိုပြောင်းလဲ ခန့်အပ်ခဲ့သည်။ ထိုအပြင် ‘အနော်ရထာ’ စစ်ဆင်ရေးကို ကြီးကြပ်ရန် စစ်တိုင်းမှူး အပြင် စစ်ဆင်ရေးအထူးအဖွဲ့မှူးများအဖြစ် ဒုတိယဗိုလ်ချုပ်ကြီးသန်းလှိုင်နှင့် ဒုတိယဗိုလ်ချုပ်ကြီးတေဇကျော်တို့ကို ၂၀၂၁ အောက်တိုဘာလတွင်တာဝန်ပေးခဲ့သေးသည်။ သို့သော် အနော်ရထာ စစ်ဆင်ရေးမှာ လက်လုပ်မိုင်းများကြောင့်မရှုမလှ အရေးနိမ့်ပြီးနောက် ဒုတိယဗိုလ်ချုက်ကြီးသန်းလှိုင်မှာလည်း အခေါက်ခံရပြီး စစ်ကောင်စီ၏ ပြည်ထဲရေးဒုဝန်ကြီးတာဝန်ကိုသာပြန်ထမ်းဆောင်ရတော့သည်။
ထိုကြောင့် အကြမ်းဖက်စစ်ကောင်စီက ယခုနှစ် မတ်လတွင် စစ်ကိုင်းတိုင်းကို အထူးစစ်ဆင်ရေးတစ်ရပ်ထပ်မံဆင်နွှဲနေခြင်းဖြစ်သည်။ယခုစစ်ဆင်ရေး၏ အမည်ကို မသိ့ရသော်လည်း စစ်ကိုင်းတိုင်းကို စစ်ကောင်စီ၏တပ်မတော်နေ့ဖြစ်သာ မတ်လ ၂၇ ရက်မတိုင်ခင် ထိန်းချုပ်နိုင်ရမည်ဆိုသော ရည်မှန်းချက်ဖြင့်ဖြစ်ကြောင်း ပြည်သူ့ကာကွယ်ရေးတပ်ဖွဲ့များကပြောသည်။
“စစ်ကိုင်းတိုင်းကို မတ်လ(၂၇)ရက်နေ့မတိုင်ခင် အပြတ်ရှင်းရမယ်ဆိုပြီး ညွှန်ကြား ထားတယ်လို့သိရတယ်။အကုန်သတ် ၊အကုန်မီးရှို့ စနစ်နဲ့ ခြေမှုန်းမယ်လို့လဲ သတင်းတွေရထားတယ်။မသင်္ကာတဲ့ရွာမှန်သမျှ မီးရှို့၊မသင်္ကာသူမှန်သမျှ ဖမ်းဆီးသတ်ဖြတ်တာတွေ ပိုလာလိမ့်မယ်”ဟု စစ် ကိုင်းတိုင်းပြည်သူ့ကာကွယ်ရေးတပ်ဖွဲ့ဝင် ကိုရန်ရှင်းအောင်က သူ၏အမြင်ကို ပြောသည်။
အင်တာနက်လိုင်းများကို ဖြတ်တောက်ပြီးနောက် အကြမ်းဖက်စစ်ကောင်စီတပ်၏
ယခုတစ်ကြိမ်ထိုးစစ်မှာ ပြည်သူများအပေါ် ပိုမို အညှိုးတကြီးဖြင့် ဖျက်ဆီး အကြမ်းဖက်လာသည်။
ပြည်သူများကို သံသယရှိသည်နှင့် အထိန်းအကွပ်မရှိသတ်ဖြတ်သလို ၊ဒေသခံ အမျိုးသမီးအချို့ကိုမူ မုဒိန်းကျင့် သတ်ဖြတ်မှုများ အထိ့ကျူးလွန်လာပြီး ရွာလုံးကျွတ်မီးရှို့ ဖျက်ဆီးခြင်းများကိုလည်း ဘယ်ခေတ်ကာလကမှ မရှိခဲ့ဖူးသောရက်စက်ယုတ်မာမှုမျိုးဖြင့် သောင်းကျန်းနေကြသည်။
