ဂျပန် ကီရင် ဘီယာကုမ္ပ ဏီအနေနဲ့ မြန်မာစစ်တပ်နဲ့ ဆက်နွယ်မှုအားလုံးကို ချက်ချင်းအဆုံးသတ်ဖို့ မြန်မာနိုင်ငံအတွက် တရားမျှတမှု ( (Justice For Myanmar) အဖွဲ့က ဒီနေ့မှာ ထပ်မံတောင်းဆိုလိုက်ပါတယ်။
လူထုရွေးကောက်တင်မြှောက်ထားတဲ့အစိုးရကို စစ်တပ်က အာဏာသိမ်းပြီးတဲ့နောက် ကီရင်ကုမ္ပဏီဟာ စစ်တပ်နဲ့ဆက်နွယ်တဲ့စီးပွားရေးကို အဆုံးသတ်မယ်လို့ ကြေညာခဲ့ပေမယ့် လက်ရှိအချိန်ထိ အကောင်အထည်ဖော်တာမတွေ့ရသေးဘူးလို့ Justic For Myanmar က ဆိုထားပါတယ်။
ကီရင်ကုမ္ပဏီဟာ မြန်မာနိုင်ငံမှာ စစ်တပ်နဲ့ ဘီယာ လုပ်ငန်းကို ပူးပေါင်းလုပ်ကိုင်နေတာပါ။
ကီရင်ရဲ့နောက်ဆုံးထုတ်ပြန်တဲ့အချက်အလက်တွေကိုကြည့်ရင် ပြည်သူတွေဟာ မြန်မာဘီယာလိုမျိုး စစ်တပ် ထုတ်ကုန်တွေကို ဆန့်ကျင်သပိတ်မှောက်တာက ထိရောက်မှုရှိပြီး စစ်တပ်ပိုင်စီးပွားရေးလုပ်ငန်းတွေရဲ့ဝင်ငွေကို တိုက်ခိုက်ထိခိုက်စေတာတွေ့ရတယ်လို့ Justic For Myanmar က ဖော်ပြထားပါတယ်။
Public Service Announcement
ဒီလို ပြည်သူတွေရဲ့သပိတ်မှောက်မှုကြောင့် စစ်တပ်ပိုင် ဘီယာလုပ်ငန်းရဲ့ ဝင်ငွေရရှိမှုဟာ၂၀၂၁ ခုနှစ် ဒုတိယ သုံးလပတ် ၃၀ ရာခိုင်နှုန်းအထိ ကျဆင်းသွားတယ်လို့ ကီရင်ရဲ့ ထုတ်ပြန်တဲ့စာရင်းအရသိရပါတယ်။
ကီရင်ရဲ့စီးပွားဖက်ဖြစ်တဲ့စစ်တပ်ပိုင် မြန်မာ့စီးပွားရေးဦးပိုင်ကုမ္ပဏီဟာ စစ်တပ်အတွက်ဝင်ငွေအမြောက်အများ ရအောင် ထောက်ပံ့ပေးနေတာပဲဖြစ်ပါတယ်။
