ရိုဟင်ဂျာတွေနဲ့ တစ်နိုင်ငံလုံးက ပြည်သူတွေအပေါ် စစ်တပ်က သမိုင်းတစ်လျှောက်ကျူးလွန်ခဲ့တဲ့ ရာဇဝတ် မှုအားလုံးအတွက် တရားမျှတမှုနဲ့ တာဝန်ခံမှုတို့ကိုဖော်ဆောင်နိုင်ဖို့ အားသွန်ခွန်စိုက်ကြိုးပမ်း ဆောင်ရွက်သွားမယ်လို့ အမျိုးသားညီညွတ်ရေးအစိုးရ(NUG)က မနေ့က ထုတ်ပြန်ပါတယ်။
၂၀၁၇ က ရိုဟင်ဂျာတွေအပေါ်ကျူးလွန်ခဲ့တဲ့ ဆိုးဝါးတဲ့ ရာဇဝတ်မှုများ လေးနှစ်ပြည့်နှစ်ပတ်လည်အတွက် NUG က ထုတ်ပြန်ကြေညာခဲ့တာဖြစ်ပြီး အမှန်တရားနဲ့ တရားမျှတမှုတို့ရဲ့ အကျိုးအတွက် ပြစ်မှုကျူးလွန်သူတွေရဲ့ တာဝန်ရှိမှုကို ဖော်ဆောင်နိုင်ဖို့ အရေးကြီးတယ်လို့ ဆိုပါတယ်။
လွန်ခဲ့တဲ့လေးနှစ်က ဖြစ်ပွားခဲ့တဲ့ ရက်စက်ကြမ်းကြုတ်တဲ့ အကြမ်းဖက်မှုတွေ၊ ဆိုးဝါးတဲ့ လူ့အခွင့်အရေးချိုးဖောက်မှုတွေနဲ့ နေရပ်ရင်းကနေ လူအမြောက်အများ ပြောင်းရွေ့ခဲ့ရမှုတွေကြောင့် ရိုဟင်ဂျာပြည်သူထောင် ပေါင်းများစွာတို့ဟာ အိမ်နီးနားချင်းနိုင်ငံများမှာ ခိုလှုံနေခဲ့ရတဲ့အတွက် NUGက အထူးစိတ်မကောင်းဖြစ်မိတယ်လို့ ဖော်ပြပါတယ်။
စစ်တပ်ဟာလူမျိုး၊ ဘာသာရေး၊ လိင်စိတ်ကွဲပြားမှု သို့မဟုတ် နိုင်ငံရေးယုံကြည်ချက်တို့အပေါ် အခြေခံပြီး အထူးသဖြင့် တိုင်းရင်းသားဒေသများမှာ နေထိုင်ကြသူတွေကို လူသားမျိုးနွယ်တစ်ခုလုံးအပေါ် ကျူးလွန်တဲ့ ရာဇဝတ်မှုတွေ၊ စစ်ပွဲဆိုင်ရာရာဇဝတ်တွေကိုလည်း ဆယ်စုနှစ်ပေါင်းများစွာ ကျုးလွန်ခဲ့ပါတယ်။