“ကျွန်တော်တို့နဲ့ ဆက်စပ်တယ်လို့ သူတို့ (အကြမ်းဖက်စစ်တပ်)က သတ်မှတ်တဲ့ ရွာတွေတိုင်းက အခုနောက်ပိုင်း ရွာလုံးကျွတ်မီးရှို့ဖျက်ဆီးခံခဲ့ရတယ်။ဒါတင် မကဘူး ကလေးတွေရော သက်ကြီးရွယ်အိုတွေပါမရှောင်ဘူးပြည်သူတွေကို ရက်ရက်စက်စက် ပိုသတ်ဖြတ်လာတယ်။ဒီလိုလုပ်ရပ်တွေက စစ်ကိုင်းတိုင်း မှာ စစ်အာဏာရှင်ကို ဆန့်ကျင်သူတိုင်း နဲ့ မျိုးဆက်တွေကို လူမျိုးတုန်းသတ်ဖြတ်နေတယ်လို့ပဲ အသိပေးချင်တယ် “ဟု တန့်ဆည် ပြည်သူ့ကာကွယ်ရေးတပ်ဖွဲ့တာဝန်ရှိသူက လူထုနွေဦးသို့ ပြောသည်။
ပြည်သူ့ကာ ကွယ်ရေးတပ်ဖွဲ့များကို မကူညီမထောက်ခံရဲစေရန် ထိုသို့ရက်စက်ယုတ်မာပြီးစစ်ကိုင်းတိုင်းမှ PDFများကို စားနပ်ရိက္ခာ ၊ ဘဏ္ဍာငွေ၊ သတင်းအ ချက်အလက်ထောက်လှမ်းရေးနှင့်လူထု ထောက်ခံမှု ဆိုသည့် ဖြတ်လေးဖြတ်စီမံကိန်း ကို အကြမ်းဖက်စစ်ကောင်စီက ပီပီပြင်ပြင်အကောင်အထည်ဖော်နေခြင်းဖြစ်ကြောင်းPDF တပ်ဖွဲ့ဝင်တစ်ဦးဖြစ်သော ကိုရန်ရှင်းအောင်က သုံးသပ်ပြောကြားသည်။
ယခုတစ်ကြိမ်စစ်ကောင်စီထိုးစစ်တွင် တပ်ဖွဲ့ဝင်အင်အားပိုမိုများလာခြင်း ၊ခေတ်မီတိုက်ခိုက်ရေး လက်နက်ကရိယာများပိုစုံလာခြင်း ၊ ဗုံးကိုအဓိကအသုံးပြုတိုက်ခိုက်သောစစ်ကိုင်းကို ဗုံးထောင်ခွဲမရစေရန် ဆက်သွယ်ရေးလိုင်းဖြတ်တောက်သော Jammer များအသုံးပြုလာခြင်း ၊ အချို့ဒေသများတွင် စစ်ကောင်စီတပ်က ဓါတုလက်နက်ကိုပင်အသုံးပြုတိုက်ခိုက်ကြောင်း PDFများကပြောလာခြင်း၊ ဒေသကျွမ်းကျင်သောစစ်ကောင်စီကလေ့ကျင့်လက်နက်တပ်ဆင်ပေးထားသော ပျူစောထီးများပိုမိုအသုံးပြုလာခြင်း၊ ရွေ့ လျား စစ်ထိုးပုံများယခင်ထက်ပို၍ မြန်ဆန်လာခြင်း စသည်တို့ကြောင့် ဒေသခံ PDF များကို အခက်တွေ့စေခဲ့သည်များလည်းရှိသည်။ထိုကြောင့် တိုက်ပွဲ အချို့တွင် ဒေသခံ PDF များ အထိ့နာခဲ့သလို စခန်းအချို့လည်းအသိမ်းခံခဲ့ရသည်။
မတ်လ တတိယပါတ်အထိ အမျိုးသားညီညွတ်ရေးအစိုးရ- NUG ကထုတ်ပြန်ထားသည် စစ်ကောင်စီကျူးလွန်ခဲ့သော ရာဇဝတ်မှုများမှတ်တမ်းတွင်စစ်ကိုင်းတိုင်းမှာဖြစ်စဥ် ဆယ်နှင့်ချီပြီး တစ်နိုင်ငံလုံးတွင်အများဆုံးဖြစ်သည်။
