ကိုဗစ်ကပ်ရောဂါဖြေရှင်းတုန့်ပြန်ဖို့နဲ့ မြန်မာပြည်သူတွေကို ကူညီထောက်ပံ့ဖို့ ဥရောပသမဂ္ဂရဲ့ ကြိုးပမ်းမှု အရှိန်မြှင့်တင်မယ်လို့ ဒီနေ့ထုတ်ပြန်လိုက်ပါတယ်။
“ကျွန်ုပ်တို့ရဲ့ ကြိုးပမ်းမှုတွေကို နှစ်ဆအရှိန်မြှင့်တင်ပြီး Global Fund ၊ COVAX တို့ကို အီးယူထောက်ပံ့မှုရရှိနေတဲ့ နိုင်ငံတကာပါဝင်လုပ်ဆောင်သူတွေနဲ့ ပူးပေါင်းသွားပါမယ်။ နောက်ပြီး ကုသမှု၊ အောက်စီဂျင်၊ စမ်းသပ်စစ်ဆေးခြင်းနဲ့ ကာကွယ်ဆေးထိုးနှံခြင်းတွေ အရှိန်မြှင့်လုပ်ဆောင်သွားပါမယ်”လို့ မြန်မာနိုင်ငံရှိ ဥရောပသမဂ္ဂက ထုတ်ပြန်ပါတယ်။
ဒါ့အပြင် ဥရောပသမဂ္ဂရဲ့ ကူညီထောက်ပံ့မှုနဲ့ အထူးဥရောပအဖွဲ့ကလည်း အကျိုးအရှိဆုံးနည်းလမ်းကနေ ကူညီနိုင်ဖို့ ပုဂ္ဂလိက ကုမ္ပဏီတွေနဲ့ အတူတကွလုပ် ဆောင်သွားမယ်လို့ ဆိုပါတယ်။
“နောက်ထပ်(အစီအစဥ်)တွေလည်း ထပ်လာဖို့ရှိပါတယ်” လို့ ဥရောပသမဂ္ဂက ထုတ်ပြန်ပါတယ်။
ကပ်ရောဂါကြောင့် ချစ်မြတ်နိုးသူတွေဆုံးရှုံးခဲ့ရတဲ့ မြန်မာပြည်သူအားလုံးနဲ့အတူ ထပ်တူဝမ်းနည်းကြေကွဲရတယ်လို့ ဥရောပသမဂ္ဂက ပြောပါတယ်။
ကိုဗစ်-၁၉ ဟာ မြန်မာနိုင်ငံ တစ်ခါမှမတွေ့ကြုံဖူးတဲ့ ပုံစံမျိုးနဲ့ ထင်ထင်ရှားရှားရောက်ရှိလာတဲ့ အများပြည်သူဆိုင်ရာ ကျန်းမာရေး ကပ်ဘေးဖြစ်ပါတယ်။
အီးယူကိုယ်စားလှယ်ရုံးက ပြည်တွင်းဝန်ထမ်းတစ်ယောက် ဒီနေ့မနက်ပိုင်းမှာ ကွယ်လွန်ခဲ့ပြီး ကွယ်လွန်ခဲ့သူ ဝန်ထမ်းရဲ့ မိသားစုနဲ့ထပ်တူ ဝမ်းနည်းကြေကွဲရတယ်လို့ ထုတ်ပြန်ထားပါတယ်။