အမှုကို ရုတ်သိမ်းပြီးတဲ့နောက် ဒီနေ့မှာ ဦးဝီရသူ လွတ်မြောက်လာတာပါ။
ဒီလိုမလွတ်မြောက်ခင်အချိန်က ဦးဝီရသူ ရဲ့ ရုပ်သံဖိုင်တခုထွက်ပေါ်လာပြီး အဲဒီရုပ်သံဖိုင်မှာ တော့ အမှုကိုအာမခံပေးမယ် ၊မပေးဘူးဆိုကာ စစ်ဆင်ရေး တရပ်အနေနဲ့ ရူးသွပ်သွားအောင်လုပ်နေတယ်လို့ ယူဆရတဲ့အကြောင်းပြောဆိုထားပါတယ်။
အဲဒီရုပ်သံဖိုင် ထွက်ပေါ်လာပြီး နောက်မှာတော့ အခုလို လွတ်မြောက်တဲ့ သတင်းထွက်လာတာလည်း ဖြစ်ပါတယ်။
ဦးဝီရသူဟာပြီးခဲ့တဲ့အစိုးရ လက်ထက်မှာ ဒေါ်အောင်ဆန်းစုကြည်နဲ့ အစိုးရကို တောက်လျောက် ပုတ်ခတ်ဟောပြောခဲ့သလို စစ်တပ်ထောက်ခံတွေမှာ ပါဝင်ခဲ့ပါတယ်။
Public Service Announcement
အဲဒီနောက် ၂၀၁၉ မေလအတွင်းရန်ကုန်မှာ ဟောပြောချက် အချို့ကြောင့် ထောင်ဒဏ် နှစ် ၂၀ အထိ ချနိုင်တဲ့ နိုင်ငံတော်အကြည်ညိုပျက်စေမှု ပုဒ်မနဲ့ တရားစွဲဆိုခံခဲ့ရပြီး တစ်နှစ်ကျော်ကြာအောင် တိမ်းရှောင်နေခဲ့တာပါ။
အဖမ်းမခံဘဲ တစ်နှစ်ကျော်ကြာ ဝရမ်းပြေးအဖြစ် တိမ်းရှောင်နေရာကနေ ၂၀၂၀ အထွေထွေရွေးကောက်ပွဲ မကျင်းပမှီ ရက်ပိုင်းအလိုမှာ ရုတ်တရက် လူမြင်ကွင်းထဲထွက်လာပြီး ရဲစခန်းမှာ ကိုယ်တိုင်သွားရောက်အဖမ်းခံခဲ့တာပါ။
စစ်တပ်က အာဏာသိမ်းပြီးတဲ့နောက် အကျဉ်းသား အချို့ကို လွတ်ငြိမ်းချမ်းသာပေးခဲ့ရာမှာ အမျိုးသားရေးသမားတွေနဲ့ စစ်တပ်ကိုထောက်ခံသူတွေ လွတ်လာပေမယ့် ဦးဝီရသူကတော့ ပြန်မလွတ်လာခဲ့ပါဘူး။
လွတ်ငြိမ်းထဲမှာ ဦးဝီရသူမပါတာကြောင့် ပြီးခဲ့တဲ့ ဇွန်လအတွင်းပြုလုပ်တဲ့ စစ်ကောင်စီရဲ့ သတင်းစာရှင်းလင်းပွဲမှာ ဦးဝီရသူ ရဲ့အခြေအနေကို အမျိုးသမီးတစ်ဦးက မေးမြန်းခဲ့တာတွေရှိခဲ့ပါတယ်။