ယင်းမာပင်၊ရွှေဘို၊ကျွန်းလှ၊ခင်ဦး၊ကနီ၊ဒီပဲယင်း၊ မြောင်နှင့် ဝက်လက် တို့တွင် ဆိုးရွားသောစစ် ရာဇဝတ်မှုများ အကြိမ်ကြိမ်ကျူးလွန်ခဲ့ပြီး အသက်သုံးနှစ်အရွယ် ကလေးငယ် အပါအဝင် ပြည်သူ ဆယ်နှင့်ချီ၍ ရက်စက်စွာသတ်ဖြတ်ခံခဲ့ရသည်။
ထိုအပြင်အကြမ်းဖက်စစ်တပ်ဝင်ရောက်ပြီး နောက် ပျောက်ဆုံးနေသော၊ လူသားဒိုင်းအဖြစ်ဖမ်းဆီးခံရသော ပြည်သူ ဆယ်နှင့်ချီ ရှိသေးကြောင်းလည်း ဒေသတွင်းသတင်းရင်းမြစ်များက အသိပေးသည်။ ယင်းမာပင် မြို့နယ်တွင် ကလေးငယ်များ ၊သက်ကြီးရွယ်အိုများအပါအဝင်ဒေသခံပြည်သူ ၁၂ ဦးရက်စက်စွာသတ်ဖြတ်ခံရခြင်း ၊ ခင်ဦးတွင် ပြည်သူများအပါအဝင် PDF လူငယ်များကို စစ်ကောင်စီတပ်က သတ်ဖြတ်၍ ရွာအပြင်လယ်ကွင်းတွင်စွန့်ပစ်ခြင်း ၊ ကလေးမြို့နယ်တွင် ဆယ်ကျော်သက်အရွယ်မိန်းကလေးငယ်အပါအဝင် သားအမိသုံးဦးကို မီးရှို့သတ်ဖြတ်ခြင်း စသောဆိုးရွားသောပြစ်မှုများကို အကြမ်းဖက်စစ်တပ်က ကျူးလွန်ခဲ့သည်။
ပြည်သူများကိုသတ်ဖြတ် ၊ပစ္စည်းဥစ္စာများကိုလုယူခိုးဝှက်၍ နေအိမ်များမီးရှို့ ဖျက်ဆီးသောအကြမ်းဖက်စစ်ကောင်စီတပ်သားအများစုကလည်း ပြည်သူများကိုရန်သူလိုသဘောထား၍အညှိုးတကြီးကျူးလွန်နေခြင်းဖြစ်သည်။ကျေးရွာများသို့ဝင်ရောက်ဖျက်ဆီးပြီး ပြည်သူပိုင်ငွေကြေးဥစ္စာများကိုလုယက်၊ခိုးယူသောစစ်ကောင်စီတပ်ဖွဲ့ဝင်များမှာ ရွာတစ်ရွာကိုဖျက်ဆီးပြီးနောက် မည်မျှရကြောင်းတစ်ဦးနှင့်တစ်ဦး အပြိုင်အဆိုင်ကြွားဝါနေသည်အထိ့ရိုင်းစိုင်းနေကြောင်း ယင်းမာပင်မြို့နယ်မှ PDF တပ်ဖွဲ့ဝင်တစ်ဦးကပြောသည်။ စစ်ကောင်စီတပ်က စစ်ကိုင်းတိုင်းကို ထိုသို့ရက်စက်၊ယုတ်မာစွာဖိနှိပ်နေသော်လည်း လက်တွေ့တွင် ရလဒ်မှာ ၎င်းတို့မျှော်လင့်ထားသည်နှင့်ပြောင်းပြန်ဖြစ်နေသည်။
“မီးရှို့ခဲ့တဲ့ ရွာ အိမ်ရှင်အများစုကတော့ စစ်ခွေးတွေ မုန်းလွန်းလို့ ဓါးမနဲ့ ဝင်ခုတ်မယ်ဆိုတာကြီးပဲ။ တားနေရတယ် “ဟု ကနီ PDF- ၂ မှတာဝန်ရှိသူအကြမ်းဖက် စစ်ကောင်စီတပ်အပေါ်ပြည်သူများ၏ နာကြည်းမုန်းတီးမှုကိုပြောသည်။
PDF များ၏ ခုခံတိုက်ခိုက်မှု မချိုးနှိမ်နိုင်သောအခြေအနေတွင် စစ်ကောင်စီတပ်က ကျေးရွာများကို မီးရှို့ဖျက်ဆီးမှုများကိုသာ တွင်တွင်ကျယ်ကျယ်လုပ်နေသည်။
