ချင်းပြည်နယ် တွန်းဇံမြို့နယ် တွန်းဇံမြို့မရဲစခန်းမှ ရဲတပ်သား ကိမ်ကိမ်းမန်အပါအဝင် ရဲတပ်သားငါးဦးငြိမ်းချမ်းစွာပြည်သူ့အာဏာဖီဆန်ရေးလှုပ်ရှားမှု (CDM)တွင် ပါဝင်ပြီး အာဏာရှင်စနစ်ဆိုးကို တော်လှန်ရန် ချင်းပြည်ကာကွယ်ရေးတပ်ဖွဲ့(CDF)ထံ ပူးပေါင်းလာကြောင်း CDFက သတင်းထုတ်ပြန်သည်။
ထိုသို့ ထုတ်ပြန်ရာတွင် ရဲတပ်သား ကိမ်ကိမ်းမန်က ပြည်သူနှင့်အတူ CDMတွင် ပူးပေါင်း ဆောင်ရွက်ကြောင်း တွန်းဇံမြို့မ ရဲစခန်းထံတင်ပြစာကိုပါ ပူးတွဲဖော်ပြခဲ့သည်။
အာဏာသိမ်းစစ်ကောင်စီအောက်တွင် ဆက်လက်တာဝန်မထမ်းဆောင်လိုပါ၍ ပြည်သလူထုနှင့်အတူ CDM ပြလုပ်မည်ဖြစ်ကြောင်း ရဲတပ်သား ကိမ်ကိမ်းမန်၏ စာ၌ ရေးသားထားသည်။
ပြည်သူလူထု၏ ဆန္ဒနှင့်အညီ ရွေးချယ်တင်မြှောက်သော ဒီမိုကရေစီ အစိုးရတစ်ရပ် ပေါ်ပေါက်လာမှသာ မိမိတာဝန်များအား ပြန်လည်ထမ်းဆောင်မည်ဟုလည်း ဖော်ပြထားသည်။
အမျိုးသားညီညွတ်ရေးအစိုးရက စစ်အာဏာရှင် ဆန့်ကျင်ရေး ပြည်သူလူထု၏ ခုခံတွန်းလှန်စစ် ယနေ့ စတင်ပြီဖြစ်ကြောင်း ကြေညာခဲ့ရာ မင်းအောင်လှိုင် ၏လိမ်လည်လှည့်ဖြားမှု ဖိနှိပ်မှုအောက်တွင် တာဝန်ထမ်းဆောင်နေကြသော တပ်မတော်သားများ၊ ပြည်သူ့ရဲများ ဝန်ထမ်းများအနေဖြင့် ပြည်သူ့ကာကွယ်ရေးတပ် PDFများနှင့် ချက်ချင်းဆက်သွယ်ပူးပေါင်းရန် ယာယီသမ္မတဒူဝါလရှီးလက ၎င်း၏ အရေးပေါ် မိန့်ခွန်း၌ ထည့်သွင်းပြောကြားခဲ့သည်။