ကရင်နီဒေသတွင် အာဏာသိမ်းစစ်ကောင်စီတပ်နှင့် ယနေ့တိုက်ပွဲဆက်လက်ဖြစ်ပွားခဲ့ကြောင်း ကရင်နီအမျိုးသားကာကွယ်ရေးတပ်ဖွဲ့(KNDF) ပြောရေးဆို ခွင့်ရှိသူက ပြောကြားသည်။
ရှမ်းပြည်နယ်ဖယ်ခုံမြို့နယ်တွင် ယနေ့ ဩဂုတ် ၁၄ရက်၌ တိုက်ပွဲ နှစ်ကြိမ်ဖြစ်ပွားခဲ့ပြီး စစ်ကောင်စီတပ်ကို ကရင်နီအမျိုးသားတိုးတက်ရေးပါတီ(KNPP/KA)နှင့် KNDF တို့ ပူးပေါင်းတိုက်ခိုက်ခဲ့ခြင်းဖြစ်ကြောင်း ၎င်းကဆိုသည်။
“အဲဒီမှာ ကျဆုံးစာရင်းတွေ ဒဏ်ရာရ စာရင်းတွေဘာတွေတော့ အခုထိ မသိရသေးဘူး”ဟု KNDF ပြောရေးဆို ခွင့်ရှိသူက ယနေ့ ညနေပိုင်းက ပြောကြားသည်။
ဒီးမော့ဆိုမြို့နယ်တွင်လည်း စစ်ကောင်စီတပ်က အင်အား အလုံးအရင်းဖြင့် ထိုးစစ်ဆင်လျက်ရှိကြောင်း ၎င်းကဆိုသည်။
“ဒီးမော့ဆိုဘက်မှာတော့ စစ်အင်အားတွေတိုးပြီး ထိုးစစ်ဆင်တာရှိတယ် နှစ်ကြောင်း သုံးကြောင်းပေါ့။အင်အား ၁၅၀ ၊၂၀၀ ကြားလောက်မှာရှိတယ်။ အဲဒါ သူတို့တွေက ဒီနေ့ ၂နာရီဝန်းကျင်လောက်မှာ ဒေသခံတွေကို ဖမ်းသွားတာပေါ့။ အဲဒီလူတွေက သူတို့တွေက မနေ့ညက စစ်ပွဲဖြစ်ရင်း တိမ်းရှောင်ရင်းနဲ့ သူတို့ ရိက္ခာပြန်လာယူတာ လေးယောက်။ လေးယောက်စလုံးကို ဖမ်းသွားလိုက်တာ အဲဒီထဲမှာ ၁၅နှစ်တစ်ယောက်ပါတယ်” ဟု KNDF ပြောရေးဆိုခွင့်ရှိသူက ပြောသည်။
အာဏာသိမ်းစစ်ကောင်စီတပ်က ကယားပြည်နယ် လွိုင်ကော်၊ ဒီးမော့ဆို၊ ဖရူဆိုနှင့် ဘောလခဲမြို့နယ်များအတွင်း စစ်ရေးလှုပ်ရှားနေခြင်းကြောင့် ဇူလိုင်လမှ ယခုလအထိ တိုက်ပွဲများ မကြာခဏ ဖြစ်ပွားခဲ့ရာ အကြိမ် ၂၀ ထက်မနည်းရှိခဲ့သည်။ KNPP/KNDF ပူးပေါင်းတပ်ဖွဲ့၏ ကြားဖြတ်တိုက်ခိုက်မှု၊ မိုင်းဆွဲတိုက်ခိုက်မှုများကြောင့် စစ်ကောင်စီတပ်က အထိနာခဲ့ကြောင်း KNDFက ထုတ်ပြန်ထားသည်။