“ဖက်ဆစ်တပ်ကဒီတစ်ကြိမ်စစ်ဆင်ရေးလုပ်တာ အရင်နဲ့ဘယ်လိုကွာလဲဆိုတော့ ရွာတွေကိုမီးရှို့တာတွေတိုးလာတယ်။ ပြည်သူလူထုကို ပိုမိုပြီးတော့ရက်စက်တဲ့လုပ်ရက်တွေလုပ်လာပါတယ်”ဟု
မြောင်မြို့နယ်တော်လှန်ရေးတပ်- MRA မှတာဝန်ရှိသူက ပြောသည်။
ထိုကြောင့်ပင် စစ်ကိုင်းတိုင်းသည် စစ်ကောင်စီတပ်၏ အညှိုးတကြီးမီးရှို့ဖျက်ဆီးခံနေရသောဒေသဖြစ်လာသည်။စစ်အုပ်စုက အာဏာသိမ်းပြီးနောက်ဖေဖော်ဝါရီ၁ရက်မှ ၂၀၂၂ မတ်လ ၂၂ ရက်အထိ့ Data for Myanmar ကပြုစုထားသောအချက်အလက်များအရ နိုင်ငံတစ်ဝန်း မီးရှို့ဖျက်ဆီးခံရသောနေအိမ်ပေါင်း ၇၇၂၉ အိမ်ရှိရာ စစ်ကိုင်းတိုင်းတစ်တိုင်းထဲမှ ၄၈၆၄ အိမ်ရှိသည်။
ပုလဲတစ်မြို့နယ်က ၂၀၂၁ အိမ် ၊ရွှေဘိုမြို့နယ်က ၅၈၆ အိမ်၊ မင်းကင်းမြို့နယ်က ၄၆၂ အိမ် တို့ဖြင့် စစ်ကောင်စီတပ်၏အများဆုံးမီးရှို့ဖျက်ဆီးခံခဲ့ရသည်။
ဖျက်ဆီးခြင်းမျိုးစုံဖြင့် စစ်ကိုင်းတိုင်းကိုဖိနှိပ်သော်လည်း အကြမ်းဖက်စစ်ကောင်စီတပ် ရည်မှန်းချက်ယခုတစ်ကြိမ်တွင်လည်း ရှုံးနိမ့်ခဲ့ပါသည်။သတ္တိပြောင်မြောက်လှသော အနောက်မြောက်လွင်ပြင်မှ ကျေးလက်နေတောင်သူလယ်သမားများ ၊မြို့ပြမှ လူငယ်များက လက်နက်ခဲယမ်း မပြည့်မစုံကြားကပင် ပျောက်ကြားဗျူဟာကိုအသုံးပြု၍ အကောင်းဆုံးခုခံတိုက်ခိုက်နေသည်။ ဒေသတစ်ခုကိုဖိလျှင် ကျန်ဒေသမှ လှုပ်ပေးပြီး ဖက်ဆစ်တပ်အလစ်အငိုက်ကိုချောင်း၍ ဇွဲကောင်းကောင်းဖြင့်ခုခံတိုက်ခိုက်နေသဖြင့် အချိန်ကြာလာသည်နှင့်အမျှ စစ်ကောင်စီတပ်အထိနာလာသည်။
“စစ်ကိုင်းက ခုထိ ကောင်းကောင်းခုခံနိုင်တာက မြေပြင်တော်လှန်ရေး အင်အားစုတွေ အားကောင်းလို့ပါ” ဟုယင်းမာပင်မြို့နယ်မှ အမိမြေတော်လှန်ရေးတပ်ဖွဲ့မှ တာဝန်ရှိသူတစ်ဦးကသုံးသပ်သည်။
“လူထုတွေကတော့ ကျွန်တော်အခု ကြုံနေရတဲ့ ပတ်ဝန်းကျင်က လူတွေကတော့ စိတ်ဓာတ်ကျတာလည်း တစ်ယောက်မှမရှိဘူး။ အားလုံးက ရသလိုနဲ့ တော်လှန်မယ် ရသလိုနဲ့ တိုက်ခိုက်သွားမယ် ဒီလိုမျိုးတွေရှိတယ်” ဟု ယင်းမာပင်ဒေသမှ PDF တပ်ဖွဲ့ဝင်တစ်ဦးဖြစ်သော ဆရာသောင်းကမြေပြင်အခြေအနေကိုပြောသည်။
ပြည်သူများ၏ ခုခံကာကွယ်မှု အားကောင်းခြင်း၏ လျှိုဝှက်ချက်ကို ကနီPDFတပ်ရင်း( ၂ ) မှတာဝန်ရှိသူကအောက်ပါအတိုင်းရှင်းပြသည်။
“ပြည်သူတွေက ခုခံဖို့ကလွဲပြီးဘာမရှိတော့ဘူးဗျ။တချိန်လုံးလဲပြေးလွှားနေရတော့ သူတို့ (အကြမ်းဖက်စစ်တပ်)အမြစ်မပြတ်မချင်း အကောင်းနေရမှာမဟုတ်တာ။ အကြမ်းဖက်ခံရတာတွေကြောင့် အားလုံးနီးပါးကတော်လှန်ရေးကိုကိုယ်စွမ်းသလောက် ရရာစွဲကိုင်ပြီးခုခံကြတာပါ”
ထိုကြောင့် ပြည်သူများတွင် ခိုင်မာပြတ်သားသောစိတ်ပိုင်းဖြတ်မှု ရှိပြီဖြစ်၍ လက်နက်ခဲယမ်းများကို ပိုမိုရရှိလျှင် အကြမ်းဖက်စစ်တပ်ကို ယခုထက်ပို၍ အထိ့နာအောင်တိုက်ခိုက်နုင်မည်ဖြစ်ကြောင်းလည်း အထက်ပါတာဝန်ရှိသူကဆိုလေသည်။ထိုကြောင့် NUG နှင့် ပြည်သူများက ပိုမိုအကူအညီပေးကြရန်လည်းတောင်းဆိုသည်။
“ပြည်သူတွေအနေနဲ့က အသက်ပေးတိုက်ပွဲဝင်နေတဲ့အတွက် လူသိ့ထင်ရှားမကူညီရဲရင်တောင် low profile (လူသိ့နည်းအောင် သိုသိပ်စွာ) နဲ့ ဘဲဖြစ်ဖြစ် တတ်စွမ်းသရွေ့ကူညီပေးကြပါလို့ပြောချင်ပါတယ်ဗျ။ငွေကြေးနိုင်သူကငွေကြေးလှူ၊ စခလှုပ်ရှားမှုသတင်းပေးနိုင်သူကပေး စေချင်တာမျိုးပါ။ အွန်လိုင်းသုံးနိုင်သူတွေကကလစ်စရာရှိတာကလစ်ပေါ့ဗျာ။ စိတ်သာရှိမယ်စုံနည်းမျိုးစုံနဲ့ပါဝင်လို့ရပါတယ်ဗျ ” ဟု ကနီ PDF မှတာဝန်ရှိသူကမေတ္တာရပ်ခံသည်။
ဆရာသောင်းကတော့ PDF တပ်ဖွဲ့ဝင်များ၏ ခုခံတော်လှန်စစ်ပိုမို ကျစ်လစ်၍ စွမ်းရည်ပိုထက်မြက်လာစေရန် PDF တပ်ဖွဲ့များကို စုစည်းပြီး ကောင်းမွန်သောခေါင်းဆောင်မှု ၊စည်းလုံးညီညွတ်စွာတိုက်ခိုက်နိုင်ပါက မင်းအောင်လှိုင်၏စစ်တပ်ကို ကောင်းစွာချေမှုန်းနိုင်မည်ဟူအကြံပြုသည်။
NUG အနေဖြင့် PDF အဖွဲ့များနှင့်ချိတ်ဆက်မှု ပိုအားကောင်းလာသော်လည်း ပိုမိုထောက်ပံ့ပေးရန် ၊မြေပြင်တွင်တစ်ကယ်တိုက်ခိုက်နေသောအဖွဲ့များကို စီစစ်၍ လက်နက်၊ရိက္ခာ၊ငွေ၊နည်းပညာများပိုမိုထောက်ပံ့ပေးလျှင် နွေဦးတော်လှန်ရေးအတွက်ပိုကောင်းကြောင်းလည်း PDFများကပြောသည်။
“ကျွန်တော်ကဘယ်အဖွဲ့ သူကဘယ်အဖွဲ့ဆိုပြီးတော့ မာန်မာနတွေနဲ့ ငါတို့သည် လက်စွမ်းပိုပြရမယ်ဆိုတဲ့ စိတ်ဓာတ်မျိုးတွေနဲ့ မသွားဘဲနဲ့ ငါတို့မှာ နှစ်လက်ရှိရင် ဟိုအဖွဲ့ကို တစ်လက်မျှပေးလိုက်ရင် တို့မှာ တိုက်အား ပိုကောင်းမယ်ဆိုတဲ့ မျှပေးကြမယ်ဆိုတဲ့ စိတ်ဓာတ်မျိုးနဲ့ စည်းစည်းလုံးလုံးနဲ့ အလုပ်လုပ်ကြမယ်ဆိုရင် ပိုပြီးကောင်းလာမယ့် အဖွဲ့အစည်းဖြစ်မယ်ထင်ပါတယ်။အဲဒါက PDF ခေါင်းဆောင်တွေကို အဓိကပြောလိုတာပါ” ဟု ဆရာသောင်းကအကြံပြုသည်။
စစ်ကိုင်းကိုထိန်းချုပ်ရန်ဆိုကာအကြမ်းဖက်စစ်ကောင်စီ၏ ရည်မှန်သောရက်စွဲပြည့်ရန် ၂၄ နာရီသာလိုတော့သည်။ နေပြည်တော်တွင် မတ် ၂၇ ၌ တပ်မတော်နေ့အခမ်းအနားကို ဟိတ်ဟန်ထုတ်၍ အာဏာလုစစ်ခေါင်းဆောင်က အောက်ခြေတပ်သားနှင့် ၎င်းတို့ထောက်ခံသူများစိတ်ဓါတ်မကျရန် ဟန်ရေးပြပွဲ ပြုလုပ်မည်ဖြစ်သော်လည်း ၎င်းတို့ရည်မှန်းသလိုမတ် ၂၇ တိုင်အောင် အနောက်မြောက်လွင်ပြင်ကို မလွှမ်းမိုးနိုင်၍ စိုးရွံစိတ်နှင့် မချိတင်ကဲစိတ်တို့ ဖြစ်နေပါလိမ့်မည်။
အနောက်မြောက်လွင်ပြင်ဒေသကလည်း မတ် ၂၇ အနားနီးလာသည်နှင့် ဗုံးများ သေနတ်များဖြင့်မြိုင်မြိုင် ကြိုနေကြသည်။ စစ်ကိုင်းတိုင်း၏တော်လှန်ရေးမီးလောင်မြိုက်၍ ကောင်မှူတော်ဘုရားဝန်းအတွင်း အရပ်သားအစိုးရလက်ထက်က ထုလုပ်လှူဒါန်ခဲ့သောစည်တော်ကြီးကိုပင် စစ်ကောင်စီက အကြောင်းပြ၍ဖယ်ရှားပစ်သည်။ထင်သလိုမဖြစ်သောကြောင့် စည်တော်ကြီး ပြီးလျှင် နမခစစ်တိုင်းမှူးသစ် ဗိုလ်ချုပ်သန်းထိုက်ကိုပါ ဖယ်ရှား ခြင်းရှိ ၊မရှိ မကြာခင်သိ့ရမည်ဖြစ်သည်။
အကြမ်းဖက်စစ်ကောင်စီအတွက်အနောက်မြောက်လွင်ပြင်မှ တော်လှန်ရေးတပ်သားများပေးသောသတင်းစကားတစ်ခုလည်းရှိနေသည်။ “စစ်ဆင်ရေး ရှိရှိ ၊မရှိရှိ လာရင်တိုက်မှာပဲ။ကျွန်တော်တို့မှာ လက်နက်အသာစီးမရပေမယ့် စိတ်ဓာတ်နဲ့ လူအင်အားကသူတို့ထက်သာပြီးသားဖြစ်တဲ့အတွက် အဆုံးထိတိုက်ပွဲဝင်သွားမှာပါဗျ “ဟု ကနီ PDF မှ တာဝန်ရှိသူကပြောပါသည်။